৫২৭. উম্মাদন্তীজাতকং (২)

৫৭. ‘‘নিৰেসনং কস্স নুদং সুনন্দ, পাকারেন পণ্ডুমযেন গুত্তং;

কা দিস্সতি অগ্গিসিখাৰ দূরে, ৰেহাযসং [ৰেহাসযং (সী. পী.)] পব্বতগ্গেৰ অচ্চি.

৫৮. ‘‘ধীতা ন্ৰযং [নযং (সী. পী.), ন্ৰাযং (স্যা.)] কস্স সুনন্দ হোতি, সুণিসা ন্ৰযং [নযং (সী. পী.), ন্ৰাযং (স্যা.)] কস্স অথোপি ভরিযা;

অক্খাহি মে খিপ্পমিধেৰ পুট্ঠো, অৰাৰটা যদি ৰা অত্থি ভত্তা’’.

৫৯. ‘‘অহঞ্হি জানামি জনিন্দ এতং, মত্যা চ পেত্যা চ অথোপি অস্সা;

তৰেৰ সো পুরিসো ভূমিপাল, রত্তিন্দিৰং অপ্পমত্তো তৰত্থে.

৬০. ‘‘ইদ্ধো চ ফীতো চ সুৰড্ঢিতো [সুবাল়্হিকো (পী.)] চ, অমচ্চো চ তে অঞ্ঞতরো জনিন্দ;

তস্সেসা ভরিযাভিপারকস্স [অহিপারকস্স (সী. পী.), অভিপাদকস্স (ক.)], উম্মাদন্তী [উম্মাদন্তীতি (ক.)] নামধেয্যেন রাজ’’.

৬১. ‘‘অম্ভো অম্ভো নামমিদং ইমিস্সা, মত্যা চ পেত্যা চ কতং সুসাধু;

তদা [তথা (সী. স্যা. পী.)] হি ময্হং অৰলোকযন্তী, উম্মত্তকং উম্মদন্তী অকাসি’’.

৬২. ‘‘যা পুণ্ণমাসে [পুণ্ণমাযে (ক.)] মিগমন্দলোচনা, উপাৰিসি পুণ্ডরীকত্তচঙ্গী;

দ্ৰে পুণ্ণমাযো তদহূ অমঞ্ঞহং, দিস্ৰান পারাৰতরত্তৰাসিনিং.

৬৩. ‘‘অল়ারপম্হেহি সুভেহি ৰগ্গুভি, পলোভযন্তী মং যদা উদিক্খতি;

ৰিজম্ভমানা হরতেৰ মে মনো, জাতা ৰনে কিম্পুরিসীৰ পব্বতে.

৬৪. ‘‘তদা হি ব্রহতী সামা, আমুত্তমণিকুণ্ডলা;

একচ্চৰসনা নারী, মিগী ভন্তাৰুদিক্খতি.

৬৫. ‘‘কদাস্সু মং তম্বনখা সুলোমা, বাহামুদূ চন্দনসারলিত্তা;

ৰট্টঙ্গুলী সন্নতধীরকুত্তিযা, নারী উপঞ্ঞিস্সতি সীসতো সুভা.

৬৬. ‘‘কদাস্সু মং কঞ্চনজালুরচ্ছদা, ধীতা তিরীটিস্স ৰিলগ্গমজ্ঝা;

মুদূহি বাহাহি পলিস্সজিস্সতি, ব্রহাৰনে জাতদুমংৰ মালুৰা.

৬৭. ‘‘কদাস্সু [কদাস্সু মং (স্যা. ক.)] লাখারসরত্তসুচ্ছৰী, বিন্দুত্থনী পুণ্ডরীকত্তচঙ্গী;

মুখং মুখেন উপনামযিস্সতি, সোণ্ডোৰ সোণ্ডস্স সুরায থালং.

৬৮. ‘‘যদাদ্দসং [যথাদ্দসং (পী.)] তং তিট্ঠন্তিং, সব্বভদ্দং [সব্বগত্তং (সী. স্যা. পী.)] মনোরমং;

ততো সকস্স চিত্তস্স, নাৰবোধামি কঞ্চিনং [কিঞ্চিনং (ক.), কিঞ্চনং (পী.)].

৬৯. ‘‘উম্মাদন্তিমহং দট্ঠা [দিট্ঠা (সী. স্যা. পী. ক.)], আমুত্তমণিকুণ্ডলং;

ন সুপামি দিৰারত্তিং, সহস্সংৰ পরাজিতো.

৭০. ‘‘সক্কো চে [চ (সী. পী.)] মে ৰরং দজ্জা, সো চ লব্ভেথ মে ৰরো;

একরত্তং দ্ৰিরত্তং [দিরত্তং (পী.)] ৰা, ভৰেয্যং অভিপারকো;

উম্মাদন্ত্যা রমিত্ৰান, সিৰিরাজা ততো সিযং’’ [সিযা (স্যা. পী.)].

