১. অৰারিযৰগ্গো

৩৭৬. অৰারিযজাতকং (৬-১-১)

১. মাসু কুজ্ঝ ভূমিপতি, মাসু কুজ্ঝ রথেসভ;

কুদ্ধং অপ্পটিকুজ্ঝন্তো, রাজা রট্ঠস্স পূজিতো.

২. গামে ৰা যদি ৰারঞ্ঞে, নিন্নে ৰা যদি ৰা থলে;

সব্বত্থ অনুসাসামি, মাসু কুজ্ঝ [মাস্সু কুজ্ঝি (সী. পী.)] রথেসভ.

৩. অৰারিযপিতা নাম, অহু গঙ্গায নাৰিকো;

পুব্বে জনং তারেত্ৰান, পচ্ছা যাচতি ৰেতনং;

তেনস্স ভণ্ডনং হোতি, ন চ ভোগেহি ৰড্ঢতি.

৪. অতিণ্ণংযেৰ যাচস্সু, অপারং তাত নাৰিক;

অঞ্ঞো হি তিণ্ণস্স মনো, অঞ্ঞো হোতি পারেসিনো [তরেসিনো (সী. পী.), তিরেসিনো (স্যা.)].

৫. গামে ৰা যদি ৰারঞ্ঞে, নিন্নে ৰা যদি ৰা থলে;

সব্বত্থ অনুসাসামি, মাসু কুজ্ঝিত্থ নাৰিক.

৬. যাযেৰানুসাসনিযা, রাজা গামৰরং অদা;

তাযেৰানুসাসনিযা, নাৰিকো পহরী মুখং.

৭. ভত্তং ভিন্নং হতা ভরিযা, গব্ভো চ পতিতো ছমা;

মিগোৰ জাতরূপেন, ন তেনত্থং অবন্ধি সূতি [অৰড্ঢিতুন্তি (সী. স্যা.), অৰড্ঢি সূতি (?)].

অৰারিযজাতকং পঠমং.

৩৭৭. সেতকেতুজাতকং (৬-১-২)

৮. মা তাত কুজ্ঝি ন হি সাধু কোধো, বহুম্পি তে অদিট্ঠমস্সুতঞ্চ;

মাতা পিতা দিসতা [দিসা তাত (স্যা.), দিসা তা (পী.)] সেতকেতু, আচরিযমাহু দিসতং পসত্থা.

৯. অগারিনো অন্নদপানৰত্থদা [অন্নপানৰত্থদা (স্যা. ক.)], অৰ্হাযিকা তম্পি দিসং ৰদন্তি;

এসা দিসা পরমা সেতকেতু, যং পত্ৰা দুক্খী সুখিনো ভৰন্তি.

১০. খরাজিনা জটিলা পঙ্কদন্তা, দুম্মক্খরূপা [দুমুক্খরূপা (সী. স্যা.), দুম্মুক্খরূপা (পী. ক.)] যেমে জপ্পন্তি মন্তে;

কচ্চি নু তে মানুসকে পযোগে, ইদং ৰিদূ পরিমুত্তা অপাযা.

১১. পাপানি কম্মানি কত্ৰান রাজ, বহুস্সুতো চে ন [বহুস্সুতো নেৰ (সী. স্যা.)] চরেয্য ধম্মং;

সহস্সৰেদোপি ন তং পটিচ্চ, দুক্খা পমুঞ্চে চরণং অপত্ৰা.

১২. সহস্সৰেদোপি ন তং পটিচ্চ, দুক্খা পমুঞ্চে চরণং অপত্ৰা;

মঞ্ঞামি ৰেদা অফলা ভৰন্তি, সসংযমং চরণমেৰ [চরণঞ্ঞেৰ (সী. স্যা. পী.)] সচ্চং.

১৩. ন হেৰ ৰেদা অফলা ভৰন্তি, সসংযমং চরণমেৰ সচ্চং;

কিত্তিঞ্হি পপ্পোতি অধিচ্চ ৰেদে, সন্তিং পুণেতি [সন্তং পুনে’তি (সী. পী.)] চরণেন দন্তোতি.

সেতকেতুজাতকং দুতিযং.

৩৭৮. দরীমুখজাতকং (৬-১-৩)

১৪. পঙ্কো চ কামা পলিপো চ কামা, ভযঞ্চ মেতং তিমূলং পৰুত্তং;

রজো চ ধূমো চ মযা পকাসিতা, হিত্ৰা তুৰং পব্বজ ব্রহ্মদত্ত.

