৪৩৬. সমুগ্গজাতকং (১০)

৮৭. কুতো নু আগচ্ছথ ভো তযো জনা, স্ৰাগতা এথ [স্ৰাগতং এত্থ (সী. পী.)] নিসীদথাসনে;

কচ্চিত্থ ভোন্তো কুসলং অনামযং, চিরস্সমব্ভাগমনং হি ৰো ইধ.

৮৮. অহমেৰ একো ইধ মজ্জ পত্তো, ন চাপি মে দুতিযো কোচি ৰিজ্জতি;

কিমেৰ সন্ধায তে ভাসিতং ইসে, ‘‘কুতো নু আগচ্ছথ ভো তযো জনা’’.

৮৯. তুৰঞ্চ একো ভরিযা চ তে পিযা, সমুগ্গপক্খিত্তনিকিণ্ণমন্তরে;

সা রক্খিতা কুচ্ছিগতাৰ [কুচ্ছিগতা চ (ক.)] তে সদা, ৰাযুস্স [হরিস্স (ক.)] পুত্তেন সহা তহিং রতা.

৯০. সংৰিগ্গরূপো ইসিনা ৰিযাকতো [পব্যাকতো (ক.), ব্যাকতো (স্যা. পী.)], সো দানৰো তত্থ সমুগ্গমুগ্গিলি;

অদ্দক্খি ভরিযং সুচি মালধারিনিং, ৰাযুস্স পুত্তেন সহা তহিং রতং.

৯১. সুদিট্ঠরূপমুগ্গতপানুৰত্তিনা [সুদিট্ঠরূপুগ্গতপানুৰত্তিনা (সী. স্যা. পী.)], হীনা নরা যে পমদাৰসং গতা;

যথা হৰে পাণরিৰেত্থ রক্খিতা, দুট্ঠা মযী অঞ্ঞমভিপ্পমোদযি.

৯২. দিৰা চ রত্তো চ মযা উপট্ঠিতা, তপস্সিনা জোতিরিৰা ৰনে ৰসং;

সা ধম্মমুক্কম্ম অধম্মমাচরি, অকিরিযরূপো পমদাহি সন্থৰো.

৯৩. সরীরমজ্ঝম্হি ঠিতাতিমঞ্ঞহং, ময্হং অযন্তি অসতিং অসঞ্ঞতং;

সা ধম্মমুক্কম্ম অধম্মমাচরি, অকিরিযরূপো পমদাহি সন্থৰো.

৯৪. সুরক্খিতং মেতি কথং নু ৰিস্সসে, অনেকচিত্তাসু ন হত্থি [অনেকচিত্তা পুন হেত্থ (ক.)] রক্খণা;

এতা হি পাতালপপাতসন্নিভা, এত্থপ্পমত্তো ব্যসনং নিগচ্ছতি.

৯৫. তস্মা হি তে সুখিনো ৰীতসোকা, যে মাতুগামেহি চরন্তি নিস্সটা;

এতং সিৰং উত্তমমাভিপত্থযং, ন মাতুগামেহি করেয্য সন্থৰন্তি.

সমুগ্গজাতকং দসমং.