৭১. ‘‘ভূতানি মে ভূতপতী নমস্সতো, আগম্ম যক্খো ইদমেতদব্রৰি;

রঞ্ঞো মনো উম্মদন্ত্যা নিৰিট্ঠো, দদামি তে তং পরিচারযস্সু’’.

৭২. ‘‘পুঞ্ঞা ৰিধংসে অমরো ন চম্হি, জনো চ মে পাপমিদঞ্চ [পাপমিদন্তি (সী. পী.)] জঞ্ঞা;

ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.

৭৩. ‘‘জনিন্দ নাঞ্ঞত্র তযা মযা ৰা, সব্বাপি কম্মস্স কতস্স জঞ্ঞা;

যং তে মযা উম্মদন্তী পদিন্না, ভুসেহি রাজা ৰনথং সজাহি’’.

৭৪. ‘‘যো পাপকং কম্ম করং মনুস্সো, সো মঞ্ঞতি মাযিদ [মাযিধ (ক.)] মঞ্ঞিংসু অঞ্ঞে;

পস্সন্তি ভূতানি করোন্তমেতং, যুত্তা চ যে হোন্তি নরা পথব্যা.

৭৫. ‘‘অঞ্ঞো নু তে কোচি [কোধ (পী.)] নরো পথব্যা, সদ্ধেয্য [সদ্দহেয্য (সী.)] লোকস্মি ন মে পিযাতি;

ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.

৭৬. ‘‘অদ্ধা পিযা ময্হ জনিন্দ এসা, ন সা মমং অপ্পিযা ভূমিপাল;

গচ্ছেৰ ত্ৰং উম্মদন্তিং ভদন্তে, সীহোৰ সেলস্স গুহং উপেতি’’.

৭৭. ‘‘ন পীল়িতা অত্তদুখেন ধীরা, সুখপ্ফলং কম্ম পরিচ্চজন্তি;

সম্মোহিতা ৰাপি সুখেন মত্তা, ন পাপকম্মঞ্চ [পাপকং কম্ম (পী.)] সমাচরন্তি’’.

৭৮. ‘‘তুৰঞ্হি মাতা চ পিতা চ ময্হং, ভত্তা পতী পোসকো দেৰতা চ;

দাসো অহং তুয্হ সপুত্তদারো, যথাসুখং সামি [সিব্ব (সী.), সীৰি (স্যা.)] করোহি কামং’’.

৭৯. ‘‘যো ইস্সরোম্হীতি করোতি পাপং, কত্ৰা চ সো নুত্তসতে [নুত্তপতে (পী.)] পরেসং;

ন তেন সো জীৰতি দীঘমাযু [দীঘমাযুং (সী. স্যা.)], দেৰাপি পাপেন সমেক্খরে নং.

৮০. ‘‘অঞ্ঞাতকং সামিকেহী পদিন্নং, ধম্মে ঠিতা যে পটিচ্ছন্তি দানং;

পটিচ্ছকা দাযকা চাপি তত্থ, সুখপ্ফলঞ্ঞেৰ করোন্তি কম্মং’’.

৮১. ‘‘অঞ্ঞো নু তে কোচি নরো পথব্যা, সদ্ধেয্য লোকস্মি ন মে পিযাতি;

ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.

৮২. ‘‘অদ্ধা পিযা ময্হ জনিন্দ এসা, ন সা মমং অপ্পিযা ভূমিপাল;

যং তে মযা উম্মদন্তী পদিন্না, ভুসেহি রাজা ৰনথং সজাহি’’.

৮৩. ‘‘যো অত্তদুক্খেন পরস্স দুক্খং, সুখেন ৰা অত্তসুখং দহাতি;

যথেৰিদং ময্হ তথা পরেসং, যো [সো (পী.)] এৰং জানাতি [পজানাতি (ক.)] স ৰেদি ধম্মং.

৮৪. ‘‘অঞ্ঞো নু তে কোচি নরো পথব্যা, সদ্ধেয্য লোকস্মি ন মে পিযাতি;

ভুসো চ ত্যস্স মনসো ৰিঘাতো, দত্ৰা পিযং উম্মদন্তিং অদট্ঠা’’.

৮৫. ‘‘জনিন্দ জানাসি পিযা মমেসা, ন সা মমং অপ্পিযা ভূমিপাল;

পিযেন তে দম্মি পিযং জনিন্দ, পিযদাযিনো দেৰ পিযং লভন্তি’’.

