২. পদুমৰগ্গো

২৬১. পদুমজাতকং (৩-২-১)

৩১. যথা কেসা চ মস্সূ চ, ছিন্নং ছিন্নং ৰিরূহতি;

এৰং রূহতু তে নাসা, পদুমং দেহি যাচিতো.

৩২. যথা সারদিকং বীজং, খেত্তে ৰুত্তং ৰিরূহতি;

এৰং রূহতু তে নাসা, পদুমং দেহি যাচিতো.

৩৩. উভোপি পলপন্তেতে [ৰিলপন্তেতে (স্যা. ক.)], অপি পদ্মানি দস্সতি;

ৰজ্জুং ৰা তে ন ৰা ৰজ্জুং, নত্থি নাসায রূহনা;

দেহি সম্ম পদুমানি, অহং যাচামি যাচিতোতি.

পদুমজাতকং পঠমং.

২৬২. মুদুপাণিজাতকং (৩-২-২)

৩৪. পাণি চে মুদুকো চস্স, নাগো চস্স সুকারিতো;

অন্ধকারো চ ৰস্সেয্য, অথ নূন তদা সিযা.

৩৫. অনলা মুদুসম্ভাসা, দুপ্পূরা তা [দুপ্পূরত্তা (ক.)] নদীসমা;

সীদন্তি নং ৰিদিত্ৰান, আরকা পরিৰজ্জযে.

৩৬. যং এতা উপসেৰন্তি, ছন্দসা ৰা ধনেন ৰা;

জাতৰেদোৰ সং ঠানং, খিপ্পং অনুদহন্তি নন্তি.

মুদুপাণিজাতকং দুতিযং.

২৬৩. চূল়পলোভনজাতকং (৩-২-৩)

৩৭. অভিজ্জমানে ৰারিস্মিং, সযং [অযং (ক.)] আগম্ম ইদ্ধিযা;

মিস্সীভাৰিত্থিযা গন্ত্ৰা, সংসীদসি [সংসীদতি (ক.)] মহণ্ণৰে.

৩৮. আৰট্টনী মহামাযা, ব্রহ্মচরিযৰিকোপনা;

সীদন্তি নং ৰিদিত্ৰান, আরকা পরিৰজ্জযে.

৩৯. যং এতা উপসেৰন্তি, ছন্দসা ৰা ধনেন ৰা;

জাতৰেদোৰ সং ঠানং, খিপ্পং অনুদহন্তি নন্তি.

চূল়পলোভন [চুল্লপলোভন (সী. স্যা. পী.)] জাতকং ততিযং.

২৬৪. মহাপনাদজাতকং (৩-২-৪)

৪০. পনাদো নাম সো রাজা, যস্স যূপো সুৰণ্ণযো;

তিরিযং সোল়সুব্বেধো [সোল়সপব্বেধো (সী. পী.)], উদ্ধমাহু [উচ্চমাহু (সী. স্যা. পী.)] সহস্সধা.

৪১. সহস্সকণ্ডো সতগেণ্ডু [সতভেদো (সী. পী.), সতভেণ্ডু (সী. নিস্সয)], ধজাসু হরিতামযো;

অনচ্চুং তত্থ গন্ধব্বা, ছ সহস্সানি সত্তধা.

৪২. এৰমেতং [এৰমেৰ (ক.)] তদা আসি, যথা ভাসসি ভদ্দজি;

সক্কো অহং তদা আসিং, ৰেয্যাৰচ্চকরো তৰাতি.

মহাপনাদজাতকং চতুত্থং.

২৬৫. খুরপ্পজাতকং (৩-২-৫)

৪৩. দিস্ৰা খুরপ্পে ধনুৰেগনুন্নে, খগ্গে গহীতে তিখিণে তেলধোতে;

তস্মিং ভযস্মিং মরণে ৰিযূল়্হে, কস্মা নু তে নাহু ছম্ভিতত্তং.

৪৪. দিস্ৰা খুরপ্পে ধনুৰেগনুন্নে, খগ্গে গহীতে তিখিণে তেলধোতে;

তস্মিং ভযস্মিং মরণে ৰিযূল়্হে, ৰেদং অলত্থং ৰিপুলং উল়ারং.

৪৫. সো ৰেদজাতো অজ্ঝভৰিং অমিত্তে, পুব্বেৰ মে জীৰিতমাসি চত্তং;

ন হি জীৰিতে আলযং কুব্বমানো, সূরো কযিরা সূরকিচ্চং কদাচীতি.

খুরপ্পজাতকং পঞ্চমং.