১৫. গধিতো [গথিতো (সী.)] চ রত্তো চ অধিমুচ্ছিতো চ, কামেস্ৰহং ব্রাহ্মণ ভিংসরূপং;

তং নুস্সহে জীৰিকত্থো পহাতুং, কাহামি পুঞ্ঞানি অনপ্পকানি.

১৬. যো অত্থকামস্স হিতানুকম্পিনো, ওৰজ্জমানো ন করোতি সাসনং;

ইদমেৰ সেয্যো ইতি মঞ্ঞমানো, পুনপ্পুনং গব্ভমুপেতি মন্দো.

১৭. সো ঘোররূপং নিরযং উপেতি, সুভাসুভং মুত্তকরীসপূরং;

সত্তা সকাযে ন জহন্তি গিদ্ধা, যে হোন্তি কামেসু অৰীতরাগা.

১৮. মীল়্হেন লিত্তা রুহিরেন মক্খিতা, সেম্হেন লিত্তা উপনিক্খমন্তি;

যং যঞ্হি কাযেন ফুসন্তি তাৰদে, সব্বং অসাতং দুখমেৰ কেৰলং.

১৯. দিস্ৰা ৰদামি ন হি অঞ্ঞতো সৰং, পুব্বেনিৰাসং বহুকং সরামি;

চিত্রাহি গাথাহি সুভাসিতাহি, দরীমুখো নিজ্ঝাপযি সুমেধন্তি.

দরীমুখজাতকং ততিযং.

৩৭৯. নেরুজাতকং (৬-১-৪)

২০. কাকোলা কাকসঙ্ঘা চ, মযঞ্চ পততং ৰরা [ৰর (ক.) মযন্তিপদস্স হি ৰিসেসনং];

সব্বেৰ সদিসা হোম, ইমং আগম্ম পব্বতং.

২১. ইধ সীহা চ ব্যগ্ঘা চ, সিঙ্গালা চ মিগাধমা;

সব্বেৰ সদিসা হোন্তি, অযং কো নাম পব্বতো.

২২. ইমং নেরূতি [নেরুন্তি (সী. স্যা.)] জানন্তি, মনুস্সা পব্বতুত্তমং;

ইধ ৰণ্ণেন সম্পন্না, ৰসন্তি সব্বপাণিনো.

২৩. অমাননা যত্থ সিযা, সন্তানং ৰা ৰিমাননা;

হীনসম্মাননা ৰাপি, ন তত্থ ৰসতিং ৰসে [ৰসতী ৰসে (স্যা.), ৰস দিৰসে (পী.)].

২৪. যত্থালসো চ দক্খো চ, সূরো ভীরু চ পূজিযা;

ন তত্থ সন্তো ৰসন্তি, অৰিসেসকরে নরে [নগে (সী. স্যা. পী.)].

২৫. নাযং নেরু ৰিভজতি, হীনউক্কট্ঠমজ্ঝিমে;

অৰিসেসকরো নেরু, হন্দ নেরুং জহামসেতি.

নেরুজাতকং চতুত্থং.

৩৮০. আসঙ্কজাতকং (৬-১-৫)

২৬. আসাৰতী নাম লতা, জাতা চিত্তলতাৰনে;

তস্সা ৰস্সসহস্সেন, একং নিব্বত্ততে ফলং.

২৭. তং দেৰা পযিরুপাসন্তি, তাৰ দূরফলং সতিং;

আসীসেৰ [আসিংসেৰ (সী. স্যা. পী.)] তুৰং রাজ, আসা ফলৰতী সুখা.

২৮. আসীসতেৰ [আসিংসেথেৰ (সী. স্যা. পী.)] সো পক্খী, আসীসতেৰ [আসিংসেথেৰ (সী. স্যা. পী.)] সো দিজো;

তস্স চাসা [তস্সেৰাসা (স্যা.)] সমিজ্ঝতি, তাৰ দূরগতা সতী;

আসীসেৰ তুৰং রাজ, আসা ফলৰতী সুখা.

২৯. সম্পেসি খো মং ৰাচায, ন চ সম্পেসি [সংসেসি (ক.)] কম্মুনা;

মালা সেরেয্যকস্সেৰ, ৰণ্ণৰন্তা অগন্ধিকা.

৩০. অফলং মধুরং ৰাচং, যো মিত্তেসু পকুব্বতি;

অদদং অৰিস্সজং ভোগং, সন্ধি তেনস্স জীরতি.

৩১. যঞ্হি কযিরা তঞ্হি ৰদে, যং ন কযিরা ন তং ৰদে;

অকরোন্তং ভাসমানং, পরিজানন্তি পণ্ডিতা.

