৩. কুটিদূসকৰগ্গো

৩২১. কুটিদূসকজাতকং (৪-৩-১)

৮১. মনুস্সস্সেৰ তে সীসং, হত্থপাদা চ ৰানর;

অথ কেন নু ৰণ্ণেন, অগারং তে ন ৰিজ্জতি.

৮২. মনুস্সস্সেৰ মে সীসং, হত্থপাদা চ সিঙ্গিল [সিঙ্গাল (ক.), পিঙ্গল (টীকা)];

যাহু সেট্ঠা মনুস্সেসু, সা মে পঞ্ঞা ন ৰিজ্জতি.

৮৩. অনৰট্ঠিতচিত্তস্স, লহুচিত্তস্স দুব্ভিনো [দূভিনো (পী.)];

নিচ্চং অদ্ধুৰসীলস্স, সুখভাৰো [সুচিভাৰো (সী.), সুখভাগো (?)] ন ৰিজ্জতি.

৮৪. সো করস্সু আনুভাৰং, ৰীতিৰত্তস্সু সীলিযং;

সীতৰাতপরিত্তাণং, করস্সু কুটৰং [কুটিকং (সী. স্যা.)] কপীতি.

কুটিদূসক [সিঙ্গালসকুণ (ক.)] জাতকং পঠমং.

৩২২. দুদ্দুভজাতকং (৪-৩-২)

৮৫. দুদ্দুভাযতি [দদ্দভাযতি (সী. পী.)] ভদ্দন্তে, যস্মিং দেসে ৰসামহং;

অহম্পেতং ন জানামি, কিমেতং দুদ্দুভাযতি.

৮৬. বেলুৰং পতিতং সুত্ৰা, দুদ্দুভন্তি [দদ্দভন্তি (সী.)] সসো জৰি;

সসস্স ৰচনং সুত্ৰা, সন্তত্তা মিগৰাহিনী.

৮৭. অপ্পত্ৰা পদৰিঞ্ঞাণং, পরঘোসানুসারিনো;

পনাদপরমা বালা, তে হোন্তি পরপত্তিযা.

৮৮. যে চ সীলেন সম্পন্না, পঞ্ঞাযূপসমে রতা;

আরকা ৰিরতা ধীরা, ন হোন্তি পরপত্তিযাতি.

দুদ্দুভজাতকং [দদ্দভজাতকং (সী. পী.)] দুতিযং.

৩২৩. ব্রহ্মদত্তজাতকং (৪-৩-৩)

৮৯. দ্ৰযং যাচনকো রাজ, ব্রহ্মদত্ত নিগচ্ছতি;

অলাভং ধনলাভং ৰা, এৰং ধম্মা হি যাচনা.

৯০. যাচনং রোদনং আহু, পঞ্চালানং রথেসভ;

যো যাচনং পচ্চক্খাতি, তমাহু পটিরোদনং.

৯১. মা মদ্দসংসু রোদন্তং, পঞ্চালা সুসমাগতা;

তুৰং ৰা পটিরোদন্তং, তস্মা ইচ্ছামহং রহো.

৯২. দদামি তে ব্রাহ্মণ রোহিণীনং, গৰং সহস্সং সহ পুঙ্গৰেন;

অরিযো হি অরিযস্স কথং ন দজ্জা [দজ্জে (সী.), দজ্জং (?)], সুত্ৰান গাথা তৰ ধম্মযুত্তাতি.

ব্রহ্মদত্তজাতকং ততিযং.

৩২৪. চম্মসাটকজাতকং (৪-৩-৪)

৯৩. কল্যাণরূপো ৰতযং চতুপ্পদো, সুভদ্দকো চেৰ সুপেসলো চ;

যো ব্রাহ্মণং জাতিমন্তূপপন্নং, অপচাযতি মেণ্ডৰরো যসস্সী.

৯৪. মা ব্রাহ্মণ ইত্তরদস্সনেন, ৰিস্সাসমাপজ্জি চতুপ্পদস্স;

দল়্হপ্পহারং অভিকঙ্খমানো [অভিকত্তুকামো (স্যা.)], অৰসক্কতী দস্সতি সুপ্পহারং.

