৩৬০. সুযোনন্দীজাতকং (৫-১-১০)

৫৫. ৰাতি গন্ধো তিমিরানং, কুসমুদ্দো চ [ৰ (স্যা. পী.)] ঘোসৰা;

দূরে ইতো সুযোনন্দী [ইতো হি সুসন্দী (সী. স্যা.), ইতোপি সুস্সোন্দী (পী.)], তম্বকামা তুদন্তি মং.

৫৬. কথং সমুদ্দমতরি, কথং অদ্দক্খি সেদুমং [সেরুমং (সী. স্যা. পী.)];

কথং তস্সা চ তুয্হঞ্চ, অহু সগ্গ [অগ্গ (সী. স্যা.)] সমাগমো.

৫৭. কুরুকচ্ছা [ভরুকচ্ছা (সী. স্যা. পী.)] পযাতানং, ৰাণিজানং ধনেসিনং;

মকরেহি অভিদা [মকরেহিব্ভিদা (সী.), মকরেহি’ভিদা (স্যা.), মকরেহি ভিন্না (পী.)] নাৰা, ফলকেনাহমপ্লৰিং.

৫৮. সা মং সণ্হেন মুদুনা, নিচ্চং চন্দনগন্ধিনী;

অঙ্গেন [অঙ্কেন (পী. ক.)] উদ্ধরী ভদ্দা, মাতা পুত্তংৰ ওরসং.

৫৯. সা মং অন্নেন পানেন, ৰত্থেন সযনেন চ;

অত্তনাপি চ মন্দক্খী, এৰং তম্ব ৰিজানাহীতি.

সুযোনন্দীজাতকং দসমং.

মণিকুণ্ডলৰগ্গো পঠমো.

তস্সুদ্দানং –

অথ জিনৰরো হরিতং তিণকো, অথ ভিন্নপ্লৰো উরগোৰ ঘটো;

দরিযা পুন কুঞ্জর ভূনহতা, মিগমুত্তমসগ্গৰরেন দসাতি.