৩২. বলঞ্চ ৰত মে খীণং, পাথেয্যঞ্চ ন ৰিজ্জতি;

সঙ্কে পাণূপরোধায, হন্দ দানি ৰজামহং.

৩৩. এতদেৰ হি মে নামং, যং নামস্মি রথেসভ;

আগমেহি মহারাজ, পিতরং আমন্তযামহন্তি.

আসঙ্কজাতকং পঞ্চমং.

৩৮১. মিগালোপজাতকং (৬-১-৬)

৩৪. ন মে রুচ্চি মিগালোপ, যস্স তে তাদিসী গতী;

অতুচ্চং তাত পতসি, অভূমিং তাত সেৰসি.

৩৫. চতুক্কণ্ণংৰ কেদারং, যদা তে পথৰী সিযা;

ততো তাত নিৰত্তস্সু, মাস্সু এত্তো পরং গমি.

৩৬. সন্তি অঞ্ঞেপি সকুণা, পত্তযানা ৰিহঙ্গমা;

অক্খিত্তা ৰাতৰেগেন, নট্ঠা তে সস্সতীসমা.

৩৭. অকত্ৰা অপনন্দস্স [অপরণ্ণস্স (সী. স্যা. পী.)], পিতু ৰুদ্ধস্স সাসনং;

কালৰাতে অতিক্কম্ম, ৰেরম্ভানং ৰসং অগা [গতো (সী.)].

৩৮. তস্স পুত্তা চ দারা চ, যে চঞ্ঞে অনুজীৰিনো;

সব্বে ব্যসনমাপাদুং, অনোৰাদকরে দিজে.

৩৯. এৰম্পি ইধ ৰুদ্ধানং, যো ৰাক্যং নাৰবুজ্ঝতি;

অতিসীমচরো [অতিসীমং চরো (সী. স্যা. ক.)] দিত্তো, গিজ্ঝোৰাতীতসাসনো;

সব্বে ব্যসনং পপ্পোন্তি, অকত্ৰা বুদ্ধসাসনন্তি.

মিগালোপজাতকং ছট্ঠং.

৩৮২. সিরিকাল়কণ্ণিজাতকং (৬-১-৭)

৪০. কা নু কাল়েন ৰণ্ণেন, ন চাপি [ন চাসি (সী.)] পিযদস্সনা;

কা ৰা ত্ৰং কস্স ৰা ধীতা, কথং জানেমু তং মযং.

৪১. মহারাজস্সহং ধীতা, ৰিরূপক্খস্স চণ্ডিযা;

অহং কাল়ী অলক্খিকা, কাল়কণ্ণীতি মং ৰিদূ;

ওকাসং যাচিতো দেহি, ৰসেমু তৰ সন্তিকে.

৪২. কিংসীলে কিংসমাচারে, পুরিসে নিৰিসসে তুৰং;

পুট্ঠা মে কাল়ি অক্খাহি, কথং [যথা (সী. পী.)] জানেমু তং মযং.

৪৩. মক্খী পল়াসী সারম্ভী, ইস্সুকী মচ্ছরী সঠো;

সো ময্হং পুরিসো কন্তো, লদ্ধং যস্স ৰিনস্সতি.

৪৪. কোধনো উপনাহী চ, পিসুণো চ ৰিভেদকো;

কণ্ডকৰাচো [অণ্ডকৰাচো (ক. সী. পী.)] ফরুসো, সো মে কন্ততরো ততো.

৪৫. অজ্জ সুৰেতি পুরিসো, সদত্থং নাৰবুজ্ঝতি;

ওৰজ্জমানো কুপ্পতি, সেয্যং সো অতিমঞ্ঞতি.

৪৬. দৰপ্পলুদ্ধো [দেৰপ্পলুদ্ধো (ক.), দৰপ্পলদ্ধো (পী.)] পুরিসো, সব্বমিত্তেহি ধংসতি;

সো ময্হং পুরিসো কন্তো, তস্মিং হোমি অনামযা.

৪৭. অপেহি এত্তো ত্ৰং কাল়ি, নেতং অম্হেসু ৰিজ্জতি;

অঞ্ঞং জনপদং গচ্ছ, নিগমে রাজধানিযো.

৪৮. অহম্পি খো তং [চেতং (সী.)] জানামি, নেতং তুম্হেসু ৰিজ্জতি;

সন্তি লোকে অলক্খিকা, সঙ্ঘরন্তি বহুং ধনং;

অহং দেৰো চ মে ভাতা, উভো নং ৰিধমামসে.

