৩৮২. সিরিকাল়কণ্ণিজাতকং (৬-১-৭)

৪০. কা নু কাল়েন ৰণ্ণেন, ন চাপি [ন চাসি (সী.)] পিযদস্সনা;

কা ৰা ত্ৰং কস্স ৰা ধীতা, কথং জানেমু তং মযং.

৪১. মহারাজস্সহং ধীতা, ৰিরূপক্খস্স চণ্ডিযা;

অহং কাল়ী অলক্খিকা, কাল়কণ্ণীতি মং ৰিদূ;

ওকাসং যাচিতো দেহি, ৰসেমু তৰ সন্তিকে.

৪২. কিংসীলে কিংসমাচারে, পুরিসে নিৰিসসে তুৰং;

পুট্ঠা মে কাল়ি অক্খাহি, কথং [যথা (সী. পী.)] জানেমু তং মযং.

৪৩. মক্খী পল়াসী সারম্ভী, ইস্সুকী মচ্ছরী সঠো;

সো ময্হং পুরিসো কন্তো, লদ্ধং যস্স ৰিনস্সতি.

৪৪. কোধনো উপনাহী চ, পিসুণো চ ৰিভেদকো;

কণ্ডকৰাচো [অণ্ডকৰাচো (ক. সী. পী.)] ফরুসো, সো মে কন্ততরো ততো.

৪৫. অজ্জ সুৰেতি পুরিসো, সদত্থং নাৰবুজ্ঝতি;

ওৰজ্জমানো কুপ্পতি, সেয্যং সো অতিমঞ্ঞতি.

৪৬. দৰপ্পলুদ্ধো [দেৰপ্পলুদ্ধো (ক.), দৰপ্পলদ্ধো (পী.)] পুরিসো, সব্বমিত্তেহি ধংসতি;

সো ময্হং পুরিসো কন্তো, তস্মিং হোমি অনামযা.

৪৭. অপেহি এত্তো ত্ৰং কাল়ি, নেতং অম্হেসু ৰিজ্জতি;

অঞ্ঞং জনপদং গচ্ছ, নিগমে রাজধানিযো.

৪৮. অহম্পি খো তং [চেতং (সী.)] জানামি, নেতং তুম্হেসু ৰিজ্জতি;

সন্তি লোকে অলক্খিকা, সঙ্ঘরন্তি বহুং ধনং;

অহং দেৰো চ মে ভাতা, উভো নং ৰিধমামসে.

৪৯. কা নু দিব্বেন ৰণ্ণেন, পথব্যা সুপতিট্ঠিতা;

কা ৰা ত্ৰং কস্স ৰা ধীতা, কথং জানেমু তং মযং.

৫০. মহারাজস্সহং ধীতা, ধতরট্ঠস্স সিরীমতো [ধতরট্ঠসিরীমতো (স্যা. ক.)];

অহং সিরী চ লক্খী চ, ভূরিপঞ্ঞাতি মং ৰিদূ;

ওকাসং যাচিতো দেহি, ৰসেমু তৰ সন্তিকে.

৫১. কিংসীলে কিংসমাচারে, পুরিসে নিৰিসসে তুৰং;

পুট্ঠা মে লক্খি অক্খাহি, কথং [যথা (সী. পী.)] জানেমু তং মযং.

৫২. যো চাপি সীতে অথৰাপি উণ্হে, ৰাতাতপে ডংসসরীসপে চ;

খুধং [খুদ্দং (স্যা. ক.), খুদং (পী.)] পিপাসং অভিভুয্য সব্বং, রত্তিন্তিৰং যো সততং নিযুত্তো;

কালাগতঞ্চ ন হাপেতি অত্থং, সো মে মনাপো নিৰিসে চ তম্হি.

৫৩. অক্কোধনো মিত্তৰা চাগৰা চ, সীলূপপন্নো অসঠোজুভূতো [অসঠো উজ্জুভূতো (পী.)];

সঙ্গাহকো সখিলো সণ্হৰাচো, মহত্তপত্তোপি নিৰাতৰুত্তি;

তস্মিংহং [তস্মাহং (সী. পী.)] পোসে ৰিপুলা ভৰামি, ঊমি সমুদ্দস্স যথাপি ৰণ্ণং.

৫৪. যো চাপি মিত্তে অথৰা অমিত্তে, সেট্ঠে সরিক্খে অথ ৰাপি হীনে;

অত্থং চরন্তং অথৰা অনত্থং, আৰী রহো সঙ্গহমেৰ ৰত্তে [ৰত্তো (স্যা. ক.)].

ৰাচং ন ৰজ্জা ফরুসং কদাচি, মতস্স জীৰস্স চ তস্স হোমি.

৫৫. এতেসং যো অঞ্ঞতরং লভিত্ৰা, কন্তা সিরী [কন্তসিরিং (কত্থচি), কন্তং সিরিং (স্যা.) অট্ঠকথাযং দুতিযততিযপাঠন্তরানি] মজ্জতি অপ্পপঞ্ঞো;

তং দিত্তরূপং ৰিসমং চরন্তং, করীসঠানংৰ [করীসজাতং ৰ (সী. স্যা.)] ৰিৰজ্জযামি.

৫৬. অত্তনা কুরুতে লক্খিং, অলক্খিং কুরুতত্তনা;

ন হি লক্খিং অলক্খিং ৰা, অঞ্ঞো অঞ্ঞস্স কারকোতি.

সিরিকাল়কণ্ণিজাতকং সত্তমং.