২. ৰণ্ণারোহৰগ্গো

৩৬১. ৰণ্ণারোহজাতকং (৫-২-১)

৬০. ৰণ্ণারোহেন জাতিযা, বলনিক্কমনেন চ;

সুবাহু ন মযা সেয্যো, সুদাঠ ইতি ভাসসি.

৬১. ৰণ্ণারোহেন জাতিযা, বলনিক্কমনেন চ;

সুদাঠো ন মযা সেয্যো, সুবাহু ইতি ভাসসি.

৬২. এৰং চে মং ৰিহরন্তং, সুবাহু সম্ম দুব্ভসি;

ন দানাহং তযা সদ্ধিং, সংৰাসমভিরোচযে.

৬৩. যো পরেসং ৰচনানি, সদ্দহেয্য [সদ্দহেথ (সী. স্যা. পী.)] যথাতথং;

খিপ্পং ভিজ্জেথ মিত্তস্মিং, ৰেরঞ্চ পসৰে বহুং.

৬৪. ন সো মিত্তো যো সদা অপ্পমত্তো, ভেদাসঙ্কী রন্ধমেৰানুপস্সী;

যস্মিঞ্চ সেতী উরসীৰ পুত্তো, স ৰে মিত্তো যো অভেজ্জো পরেহীতি.

ৰণ্ণারোহজাতকং পঠমং.

৩৬২. সীলৰীমংসজাতকং (৫-২-২)

৬৫. সীলং সেয্যো সুতং সেয্যো, ইতি মে সংসযো অহু;

সীলমেৰ সুতা সেয্যো, ইতি মে নত্থি সংসযো.

৬৬. মোঘা জাতি চ ৰণ্ণো চ, সীলমেৰ কিরুত্তমং;

সীলেন অনুপেতস্স, সুতেনত্থো ন ৰিজ্জতি.

৬৭. খত্তিযো চ অধম্মট্ঠো, ৰেস্সো চাধম্মনিস্সিতো;

তে পরিচ্চজ্জুভো লোকে, উপপজ্জন্তি দুগ্গতিং.

৬৮. খত্তিযা ব্রাহ্মণা ৰেস্সা, সুদ্দা চণ্ডালপুক্কুসা;

ইধ ধম্মং চরিত্ৰান, ভৰন্তি তিদিৰে সমা.

৬৯. ন ৰেদা সম্পরাযায, ন জাতি নাপি [নোপি (পী.)] বন্ধৰা;

সকঞ্চ সীলং সংসুদ্ধং, সম্পরাযায সুখায চাতি [সুখাৰহন্তি (সী. স্যা.)].

সীলৰীমংসজাতকং দুতিযং.

৩৬৩. হিরিজাতকং (৫-২-৩)

৭০. হিরিং তরন্তং ৰিজিগুচ্ছমানং, তৰাহমস্মী ইতি ভাসমানং;

সেয্যানি কম্মানি অনাদিযন্তং, নেসো মমন্তি ইতি নং ৰিজঞ্ঞা.

৭১. যঞ্হি কযিরা তঞ্হি ৰদে, যং ন কযিরা ন তং ৰদে;

অকরোন্তং ভাসমানং, পরিজানন্তি পণ্ডিতা.

৭২. ন সো মিত্তো যো সদা অপ্পমত্তো, ভেদাসঙ্কী রন্ধমেৰানুপস্সী;

যস্মিঞ্চ সেতী উরসীৰ পুত্তো, স ৰে মিত্তো যো অভেজ্জো পরেহি.

৭৩. পামোজ্জকরণং ঠানং, পসংসাৰহনং সুখং;

ফলানিসংসো ভাৰেতি, ৰহন্তো পোরিসং ধুরং.

৭৪. পৰিৰেকরসং পিত্ৰা, রসং উপসমস্স চ;

নিদ্দরো হোতি নিপ্পাপো, ধম্মপ্পীতিরসং পিৰন্তি.

হিরিজাতকং ততিযং.

৩৬৪. খজ্জোপনকজাতকং (৫-২-৪)

৭৫. কো নু সন্তম্হি পজ্জোতে, অগ্গিপরিযেসনং চরং;

অদ্দক্খি রত্তি [রত্তিং (স্যা.)] খজ্জোতং, জাতৰেদং অমঞ্ঞথ.

৭৬. স্ৰস্স গোমযচুণ্ণানি, অভিমত্থং তিণানি চ;

ৰিপরীতায সঞ্ঞায, নাসক্খি পজ্জলেতৰে.

৭৭. এৰম্পি অনুপাযেন, অত্থং ন লভতে মিগো [মূগো (স্যা.)];

ৰিসাণতো গৰং দোহং, যত্থ খীরং ন ৰিন্দতি.