৪৯. কা নু দিব্বেন ৰণ্ণেন, পথব্যা সুপতিট্ঠিতা;

কা ৰা ত্ৰং কস্স ৰা ধীতা, কথং জানেমু তং মযং.

৫০. মহারাজস্সহং ধীতা, ধতরট্ঠস্স সিরীমতো [ধতরট্ঠসিরীমতো (স্যা. ক.)];

অহং সিরী চ লক্খী চ, ভূরিপঞ্ঞাতি মং ৰিদূ;

ওকাসং যাচিতো দেহি, ৰসেমু তৰ সন্তিকে.

৫১. কিংসীলে কিংসমাচারে, পুরিসে নিৰিসসে তুৰং;

পুট্ঠা মে লক্খি অক্খাহি, কথং [যথা (সী. পী.)] জানেমু তং মযং.

৫২. যো চাপি সীতে অথৰাপি উণ্হে, ৰাতাতপে ডংসসরীসপে চ;

খুধং [খুদ্দং (স্যা. ক.), খুদং (পী.)] পিপাসং অভিভুয্য সব্বং, রত্তিন্তিৰং যো সততং নিযুত্তো;

কালাগতঞ্চ ন হাপেতি অত্থং, সো মে মনাপো নিৰিসে চ তম্হি.

৫৩. অক্কোধনো মিত্তৰা চাগৰা চ, সীলূপপন্নো অসঠোজুভূতো [অসঠো উজ্জুভূতো (পী.)];

সঙ্গাহকো সখিলো সণ্হৰাচো, মহত্তপত্তোপি নিৰাতৰুত্তি;

তস্মিংহং [তস্মাহং (সী. পী.)] পোসে ৰিপুলা ভৰামি, ঊমি সমুদ্দস্স যথাপি ৰণ্ণং.

৫৪. যো চাপি মিত্তে অথৰা অমিত্তে, সেট্ঠে সরিক্খে অথ ৰাপি হীনে;

অত্থং চরন্তং অথৰা অনত্থং, আৰী রহো সঙ্গহমেৰ ৰত্তে [ৰত্তো (স্যা. ক.)].

ৰাচং ন ৰজ্জা ফরুসং কদাচি, মতস্স জীৰস্স চ তস্স হোমি.

৫৫. এতেসং যো অঞ্ঞতরং লভিত্ৰা, কন্তা সিরী [কন্তসিরিং (কত্থচি), কন্তং সিরিং (স্যা.) অট্ঠকথাযং দুতিযততিযপাঠন্তরানি] মজ্জতি অপ্পপঞ্ঞো;

তং দিত্তরূপং ৰিসমং চরন্তং, করীসঠানংৰ [করীসজাতং ৰ (সী. স্যা.)] ৰিৰজ্জযামি.

৫৬. অত্তনা কুরুতে লক্খিং, অলক্খিং কুরুতত্তনা;

ন হি লক্খিং অলক্খিং ৰা, অঞ্ঞো অঞ্ঞস্স কারকোতি.

সিরিকাল়কণ্ণিজাতকং সত্তমং.

৩৮৩. কুক্কুটজাতকং (৬-১-৮)

৫৭. সুচিত্তপত্তছদন, তম্বচূল় ৰিহঙ্গম;

ওরোহ দুমসাখায, মুধা ভরিযা ভৰামি তে.

৫৮. চতুপ্পদী ত্ৰং কল্যাণি, দ্ৰিপদাহং মনোরমে;

মিগী পক্খী অসঞ্ঞুত্তা, অঞ্ঞং পরিযেস সামিকং.

৫৯. কোমারিকা তে হেস্সামি, মঞ্জুকা পিযভাণিনী;

ৰিন্দ মং অরিযেন ৰেদেন, সাৰয মং যদিচ্ছসি.

৬০. কুণপাদিনি লোহিতপে, চোরি কুক্কুটপোথিনি;

ন ত্ৰং অরিযেন ৰেদেন, মমং ভত্তারমিচ্ছসি.

৬১. এৰম্পি চতুরা [চাতুরা (স্যা. ক.)] নারী, দিস্ৰান সধনং [পৰরং (সী. স্যা. পী.)] নরং;

নেন্তি সণ্হাহি ৰাচাহি, বিল়ারী ৰিয কুক্কুটং.

৬২. যো চ উপ্পতিতং অত্থং, ন খিপ্পমনুবুজ্ঝতি;

অমিত্তৰসমন্ৰেতি, পচ্ছা চ অনুতপ্পতি.

৬৩. যো চ উপ্পতিতং অত্থং, খিপ্পমেৰ নিবোধতি;