৩. উদপানৰগ্গো

২৭১. উদপানদূসকজাতকং (৩-৩-১)

৬১. আরঞ্ঞিকস্স ইসিনো, চিররত্তং তপস্সিনো;

কিচ্ছাকতং উদপানং, কথং সম্ম অৰাহসি [অৰাহযি (সী. পী.), অপাহসি (স্যা.)].

৬২. এস ধম্মো সিঙ্গালানং, যং পিত্ৰা ওহদামসে;

পিতুপিতামহং ধম্মো, ন তং [ন নং (সী. পী.)] উজ্ঝাতুমরহসি.

৬৩. যেসং ৰো এদিসো ধম্মো, অধম্মো পন কীদিসো;

মা ৰো ধম্মং অধম্মং ৰা, অদ্দসাম কুদাচনন্তি.

উদপানদূসকজাতকং পঠমং.

২৭২. ব্যগ্ঘজাতকং (৩-৩-২)

৬৪. যেন মিত্তেন সংসগ্গা, যোগক্খেমো ৰিহিয্যতি;

পুব্বেৰজ্ঝাভৰং তস্স, রুক্খে অক্খীৰ পণ্ডিতো.

৬৫. যেন মিত্তেন সংসগ্গা, যোগক্খেমো পৰড্ঢতি;

করেয্যত্তসমং ৰুত্তিং, সব্বকিচ্চেসু পণ্ডিতো.

৬৬. এথ ব্যগ্ঘা নিৰত্তৰ্হো, পচ্চুপেথ [পচ্চমেথ (সী. পী.)] মহাৰনং;

মা ৰনং ছিন্দি নিব্যগ্ঘং, ব্যগ্ঘা মাহেসু নিব্বনাতি.

ব্যগ্ঘজাতকং দুতিযং.

২৭৩. কচ্ছপজাতকং (৩-৩-৩)

৬৭. কো নু উদ্ধিতভত্তোৰ [উদ্দিতভত্তোৰ (সী.), ৰড্ঢিতভত্তোৰ (স্যা.)], পূরহত্থোৰ ব্রাহ্মণো;

কহং নু ভিক্খং অচরি, কং সদ্ধং উপসঙ্কমি.

৬৮. অহং কপিস্মি দুম্মেধো, অনামাসানি আমসিং;

ত্ৰং মং মোচয ভদ্দন্তে, মুত্তো গচ্ছেয্য পব্বতং.

৬৯. কচ্ছপা কস্সপা হোন্তি, কোণ্ডঞ্ঞা হোন্তি মক্কটা;

মুঞ্চ কস্সপ কোণ্ডঞ্ঞং, কতং মেথুনকং তযাতি.

কচ্ছপজাতকং ততিযং.

২৭৪. লোলজাতকং (৩-৩-৪)

৭০. কাযং বলাকা সিখিনী, চোরী লঙ্ঘিপিতামহা;

ওরং বলাকে আগচ্ছ, চণ্ডো মে ৰাযসো সখা.

৭১. নাহং বলাকা সিখিনী, অহং লোলোস্মি ৰাযসো;

অকত্ৰা ৰচনং তুয্হং, পস্স লূনোস্মি আগতো.

৭২. পুনপাপজ্জসী সম্ম, সীলঞ্হি তৰ তাদিসং;

ন হি মানুসকা ভোগা, সুভুঞ্জা হোন্তি পক্খিনাতি.

লোলজাতকং চতুত্থং.

২৭৫. রুচিরজাতকং (৩-৩-৫)

৭৩. কাযং বলাকা রুচিরা, কাকনীল়স্মিমচ্ছতি;

চণ্ডো কাকো সখা ময্হং, যস্স [তস্স (সী. পী.)] চেতং কুলাৰকং.

৭৪. ননু মং সম্ম জানাসি, দিজ সামাকভোজন;

অকত্ৰা ৰচনং তুয্হং, পস্স লূনোস্মি আগতো.

৭৫. পুনপাপজ্জসী সম্ম, সীলঞ্হি তৰ তাদিসং;

ন হি মানুসকা ভোগা, সুভুঞ্জা হোন্তি পক্খিনাতি.

রুচিরজাতকং পঞ্চমং.

২৭৬. কুরুধম্মজাতকং (৩-৩-৬)

৭৬. তৰ সদ্ধঞ্চ সীলঞ্চ, ৰিদিত্ৰান জনাধিপ;

ৰণ্ণং অঞ্জনৰণ্ণেন, কালিঙ্গস্মিং নিমিম্হসে [ৰিনিম্হসে (স্যা.), ৰনিম্হসে (ক.)].

৭৭. অন্নভচ্চা চভচ্চা চ, যোধ উদ্দিস্স গচ্ছতি;

সব্বে তে অপ্পটিক্খিপ্পা, পুব্বাচরিযৰচো ইদং.

