৪০০. দব্ভপুপ্ফজাতকং (৭-১-৫)

২৯. অনুতীরচারী ভদ্দন্তে, সহাযমনুধাৰ মং;

মহা মে গহিতো [রোহিতো (ক.)] মচ্ছো, সো মং হরতি ৰেগসা.

৩০. গম্ভীরচারী ভদ্দন্তে, দল়্হং গণ্হাহি থামসা;

অহং তং উদ্ধরিস্সামি, সুপণ্ণো উরগামিৰ [উরগম্মিৰ (সী. স্যা. পী.)].

৩১. ৰিৰাদো নো সমুপ্পন্নো, দব্ভপুপ্ফ সুণোহি মে;

সমেহি মেধগং [মেধকং (পী.)] সম্ম, ৰিৰাদো ৰূপসম্মতং.

৩২. ধম্মট্ঠোহং পুরে আসিং, বহূ অড্ডা মে তীরিতা [বহুঅট্টং মে তীরিতং (সী.), বহুঅট্টংৰ তীরিতং (স্যা.), বহু অত্থং মে তীরিতং (পী.)];

সমেমি মেধগং সম্ম, ৰিৰাদো ৰূপসম্মতং.

৩৩. অনুতীরচারি নঙ্গুট্ঠং, সীসং গম্ভীরচারিনো;

অচ্চাযং [অথাযং (সী. পী.)] মজ্ঝিমো খণ্ডো, ধম্মট্ঠস্স ভৰিস্সতি.

৩৪. চিরম্পি ভক্খো অভৰিস্স, সচে ন ৰিৰদেমসে;

অসীসকং অনঙ্গুট্ঠং, সিঙ্গালো হরতি রোহিতং.

৩৫. যথাপি রাজা নন্দেয্য, রজ্জং লদ্ধান খত্তিযো;

এৰাহমজ্জ নন্দামি, দিস্ৰা পুণ্ণমুখং পতিং.

৩৬. কথং নু থলজো সন্তো, উদকে মচ্ছং পরামসি;

পুট্ঠো মে সম্ম অক্খাহি, কথং অধিগতং তযা.

৩৭. ৰিৰাদেন কিসা হোন্তি, ৰিৰাদেন ধনক্খযা;

জীনা উদ্দা ৰিৰাদেন, ভুঞ্জ মাযাৰি রোহিতং.

৩৮. এৰমেৰ মনুস্সেসু, ৰিৰাদো যত্থ জাযতি;

ধম্মট্ঠং পটিধাৰন্তি, সো হি নেসং ৰিনাযকো;

ধনাপি তত্থ জীযন্তি, রাজকোসো পৰড্ঢতীতি [চ ৰড্ঢতি (পী.)].

দব্ভপুপ্ফজাতকং পঞ্চমং.