২৬৬. ৰাতগ্গসিন্ধৰজাতকং (৩-২-৬)

৪৬. যেনাসি কিসিযা পণ্ডু, যেন ভত্তং ন রুচ্চতি;

অযং সো আগতো ভত্তা [তাতো (সী. স্যা. পী.)], কস্মা দানি পলাযসি.

৪৭. সচে [ন খো (স্যা. ক.)] পনাদিকেনেৰ, সন্থৰো নাম জাযতি;

যসো হাযতি ইত্থীনং, তস্মা তাত পলাযহং [পলাযিহং (স্যা.), পলাযিতং (ক.)].

৪৮. যস্সস্সিনং কুলে জাতং, আগতং যা ন ইচ্ছতি;

সোচতি চিররত্তায, ৰাতগ্গমিৰ ভদ্দলীতি [কুন্দলীতি (সী. পী.), গদ্রভীতি (স্যা.)].

ৰাতগ্গসিন্ধৰজাতকং ছট্ঠং.

২৬৭. কক্কটকজাতকং (৩-২-৭)

৪৯. সিঙ্গীমিগো আযতচক্খুনেত্তো, অট্ঠিত্তচো ৰারিসযো অলোমো;

তেনাভিভূতো কপণং রুদামি, মা হেৰ মং পাণসমং জহেয্য [জহেয্যা (পী.) জহা’য্যে (?)].

৫০. অয্য ন তং জহিস্সামি, কুঞ্জরং সট্ঠিহাযনং [কুঞ্জর সট্ঠিহাযন (সী. পী.)];

পথব্যা চাতুরন্তায, সুপ্পিযো হোসি মে তুৰং.

৫১. যে কুল়ীরা সমুদ্দস্মিং, গঙ্গায যমুনায [নম্মদায (সী. পী.)] চ;

তেসং ত্ৰং ৰারিজো সেট্ঠো, মুঞ্চ রোদন্তিযা পতিন্তি.

কক্কটক [কুল়ীর (ক.)] জাতকং সত্তমং.

২৬৮. আরামদূসকজাতকং (৩-২-৮)

৫২. যো ৰে সব্বসমেতানং, অহুৰা সেট্ঠসম্মতো;

তস্সাযং এদিসী পঞ্ঞা, কিমেৰ ইতরা পজা.

৫৩. এৰমেৰ তুৰং ব্রহ্মে, অনঞ্ঞায ৰিনিন্দসি;

কথং মূলং অদিস্ৰান [কথংহি মূলং অদিত্ৰা (স্যা. পী.)], রুক্খং জঞ্ঞা পতিট্ঠিতং.

৫৪. নাহং তুম্হে ৰিনিন্দামি, যে চঞ্ঞে ৰানরা ৰনে;

ৰিস্সসেনোৰ গারয্হো, যস্সত্থা রুক্খরোপকাতি.

আরামদূসকজাতকং অট্ঠমং.

২৬৯. সুজাতজাতকং (৩-২-৯)

৫৫. ন হি ৰণ্ণেন সম্পন্না, মঞ্জুকা পিযদস্সনা;

খরৰাচা পিযা হোতি, অস্মিং লোকে পরম্হি চ.

৫৬. ননু পস্সসিমং কাল়িং, দুব্বণ্ণং তিলকাহতং;

কোকিলং সণ্হৰাচেন, বহূনং পাণিনং পিযং.

৫৭. তস্মা সখিলৰাচস্স, মন্তভাণী অনুদ্ধতো;

অত্থং ধম্মঞ্চ দীপেতি, মধুরং তস্স ভাসিতন্তি.

সুজাতজাতকং নৰমং.

২৭০. উলূকজাতকং (৩-২-১০)

৫৮. সব্বেহি কির ঞাতীহি, কোসিযো ইস্সরো কতো;

সচে ঞাতীহি অনুঞ্ঞাতো [ঞাতীহনুঞ্ঞাতো (সী. পী.)], ভণেয্যাহং একৰাচিকং.

৫৯. ভণ সম্ম অনুঞ্ঞাতো, অত্থং ধম্মঞ্চ কেৰলং;

সন্তি হি দহরা পক্খী, পঞ্ঞৰন্তো জুতিন্ধরা.

৬০. ন মে রুচ্চতি ভদ্দং ৰো [ভদন্তে (ক.)], উলূকস্সাভিসেচনং;

অক্কুদ্ধস্স মুখং পস্স, কথং কুদ্ধো করিস্সতীতি.

উলূকজাতকং দসমং.

পদুমৰগ্গো দুতিযো.

তস্সুদ্দানং –

পদুমুত্তম নাগসিরিৰ্হযনো, স-মহণ্ণৰ যূপ খুরপ্পৰরো;

অথ ভদ্দলী কুঞ্জর রুক্খ পুন, খরৰাচ উলূকৰরেন দসাতি.