৭৮. দদামি ৰো ব্রাহ্মণা নাগমেতং, রাজারহং রাজভোগ্গং যসস্সিনং;

অলঙ্কতং হেমজালাভিছন্নং, সসারথিং গচ্ছথ যেন কামন্তি.

কুরুধম্মজাতকং [কুরুধম্মজাতকং (সী. স্যা. পী.)] ছট্ঠং.

২৭৭. রোমকজাতকং (৩-৩-৭)

৭৯. ৰস্সানি পঞ্ঞাস সমাধিকানি, ৰসিম্হ সেলস্স গুহায রোমক;

অসঙ্কমানা অভিনিব্বুতত্তা [অভিনিব্বুতচিত্তা (স্যা. ক.)], হত্থত্ত [হত্থত্থ (স্যা.)] মাযন্তি মমণ্ডজা পুরে.

৮০. তে দানি ৰক্কঙ্গ কিমত্থমুস্সুকা, ভজন্তি অঞ্ঞং গিরিকন্দরং দিজা;

ন নূন মঞ্ঞন্তি মমং যথা পুরে, চিরপ্পৰুত্থা অথ ৰা ন তে ইমে.

৮১. জানাম তং ন মযং সম্পমূল়্হা [ন ময’মস্ম মূল়্হা (সী. পী.)], সোযেৰ ত্ৰং তে মযমস্ম নাঞ্ঞে;

চিত্তঞ্চ তে অস্মিং জনে পদুট্ঠং, আজীৰিকা [আজীৰক (সী. স্যা.), আজীৰিক (পী.)] তেন তমুত্তসামাতি.

রোমকজাতকং সত্তমং.

২৭৮. মহিংসরাজজাতকং (৩-৩-৮)

৮২. কিমত্থ [কমত্থ (সী. পী.)] মভিসন্ধায, লহুচিত্তস্স দুব্ভিনো [দূভিনো (সী. পী.)];

সব্বকামদদস্সেৰ [দুহস্সেৰ (সী. স্যা. পী.), রহস্সেৰ (ক.)], ইমং দুক্খং তিতিক্খসি.

৮৩. সিঙ্গেন নিহনাহেতং, পদসা চ অধিট্ঠহ;

ভিয্যো [ভীযো (সী.)] বালা পকুজ্ঝেয্যুং, নো চস্স পটিসেধকো.

৮৪. মমেৰাযং মঞ্ঞমানো, অঞ্ঞেপেৰং [অঞ্ঞম্পেৰং (সী. স্যা. পী.)] করিস্সতি;

তে নং তত্থ ৰধিস্সন্তি, সা মে মুত্তি ভৰিস্সতীতি.

মহিংসরাজজাতকং [মহিসজাতকং (সী. স্যা. পী.)] অট্ঠমং.

২৭৯. সতপত্তজাতকং (৩-৩-৯)

৮৫. যথা মাণৰকো পন্থে, সিঙ্গালিং ৰনগোচরিং;

অত্থকামং পৰেদেন্তিং [পৰদন্তিং (পী.)], অনত্থকামাতি মঞ্ঞতি;

অনত্থকামং সতপত্তং, অত্থকামোতি মঞ্ঞতি.

৮৬. এৰমেৰ ইধেকচ্চো, পুগ্গলো হোতি তাদিসো;

হিতেহি ৰচনং ৰুত্তো, পটিগণ্হাতি ৰামতো.

৮৭. যে চ খো নং পসংসন্তি, ভযা উক্কংসযন্তি ৰা [চ (সী. পী.)];

তঞ্হি সো মঞ্ঞতে মিত্তং, সতপত্তংৰ মাণৰোতি.

সতপত্তজাতকং নৰমং.

২৮০. পুটদূসকজাতকং (৩-৩-১০)

৮৮. অদ্ধা হি নূন মিগরাজা, পুটকম্মস্স কোৰিদো;

তথা হি পুটং দূসেতি, অঞ্ঞং নূন করিস্সতি.

৮৯. ন মে মাতা ৰা পিতা ৰা, পুটকম্মস্স কোৰিদো;

কতং কতং খো দূসেম, এৰং ধম্মমিদং কুলং.

৯০. যেসং ৰো এদিসো ধম্মো, অধম্মো পন কীদিসো;

মা ৰো ধম্মং অধম্মং ৰা, অদ্দসাম কুদাচনন্তি.

পুটদূসকজাতকং দসমং.

উদপানৰগ্গো [অরঞ্ঞৰগ্গো (সী. পী. ক.)] ততিযো.

তস্সুদ্দানং –

উদপানৰরং ৰনব্যগ্ঘ কপি, সিখিনী চ বলাক রুচিরৰরো;

সুজনাধিপরোমকদূস পুন, সতপত্তৰরো পুটকম্ম দসাতি.