৯৫. ঊরুট্ঠি [ঊরট্ঠি (সী.)] ভগ্গং পৰট্টিতো [পতিতো (সী. স্যা.)] খারিভারো, সব্বঞ্চ ভণ্ডং ব্রাহ্মণস্স [ব্রাহ্মণস্সীধ (ক. সী. পী.), ব্রাহ্মণস্সেৰ (ক. সী. স্যা. ক.)] ভিন্নং;

উভোপি বাহা পগ্গয্হ [পগ্গয্যেৰ (স্যা.), পগ্গহীয (?)] কন্দতি [বাহা পগ্গয্য কন্দতি (পী. ক.)], অভিধাৰথ হঞ্ঞতে ব্রহ্মচারী.

৯৬. এৰং সো নিহতো সেতি, যো অপূজং পসংসতি [নমস্সতি (পী.)];

যথাহমজ্জ পহতো, হতো মেণ্ডেন দুম্মতীতি.

চম্মসাটকজাতকং চতুত্থং.

৩২৫. গোধরাজজাতকং (৪-৩-৫)

৯৭. সমণং তং মঞ্ঞমানো, উপগচ্ছিমসঞ্ঞতং;

সো মং দণ্ডেন পাহাসি, যথা অস্সমণো তথা.

৯৮. কিং তে জটাহি দুম্মেধ, কিং তে অজিনসাটিযা;

অব্ভন্তরং তে গহনং, বাহিরং পরিমজ্জসি.

৯৯. এহি গোধ নিৰত্তস্সু, ভুঞ্জ সালীনমোদনং;

তেলং লোণঞ্চ মে অত্থি, পহূতং ময্হ পিপ্ফলি.

১০০. এস ভিয্যো পৰেক্খামি, ৰম্মিকং সতপোরিসং;

তেলং লোণঞ্চ কিত্তেসি [কিন্তেসি (স্যা. পী.)], অহিতং ময্হ পিপ্ফলীতি.

গোধরাজজাতকং পঞ্চমং.

৩২৬. কক্কারুজাতকং (৪-৩-৬)

১০১. কাযেন যো নাৰহরে, ৰাচায ন মুসা ভণে;

যসো লদ্ধা ন মজ্জেয্য, স ৰে কক্কারুমরহতি.

১০২. ধম্মেন ৰিত্তমেসেয্য, ন নিকত্যা ধনং হরে;

ভোগে লদ্ধা ন মজ্জেয্য, স ৰে কক্কারুমরহতি.

১০৩. যস্স চিত্তং অহালিদ্দং, সদ্ধা চ অৰিরাগিনী;

একো সাদুং ন ভুঞ্জেয্য, স ৰে কক্কারুমরহতি.

১০৪. সম্মুখা ৰা তিরোক্খা ৰা [পরোক্খা ৰা (পী.), পরম্মুখা (ক.)], যো সন্তে ন পরিভাসতি;

যথাৰাদী তথাকারী, স ৰে কক্কারুমরহতীতি.

কক্কারুজাতকং ছট্ঠং.

৩২৭. কাকৰতীজাতকং (৪-৩-৭)

১০৫. ৰাতি চাযং [ৰাযং (ক.)] ততো গন্ধো, যত্থ মে ৰসতী পিযা;

দূরে ইতো হি কাকৰতী [কাকাতী (সী.), কাকাতি (স্যা. পী.)], যত্থ মে নিরতো মনো.

১০৬. কথং সমুদ্দমতরী, কথং অতরি কেপুকং [কেবুকং (সী. পী.)];

কথং সত্ত সমুদ্দানি, কথং সিম্বলিমারুহি.

১০৭. তযা সমুদ্দমতরিং, তযা অতরি কেপুকং [কেবুকং (সী. পী.)];

তযা সত্ত সমুদ্দানি, তযা সিম্বলিমারুহিং.

১০৮. ধিরত্থুমং মহাকাযং, ধিরত্থুমং অচেতনং;

যত্থ জাযাযহং জারং, আৰহামি ৰহামি চাতি.

