৫২৮. মহাবোধিজাতকং (৩)

১২৪. ‘‘কিং নু দণ্ডং কিমজিনং, কিং ছত্তং কিমুপাহনং;

কিমঙ্কুসঞ্চ পত্তঞ্চ, সঙ্ঘাটিঞ্চাপি ব্রাহ্মণ;

তরমানরূপোহাসি [গণ্হাসি (সী. স্যা. পী.)], কিং নু পত্থযসে দিসং’’.

১২৫. ‘‘দ্ৰাদসেতানি ৰস্সানি, ৰুসিতানি তৰন্তিকে;

নাভিজানামি সোণেন, পিঙ্গলেনাভিকূজিতং.

১২৬. ‘‘স্ৰাযং দিত্তোৰ নদতি, সুক্কদাঠং ৰিদংসযং;

তৰ সুত্ৰা সভরিযস্স, ৰীতসদ্ধস্স মং পতি’’.

১২৭. ‘‘অহু এস কতো দোসো, যথা ভাসসি ব্রাহ্মণ;

এস ভিয্যো পসীদামি, ৰস ব্রাহ্মণ মাগমা’’.

১২৮. ‘‘সব্বসেতো পুরে আসি, ততোপি সবলো অহু;

সব্বলোহিতকো দানি, কালো পক্কমিতুং মম.

১২৯. ‘‘অব্ভন্তরং পুরে আসি, ততো মজ্ঝে ততো বহি;

পুরা নিদ্ধমনা হোতি, সযমেৰ ৰজামহং.

১৩০. ‘‘ৰীতসদ্ধং ন সেৰেয্য, উদপানংৰনোদকং;

সচেপি নং অনুখণে, ৰারি কদ্দমগন্ধিকং.

১৩১. ‘‘পসন্নমেৰ সেৰেয্য, অপ্পসন্নং ৰিৰজ্জযে;

পসন্নং পযিরুপাসেয্য, রহদং ৰুদকত্থিকো.

১৩২. ‘‘ভজে ভজন্তং পুরিসং, অভজন্তং ন ভজ্জযে [ভাজযে (পী.)];

অসপ্পুরিসধম্মো সো, যো ভজন্তং ন ভজ্জতি [ভাজতি (পী.)].

১৩৩. ‘‘যো ভজন্তং ন ভজতি, সেৰমানং ন সেৰতি;

স ৰে মনুস্সপাপিট্ঠো, মিগো সাখস্সিতো যথা.

১৩৪. ‘‘অচ্চাভিক্খণসংসগ্গা, অসমোসরণেন চ;

এতেন মিত্তা জীরন্তি, অকালে যাচনায চ.

১৩৫. ‘‘তস্মা নাভিক্খণং গচ্ছে, ন চ গচ্ছে চিরাচিরং;

কালেন যাচং যাচেয্য, এৰং মিত্তা ন জীযরে [জীররে (স্যা. পী.)].

১৩৬. ‘‘অতিচিরং নিৰাসেন, পিযো ভৰতি অপ্পিযো;

আমন্ত খো তং গচ্ছাম, পুরা তে হোম অপ্পিযা’’.

১৩৭. ‘‘এৰং চে যাচমানানং, অঞ্জলিং নাৰবুজ্ঝসি;

পরিচারকানং সতং [পরিচারিকানং সত্তানং (সী. স্যা. পী.)], ৰচনং ন করোসি নো;

এৰং তং অভিযাচাম, পুন কযিরাসি পরিযাযং’’.

১৩৮. ‘‘এৰং চে নো ৰিহরতং, অন্তরাযো ন হেস্সতি;

তুয্হং ৰাপি [তুম্হঞ্চাপি (সী.), তুয্হঞ্চাপি (পী.)] মহারাজ, ময্হং ৰা [অম্হং ৰা (সী.), ময্হঞ্চ (পী.)] রট্ঠৰদ্ধন;

অপ্পেৰ নাম পস্সেম, অহোরত্তানমচ্চযে’’.