৭৮. ৰিৰিধেহি উপাযেহি, অত্থং পপ্পোন্তি মাণৰা;

নিগ্গহেন অমিত্তানং, মিত্তানং পগ্গহেন চ.

৭৯. সেনামোক্খপলাভেন [সেনী মোক্খূপলাভেন (স্যা.)], ৰল্লভানং নযেন চ;

জগতিং জগতিপালা, আৰসন্তি ৰসুন্ধরন্তি.

খজ্জোপনকজাতকং চতুত্থং.

৩৬৫. অহিতুণ্ডিকজাতকং (৫-২-৫)

৮০. ধুত্তোম্হি সম্ম সুমুখ, জূতে অক্খপরাজিতো;

হরেহি [সেৰেহি (পী.)] অম্বপক্কানি, ৰীরিযং তে ভক্খযামসে.

৮১. অলিকং ৰত মং সম্ম, অভূতেন পসংসসি;

কো তে সুতো ৰা দিট্ঠো ৰা, সুমুখো নাম মক্কটো.

৮২. অজ্জাপি মে তং মনসি [তে মং সরসি (ক.)], যং মং ত্ৰং অহিতুণ্ডিক;

ধঞ্ঞাপণং পৰিসিত্ৰা, মত্তো [মুত্তো (ক.)] ছাতং হনাসি মং.

৮৩. তাহং সরং দুক্খসেয্যং, অপি রজ্জম্পি কারযে;

নেৰাহং যাচিতো দজ্জং, তথা হি ভযতজ্জিতো.

৮৪. যঞ্চ জঞ্ঞা কুলে জাতং, গব্ভে তিত্তং অমচ্ছরিং;

তেন সখিঞ্চ মিত্তঞ্চ, ধীরো সন্ধাতুমরহতীতি.

অহিতুণ্ডিকজাতকং পঞ্চমং.

৩৬৬. গুম্বিযজাতকং (৫-২-৬)

৮৫. মধুৰণ্ণং মধুরসং, মধুগন্ধং ৰিসং অহু;

গুম্বিযো ঘাসমেসানো, অরঞ্ঞে ওদহী ৰিসং.

৮৬. মধু ইতি মঞ্ঞমানা [মধূতি মঞ্ঞমানায (ক.)], যে তং ৰিসমখাদিসুং [ৰিসমসাযিসুং (সী. স্যা.)];

তেসং তং কটুকং আসি, মরণং তেনুপাগমুং.

৮৭. যে চ খো পটিসঙ্খায, ৰিসং তং পরিৰজ্জযুং;

তে আতুরেসু সুখিতা, ডয্হমানেসু নিব্বুতা.

৮৮. এৰমেৰ মনুস্সেসু, ৰিসং কামা সমোহিতা;

আমিসং বন্ধনঞ্চেতং, মচ্চুৰেসো [পচ্চুৰসো (সী. স্যা.)] গুহাসযো.

৮৯. এৰমেৰ ইমে কামে, আতুরা পরিচারিকে [পরিচারকে (ক.)];

যে সদা পরিৰজ্জেন্তি, সঙ্গং লোকে উপচ্চগুন্তি.

গুম্বিযজাতকং ছট্ঠং.

৩৬৭. সাল়িযজাতকং (৫-২-৭)

৯০. য্ৰাযং সাল়িয [সালিয (সী. স্যা. পী.), সাল়িক (?)] ছাপোতি, কণ্হসপ্পং অগাহযি;

তেন সপ্পেনযং দট্ঠো, হতো পাপানুসাসকো.

৯১. অহন্তার [অহনন্ত (পী.), অহরন্ত (?)] মহন্তারং, যো নরো হন্তুমিচ্ছতি;

এৰং সো নিহতো সেতি, যথাযং পুরিসো হতো.

৯২. অহন্তার [অহনন্ত (সী. স্যা. পী.), অহরন্ত (?)] মঘাতেন্তং, যো নরো হন্তুমিচ্ছতি;

এৰং সো নিহতো সেতি, যথাযং পুরিসো হতো.

৯৩. যথা পংসুমুট্ঠিং পুরিসো, পটিৰাতং পটিক্খিপে;

তমেৰ সো রজো হন্তি, তথাযং পুরিসো হতো.

৯৪. যো অপ্পদুট্ঠস্স নরস্স দুস্সতি, সুদ্ধস্স পোসস্স অনঙ্গণস্স;

তমেৰ বালং পচ্চেতি পাপং, সুখুমো রজো পটিৰাতংৰ খিত্তোতি.

সাল়িযজাতকং সত্তমং.