কাকৰতীজাতকং সত্তমং.

৩২৮. অননুসোচিযজাতকং (৪-৩-৮)

১০৯. বহূনং ৰিজ্জতী ভোতী, তেহি মে কিং ভৰিস্সতি;

তস্মা এতং ন সোচামি, পিযং সম্মিল্লহাসিনিং.

১১০. তং তং চে অনুসোচেয্য, যং যং তস্স ন ৰিজ্জতি;

অত্তানমনুসোচেয্য, সদা মচ্চুৰসং পতং.

১১১. ন হেৰ ঠিতং নাসীনং, ন সযানং ন পদ্ধগুং [পত্থগুং (স্যা.)];

যাৰ ব্যাতি নিমিসতি, তত্রাপি রসতী [সরতী (সী. স্যা. পী.)] ৰযো.

১১২. তত্থত্তনি ৰতপ্পদ্ধে [ৰত পন্থে (স্যা.), ৰত বন্ধে (ক.) ৰত + প-অদ্ধে = ৰতপ্পদ্ধে], ৰিনাভাৰে অসংসযে;

ভূতং সেসং দযিতব্বং, ৰীতং অননুসোচিযন্তি [চৰিতং নানুসোচিযন্তি (স্যা.), মতন্তং নানুসোচিযং (ক.)].

অননুসোচিযজাতকং অট্ঠমং.

৩২৯. কাল়বাহুজাতকং (৪-৩-৯)

১১৩. যং অন্নপানস্স পুরে লভাম, তং দানি সাখমিগমেৰ গচ্ছতি;

গচ্ছাম দানি ৰনমেৰ রাধ, অসক্কতা চস্ম ধনঞ্জযায [ধনঞ্চযায (ক.)].

১১৪. লাভো অলাভো যসো অযসো চ, নিন্দা পসংসা চ সুখঞ্চ দুক্খং;

এতে অনিচ্চা মনুজেসু ধম্মা, মা সোচি কিং সোচসি পোট্ঠপাদ.

১১৫. অদ্ধা তুৰং পণ্ডিতকোসি রাধ, জানাসি অত্থানি অনাগতানি;

কথং নু সাখামিগং দক্খিসাম [দক্খিযাম (ক.), দক্খাম (স্যা.)], নিদ্ধাৰিতং [নিদ্ধাপিতং (সী. স্যা.), নিব্বাপিতং (পী.), নিচ্ছদং (ক.)] রাজকুলতোৰ জম্মং.

১১৬. চালেতি কণ্ণং ভকুটিং করোতি, মুহুং মুহুং ভাযযতে [ভাযতে (স্যা.), ভাযাপতে (ক.)] কুমারে;

সযমেৰ তং কাহতি কাল়বাহু, যেনারকা ঠস্সতি অন্নপানাতি.

কাল়বাহুজাতকং নৰমং.

৩৩০. সীলৰীমংসজাতকং (৪-৩-১০)

১১৭. সীলং কিরেৰ কল্যাণং, সীলং লোকে অনুত্তরং;

পস্স ঘোরৰিসো নাগো, সীলৰাতি ন হঞ্ঞতি.

১১৮. যাৰদেৰস্সহূ কিঞ্চি, তাৰদেৰ অখাদিসুং;

সঙ্গম্ম কুললা লোকে, ন হিংসন্তি অকিঞ্চনং.

১১৯. সুখং নিরাসা সুপতি, আসা ফলৰতী সুখা;

আসং নিরাসং কত্ৰান, সুখং সুপতি পিঙ্গলা.

১২০. ন সমাধিপরো অত্থি, অস্মিং লোকে পরম্হি চ;

ন পরং নাপি অত্তানং, ৰিহিংসতি সমাহিতোতি.

সীলৰীমংসজাতকং দসমং.

কুটিদূসকৰগ্গো ততিযো.

তস্সুদ্দানং –

সমনুস্স -সদুদ্দুভ-যাচনকো, অথ মেণ্ডৰরুত্তম-গোধৰরো;

অথ কাযসকেপুক ভোতীৰরো, অথ রাধসুসীলৰরেন দসাতি.