১৩৯. ‘‘উদীরণা চে সংগত্যা, ভাৰায মনুৰত্ততি;

অকামা অকরণীযং ৰা, করণীযং ৰাপি কুব্বতি;

আকামাকরণীযম্হি, ক্ৰিধ পাপেন লিপ্পতি [লিম্পতি (স্যা. ক.)].

১৪০. ‘‘সো চে অত্থো চ ধম্মো চ, কল্যাণো ন চ পাপকো;

ভোতো চে ৰচনং সচ্চং, সুহতো ৰানরো মযা.

১৪১. ‘‘অত্তনো চে হি ৰাদস্স, অপরাধং ৰিজানিযা [ৰিজানিয (সী. স্যা. পী.)];

ন মং ত্ৰং গরহেয্যাসি, ভোতো ৰাদো হি তাদিসো’’.

১৪২. ‘‘ইস্সরো সব্বলোকস্স, সচে কপ্পেতি জীৰিতং;

ইদ্ধিং [ইদ্ধি (পী. ক.)] ব্যসনভাৰঞ্চ, কম্মং কল্যাণপাপকং;

নিদ্দেসকারী পুরিসো, ইস্সরো তেন লিপ্পতি.

১৪৩. ‘‘সো চে অত্থো চ ধম্মো চ, কল্যাণো ন চ পাপকো;

ভোতো চে ৰচনং সচ্চং, সুহতো ৰানরো মযা.

১৪৪. ‘‘অত্তনো চে হি ৰাদস্স, অপরাধং ৰিজানিযা;

ন মং ত্ৰং গরহেয্যাসি, ভোতো ৰাদো হি তাদিসো’’.

১৪৫. ‘‘সচে পুব্বেকতহেতু, সুখদুক্খং নিগচ্ছতি;

পোরাণকং কতং পাপং, তমেসো মুচ্চতে [মুঞ্চতে (সী. স্যা.)] ইণং;

পোরাণকইণমোক্খো, ক্ৰিধ পাপেন লিপ্পতি.

১৪৬. ‘‘সো চে অত্থো চ ধম্মো চ, কল্যাণো ন চ পাপকো;

ভোতো চে ৰচনং সচ্চং, সুহতো ৰানরো মযা.

১৪৭. ‘‘অত্তনো চে হি ৰাদস্স, অপরাধং ৰিজানিযা;

ন মং ত্ৰং গরহেয্যাসি, ভোতো ৰাদো হি তাদিসো’’.

১৪৮. ‘‘চতুন্নংযেৰুপাদায, রূপং সম্ভোতি পাণিনং;

যতো চ রূপং সম্ভোতি, তত্থেৰানুপগচ্ছতি;

ইধেৰ জীৰতি জীৰো, পেচ্চ পেচ্চ ৰিনস্সতি.

১৪৯. উচ্ছিজ্জতি অযং লোকো, যে বালা যে চ পণ্ডিতা;

উচ্ছিজ্জমানে লোকস্মিং, ক্ৰিধ পাপেন লিপ্পতি.

১৫০. ‘‘সো চে অত্থো চ ধম্মো চ, কল্যাণো ন চ পাপকো;

ভোতো চে ৰচনং সচ্চং, সুহতো ৰানরো মযা.

১৫১. ‘‘অত্তনো চে হি ৰাদস্স, অপরাধং ৰিজানিযা;

ন মং ত্ৰং গরহেয্যাসি, ভোতো ৰাদো হি তাদিসো’’.

১৫২. ‘‘আহু খত্তৰিদা [খত্তৰিধা (সী. স্যা. পী.)] লোকে, বালা পণ্ডিতমানিনো.

মাতরং পিতরং হঞ্ঞে, অথো জেট্ঠম্পি ভাতরং;

হনেয্য পুত্ত [পুত্তে চ (পী.)] দারে চ, অত্থো চে তাদিসো সিযা.

১৫৩. ‘‘যস্স রুক্খস্স ছাযায, নিসীদেয্য সযেয্য ৰা;

ন তস্স সাখং ভঞ্জেয্য, মিত্তদুব্ভো [মিত্তদূভী (পী.)] হি পাপকো.