৮৬. ‘‘সো নূনাহং ৰধিস্সামি, অত্তানং কামহেতুকং;

ন হি ধম্মং অধম্মেন, অহং ৰধিতুমুস্সহে’’.

৮৭. ‘‘সচে তুৰং ময্হ সতিং [সন্তি (ক.)] জনিন্দ, ন কামযাসি নরৰীর সেট্ঠ;

চজামি নং সব্বজনস্স সিব্যা [সিব্ব (সী. পী.), মজ্ঝে (স্যা.)], মযা পমুত্তং ততো অৰ্হযেসি [অৰ্হযাসি (ক.)] নং’’.

৮৮. ‘‘অদূসিযং চে অভিপারক ত্ৰং, চজাসি কত্তে অহিতায ত্যস্স;

মহা চ তে উপৰাদোপি অস্স, ন চাপি ত্যস্স নগরম্হি পক্খো’’.

৮৯. ‘‘অহং সহিস্সং উপৰাদমেতং, নিন্দং পসংসং গরহঞ্চ সব্বং;

মমেতমাগচ্ছতু ভূমিপাল, যথাসুখং সিৰি [সিব্ব (সী. পী.)] করোহি কামং’’.

৯০. ‘‘যো নেৰ নিন্দং ন পনপ্পসংসং, আদিযতি গরহং নোপি পূজং;

সিরী চ লক্খী চ অপেতি তম্হা, আপো সুৰুট্ঠীৰ যথা থলম্হা’’.

৯১. ‘‘যং কিঞ্চি দুক্খঞ্চ সুখঞ্চ এত্তো, ধম্মাতিসারঞ্চ মনোৰিঘাতং;

উরসা অহং পচ্চুত্তরিস্সামি [পটিচ্ছিস্সামি (সী. স্যা.), পচ্চুপদিস্সামি (পী.)] সব্বং, পথৰী যথা থাৰরানং তসানং’’.

৯২. ‘‘ধম্মাতিসারঞ্চ মনোৰিঘাতং, দুক্খঞ্চ নিচ্ছামি অহং পরেসং;

একোৰিমং হারযিস্সামি ভারং, ধম্মে ঠিতো কিঞ্চি অহাপযন্তো’’.

৯৩. ‘‘সগ্গূপগং পুঞ্ঞকম্মং জনিন্দ, মা মে তুৰং অন্তরাযং অকাসি;

দদামি তে উম্মদন্তিং পসন্নো, রাজাৰ যঞ্ঞে ধনং ব্রাহ্মণানং’’.

৯৪. ‘‘অদ্ধা তুৰং কত্তে হিতেসি ময্হং, সখা মমং উম্মদন্তী তুৰঞ্চ;

নিন্দেয্যু দেৰা পিতরো চ সব্বে, পাপঞ্চ পস্সং অভিসম্পরাযং’’.

৯৫. ‘‘ন হেতধম্মং সিৰিরাজ ৰজ্জুং, সনেগমা জানপদা চ সব্বে;

যং তে মযা উম্মদন্তী পদিন্না, ভুসেহি রাজা ৰনথং সজাহি’’.

৯৬. ‘‘অদ্ধা তুৰং কত্তে হিতেসি ময্হং, সখা মমং উম্মদন্তী তুৰঞ্চ;

সতঞ্চ ধম্মানি সুকিত্তিতানি, সমুদ্দৰেলাৰ দুরচ্চযানি’’.

৯৭. ‘‘আহুনেয্যো মেসি হিতানুকম্পী, ধাতা ৰিধাতা চসি কামপালো;

তযী হুতা রাজ মহপ্ফলা হি [মহপ্ফলা হি মে (পী.)], কামেন মে উম্মদন্তিং পটিচ্ছ’’.

৯৮. ‘‘অদ্ধা হি সব্বং অভিপারক ত্ৰং, ধম্মং অচারী মম কত্তুপুত্ত;

অঞ্ঞো নু তে কো ইধ সোত্থিকত্তা, দ্ৰিপদো নরো অরুণে জীৰলোকে’’.

৯৯. ‘‘তুৰং নু সেট্ঠো ত্ৰমনুত্তরোসি, ত্ৰং ধম্মগূ [ধম্মগুত্তো (সী.)] ধম্মৰিদূ সুমেধো;

সো ধম্মগুত্তো চিরমেৰ জীৰ, ধম্মঞ্চ মে দেসয ধম্মপাল’’.

১০০. ‘‘তদিঙ্ঘ অভিপারক, সুণোহি ৰচনং মম;

ধম্মং তে দেসযিস্সামি, সতং আসেৰিতং অহং.

১০১. ‘‘সাধু ধম্মরুচি রাজা, সাধু পঞ্ঞাণৰা নরো;

সাধু মিত্তানমদ্দুব্ভো, পাপস্সাকরণং সুখং.

