৪৩৭. পূতিমংসজাতকং (১১)

৯৬. ন খো মে রুচ্চতি আল়ি, পূতিমংসস্স পেক্খনা;

এতাদিসা সখারস্মা, আরকা পরিৰজ্জযে.

৯৭. উম্মত্তিকা অযং ৰেণী, ৰণ্ণেতি পতিনো সখিং;

পজ্ঝাযি [পজ্ঝাতি (সী. পী.), পজ্ঝাযতি (সী. নিয্য)] পটিগচ্ছন্তিং, আগতং মেণ্ড [মেল় (সী. পী.)] মাতরং.

৯৮. ত্ৰং খোসি সম্ম উম্মত্তো, দুম্মেধো অৰিচক্খণো;

যো ত্ৰং [সো ত্ৰং (স্যা.)] মতালযং কত্ৰা, অকালেন ৰিপেক্খসি.

৯৯. ন অকালে ৰিপেক্খেয্য, কালে পেক্খেয্য পণ্ডিতো;

পূতিমংসোৰ পজ্ঝাযি [পজ্ঝাতি (সী. পী.), পজ্ঝাযতি (সী. নিয্য)], যো অকালে ৰিপেক্খতি.

১০০. পিযং খো আল়ি মে হোতু, পুণ্ণপত্তং দদাহি মে;

পতি সঞ্জীৰিতো ময্হং, এয্যাসি পিযপুচ্ছিকা [পুচ্ছিতা (স্যা. ক.)].

১০১. পিযং খো আল়ি তে হোতু, পুণ্ণপত্তং দদামি তে;

মহতা পরিৰারেন [পরিহারেন (স্যা.)], এস্সং [এসং (সী. পী.)] কযিরাহি [কযিরাসি (পী.)] ভোজনং.

১০২. কীদিসো তুয্হং পরিৰারো, যেসং কাহামি ভোজনং;

কিংনামকা চ তে সব্বে, তং [তে (সী. স্যা. পী.)] মে অক্খাহি পুচ্ছিতা.

১০৩. মালিযো চতুরক্খো চ, পিঙ্গিযো অথ জম্বুকো;

এদিসো ময্হং পরিৰারো, তেসং কযিরাহি [কযিরাসি (পী.)] ভোজনং.

১০৪. নিক্খন্তায অগারস্মা, ভণ্ডকম্পি ৰিনস্সতি;

আরোগ্যং আল়িনো ৰজ্জং [ৰচ্ছং (?)], ইধেৰ ৰস মাগমাতি.

পূতিমংসজাতকং একাদসমং.