১৫৪. ‘‘অথ অত্থে সমুপ্পন্নে, সমূলমপি অব্বহে [অব্ভহে (স্যা. ক.)];

অত্থো মে সম্বলেনাপি, সুহতো ৰানরো মযা.

১৫৫. [অযং গাথা সীহল়পোত্থকে নত্থি] ‘‘সো চে অত্থো চ ধম্মো চ, কল্যাণো ন চ পাপকো;

ভোতো চে ৰচনং সচ্চং, সুহতো ৰানরো মযা [অযং গাথা সীহল়পোত্থকে নত্থি].

১৫৬. ‘‘অত্তনো চে হি ৰাদস্স, অপরাধং ৰিজানিযা;

ন মং ত্ৰং গরহেয্যাসি, ভোতো ৰাদো হি তাদিসো.

১৫৭. ‘‘অহেতুৰাদো পুরিসো, যো চ ইস্সরকুত্তিকো;

পুব্বেকতী চ উচ্ছেদী, যো চ খত্তৰিদো নরো.

১৫৮. ‘‘এতে অসপ্পুরিসা লোকে, বালা পণ্ডিতমানিনো;

করেয্য তাদিসো পাপং, অথো অঞ্ঞম্পি কারযে;

অসপ্পুরিসসংসগ্গো, দুক্খন্তো [দুক্কটো (সী.)] কটুকুদ্রযো.

১৫৯. ‘‘উরব্ভরূপেন ৰকস্সু [বকাসু (সী. স্যা.), ৰকাসু (পী.)] পুব্বে, অসংকিতো অজযূথং উপেতি;

হন্ত্ৰা উরণিং অজিকং [অজিযং (সী. স্যা. পী.)] অজঞ্চ, উত্রাসযিত্ৰা [চিত্রাসযিত্ৰা (সী. পী.)] যেন কামং পলেতি.

১৬০. ‘‘তথাৰিধেকে সমণব্রাহ্মণাসে, ছদনং কত্ৰা ৰঞ্চযন্তি মনুস্সে;

অনাসকা থণ্ডিলসেয্যকা চ, রজোজল্লং উক্কুটিকপ্পধানং;

পরিযাযভত্তঞ্চ অপানকত্তা, পাপাচারা অরহন্তো ৰদানা.

১৬১. ‘‘এতে অসপ্পুরিসা লোকে, বালা পণ্ডিতমানিনো;

করেয্য তাদিসো পাপং, অথো অঞ্ঞম্পি কারযে;

অসপ্পুরিসসংসগ্গো, দুক্খন্তো কটুকুদ্রযো.

১৬২. ‘‘যমাহু নত্থি ৰীরিযন্তি, অহেতুঞ্চ পৰদন্তি [হেতুঞ্চ অপৰদন্তি (সী. স্যা. পী.)] যে;

পরকারং অত্তকারঞ্চ, যে তুচ্ছং সমৰণ্ণযুং.

১৬৩. ‘‘এতে অসপ্পুরিসা লোকে, বালা পণ্ডিতমানিনো;

করেয্য তাদিসো পাপং, অথো অঞ্ঞম্পি কারযে;

অসপ্পুরিসসংসগ্গো, দুক্খন্তো কটুকুদ্রযো.

১৬৪. ‘‘সচে হি ৰীরিযং নাস্স, কম্মং কল্যাণপাপকং;

ন ভরে ৰড্ঢকিং রাজা, নপি যন্তানি কারযে.

১৬৫. ‘‘যস্মা চ ৰীরিযং অত্থি, কম্মং কল্যাণপাপকং;

তস্মা যন্তানি কারেতি, রাজা ভরতি ৰড্ঢকিং.

১৬৬. ‘‘যদি ৰস্সসতং দেৰো, ন ৰস্সে ন হিমং পতে;

উচ্ছিজ্জেয্য অযং লোকো, ৰিনস্সেয্য অযং পজা.

১৬৭. ‘‘যস্মা চ ৰস্সতী দেৰো, হিমঞ্চানুফুসাযতি;

তস্মা সস্সানি পচ্চন্তি, রট্ঠঞ্চ পালিতে [পল্লতে (সী. পী.), পোলযতে (স্যা.)] চিরং.