৩৬৮. তচসারজাতকং (৫-২-৮)

৯৫. অমিত্তহত্থত্থগতা [হত্থত্তগতা (কত্থচি, সী. নিয্য)], তচসারসমপ্পিতা;

পসন্নমুখৰণ্ণাত্থ, কস্মা তুম্হে ন সোচথ.

৯৬. ন সোচনায পরিদেৰনায, অত্থোৰ লব্ভো [অত্থো চ লব্ভা (সী. স্যা.), অত্থোধ লব্ভা (অ. নি. ৫.৪৮)] অপি অপ্পকোপি;

সোচন্তমেনং দুখিতং ৰিদিত্ৰা, পচ্চত্থিকা অত্তমনা ভৰন্তি.

৯৭. যতো চ খো পণ্ডিতো আপদাসু, ন ৰেধতী অত্থৰিনিচ্ছযঞ্ঞূ;

পচ্চত্থিকাস্স [পচ্চত্থিকা তে (ক.)] দুখিতা ভৰন্তি, দিস্ৰা মুখং অৰিকারং পুরাণং.

৯৮. জপ্পেন মন্তেন সুভাসিতেন, অনুপ্পদানেন পৰেণিযা ৰা;

যথা যথা যত্থ লভেথ অত্থং, তথা তথা তত্থ পরক্কমেয্য.

৯৯. যতো চ জানেয্য অলব্ভনেয্যো, মযা ৰ [মযা ৰা (স্যা. ক.)] অঞ্ঞেন ৰা এস অত্থো;

অসোচমানো অধিৰাসযেয্য, কম্মং দল়্হং কিন্তি করোমি দানীতি.

তচসারজাতকং অট্ঠমং.

৩৬৯. মিত্তৰিন্দকজাতকং (৫-২-৯)

১০০. ক্যাহং দেৰানমকরং, কিং পাপং পকতং মযা;

যং মে সিরস্মিং ওহচ্চ [উহচ্চ (ক.), উহচ্চ (পী.)], চক্কং ভমতি মত্থকে.

১০১. অতিক্কম্ম রমণকং, সদামত্তঞ্চ দূভকং;

ব্রহ্মত্তরঞ্চ পাসাদং, কেনত্থেন ইধাগতো.

১০২. ইতো বহুতরা ভোগা, অত্র মঞ্ঞে ভৰিস্সরে;

ইতি এতায সঞ্ঞায, পস্স মং ব্যসনং গতং.

১০৩. চতুব্ভি অট্ঠজ্ঝগমা, অট্ঠাহিপি চ [অট্ঠাহি চাপি (সী. স্যা.), অট্ঠাভি চাপি (ক.)] সোল়স;

সোল়সাহি চ বাত্তিংস, অত্রিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকে.

১০৪. উপরিৰিসালা দুপ্পূরা, ইচ্ছা ৰিসটগামিনী [উপরি ৰিসালং দুপ্পূরং, ইচ্ছাৰিসদগামিনী (সী.)];

যে চ তং অনুগিজ্ঝন্তি, তে হোন্তি চক্কধারিনোতি.

মিত্তৰিন্দকজাতকং নৰমং.

৩৭০. পলাসজাতকং (৫-২-১০)

১০৫. হংসো পলাসমৰচ, নিগ্রোধো সম্ম জাযতি;

অঙ্কস্মিং [অঙ্গস্মিং (ক.)] তে নিসিন্নোৰ, সো তে মম্মানি ছেচ্ছতি [ছিজ্জতি (ক.)].

১০৬. ৰড্ঢতামেৰ [ৰদ্ধিতমেৰ (ক.)] নিগ্রোধো, পতিট্ঠস্স ভৰামহং;

যথা পিতা চ মাতা চ [পিতা ৰা মাতা ৰা (পী.), মাতা ৰা পিতা ৰা (ক.)], এৰং মে সো ভৰিস্সতি.

১০৭. যং ত্ৰং অঙ্কস্মিং ৰড্ঢেসি, খীররুক্খং ভযানকং;

আমন্ত খো তং গচ্ছাম, ৰুড্ঢি মস্স ন রুচ্চতি.

১০৮. ইদানি খো মং ভাযেতি, মহানেরুনিদস্সনং;

হংসস্স অনভিঞ্ঞায, মহা মে ভযমাগতং.

১০৯. ন তস্স ৰুড্ঢি কুসলপ্পসত্থা, যো ৰড্ঢমানো ঘসতে পতিট্ঠং;

তস্সূপরোধং পরিসঙ্কমানো, পতারযী মূলৰধায ধীরোতি.

পলাসজাতকং দসমং.

ৰণ্ণারোহৰগ্গো দুতিযো [ইমস্সুদ্দানং ততিযৰগ্গপরিযোসানে ভৰিস্সতি].