১৬৮. ‘‘গৰং চে তরমানানং, জিম্হং গচ্ছতি পুঙ্গৰো;

সব্বা তা জিম্হং গচ্ছন্তি, নেত্তে জিম্হং [জিম্হ (পী.)] গতে সতি.

১৬৯. ‘‘এৰমেৰ [এৰমেৰং (পী.)] মনুস্সেসু, যো হোতি সেট্ঠসম্মতো;

সো চে অধম্মং চরতি, পগেৰ ইতরা পজা;

সব্বং রট্ঠং দুখং সেতি, রাজা চে হোতি অধম্মিকো.

১৭০. ‘‘গৰং চে তরমানানং, উজুং গচ্ছতি পুঙ্গৰো;

সব্বা গাৰী উজুং যন্তি, নেত্তে উজুং [উজূ (পী.)] গতে সতি.

১৭১. ‘‘এৰমেৰ মনুস্সেসু, যো হোতি সেট্ঠসম্মতো;

সো সচে [চেৰ (সী.), চেপি (ক.)] ধম্মং চরতি, পগেৰ ইতরা পজা;

সব্বং রট্ঠং সুখং সেতি, রাজা চে হোতি ধম্মিকো.

১৭২. ‘‘মহারুক্খস্স ফলিনো, আমং ছিন্দতি যো ফলং;

রসঞ্চস্স ন জানাতি, বীজঞ্চস্স ৰিনস্সতি.

১৭৩. ‘‘মহারুক্খূপমং রট্ঠং, অধম্মেন পসাসতি;

রসঞ্চস্স ন জানাতি, রট্ঠঞ্চস্স ৰিনস্সতি.

১৭৪. ‘‘মহারুক্খস্স ফলিনো, পক্কং ছিন্দতি যো ফলং;

রসঞ্চস্স ৰিজানাতি, বীজঞ্চস্স ন নস্সতি.

১৭৫. ‘‘মহারুক্খূপমং রট্ঠং, ধম্মেন যো পসাসতি;

রসঞ্চস্স ৰিজানাতি, রট্ঠঞ্চস্স ন নস্সতি.

১৭৬. ‘‘যো চ রাজা জনপদং, অধম্মেন পসাসতি;

সব্বোসধীহি সো রাজা, ৰিরুদ্ধো হোতি খত্তিযো.

১৭৭. ‘‘তথেৰ নেগমে হিংসং, যে যুত্তা কযৰিক্কযে;

ওজদানবলীকারে, স কোসেন ৰিরুজ্ঝতি.

১৭৮. ‘‘পহারৰরখেত্তঞ্ঞূ, সঙ্গামে কতনিস্সমে [কতনিযমে (ক.)];

উস্সিতে হিংসযং রাজা, স বলেন ৰিরুজ্ঝতি.

১৭৯. ‘‘তথেৰ ইসযো হিংসং, সঞ্ঞতে [সংযমে (স্যা. ক.)] ব্রহ্মচারিযো [ব্রহ্মচারিনো (সী.)];

অধম্মচারী খত্তিযো, সো সগ্গেন ৰিরুজ্ঝতি.

১৮০. ‘‘যো চ রাজা অধম্মট্ঠো, ভরিযং হন্তি অদূসিকং;

লুদ্দং পসৰতে ঠানং [পাপং (সী.)], পুত্তেহি চ ৰিরুজ্ঝতি.

১৮১. ‘‘ধম্মং চরে জানপদে, নেগমেসু [নিগমেসু (সী.)] বলেসু চ;

ইসযো চ ন হিংসেয্য, পুত্তদারে সমং চরে.

১৮২. ‘‘স তাদিসো ভূমিপতি, রট্ঠপালো অকোধনো;

সপত্তে [সামন্তে (সী. স্যা. পী.)] সম্পকম্পেতি, ইন্দোৰ অসুরাধিপো’’তি.

মহাবোধিজাতকং ততিযং.

পণ্ণাসনিপাতং নিট্ঠিতং.