১০২. ‘‘অক্কোধনস্স ৰিজিতে, ঠিতধম্মস্স রাজিনো;

সুখং মনুস্সা আসেথ, সীতচ্ছাযায সঙ্ঘরে.

১০৩. ‘‘ন চাহমেতং অভিরোচযামি, কম্মং অসমেক্খকতং অসাধু;

যে ৰাপি ঞত্ৰান সযং করোন্তি, উপমা ইমা ময্হং তুৰং সুণোহি.

১০৪. ‘‘গৰং চে তরমানানং, জিম্হং গচ্ছতি পুঙ্গৰো;

সব্বা তা জিম্হং গচ্ছন্তি, নেত্তে জিম্হং গতে সতি.

১০৫. ‘‘এৰমেৰ [এৰমেৰং (পী.)] মনুস্সেসু, যো হোতি সেট্ঠসম্মতো;

সো চে অধম্মং চরতি, পগেৰ ইতরা পজা;

সব্বং রট্ঠং দুখং সেতি, রাজা চে হোতি অধম্মিকো.

১০৬. ‘‘গৰং চে তরমানানং, উজুং গচ্ছতি পুঙ্গৰো;

সব্বা গাৰী উজুং যন্তি, নেত্তে উজুং গতে সতি.

১০৭. ‘‘এৰমেৰ মনুস্সেসু, যো হোতি সেট্ঠসম্মতো;

সো সচে ধম্মং চরতি, পগেৰ ইতরা পজা;

সব্বং রট্ঠং সুখং সেতি, রাজা চে হোতি ধম্মিকো.

১০৮. ‘‘ন চাপাহং অধম্মেন, অমরত্তমভিপত্থযে;

ইমং ৰা পথৰিং সব্বং, ৰিজেতুং অভিপারক.

১০৯. ‘‘যঞ্হি কিঞ্চি মনুস্সেসু, রতনং ইধ ৰিজ্জতি;

গাৰো দাসো হিরঞ্ঞঞ্চ, ৰত্থিযং হরিচন্দনং.

১১০. ‘‘অস্সিত্থিযো [অস্সিত্থিযো চ (সী.)] রতনং মণিকঞ্চ, যঞ্চাপি মে চন্দসূরিযা অভিপালযন্তি;

ন তস্স হেতু ৰিসমং চরেয্যং, মজ্ঝে সিৰীনং উসভোম্হি জাতো.

১১১. ‘‘নেতা হিতা [নেতাভি তা (সী.)] উগ্গতো রট্ঠপালো, ধম্মং সিৰীনং অপচাযমানো;

সো ধম্মমেৰানুৰিচিন্তযন্তো, তস্মা সকে চিত্তৰসে ন ৰত্তো’’.

১১২. ‘‘অদ্ধা তুৰং মহারাজ, নিচ্চং অব্যসনং সিৰং;

করিস্সসি চিরং রজ্জং, পঞ্ঞা হি তৰ তাদিসী.

১১৩. ‘‘এতং তে অনুমোদাম, যং ধম্মং নপ্পমজ্জসি;

ধম্মং পমজ্জ খত্তিযো, রট্ঠা [ঠানা (সী.)] চৰতি ইস্সরো.

১১৪. ‘‘ধম্মং চর মহারাজ, মাতাপিতূসু খত্তিয;

ইধ ধম্মং চরিত্ৰান, রাজ সগ্গং গমিস্সসি.

১১৫. ‘‘ধম্মং চর মহারাজ, পুত্তদারেসু খত্তিয…পে….

১১৬. ‘‘ধম্মং চর মহারাজ, মিত্তামচ্চেসু খত্তিয…পে….

১১৭. ‘‘ধম্মং চর মহারাজ, ৰাহনেসু বলেসু চ…পে….

১১৮. ‘‘ধম্মং চর মহারাজ, গামেসু নিগমেসু চ…পে….

১১৯. ‘‘ধম্মং চর মহারাজ, রট্ঠেসু জনপদেসু চ…পে….

১২০. ‘‘ধম্মং চর মহারাজ, সমণব্রাহ্মণেসু চ…পে….

১২১. ‘‘ধম্মং চর মহারাজ, মিগপক্খীসু খত্তিয…পে….

১২২. ‘‘ধম্মং চর মহারাজ, ধম্মো চিণ্ণো সুখাৰহো;

ইধ ধম্মং চরিত্ৰান, রাজ সগ্গং গমিস্সসি.

১২৩. ‘‘ধম্মং চর মহারাজ, সইন্দা দেৰা সব্রহ্মকা;

সুচিণ্ণেন দিৰং পত্তা, মা ধম্মং রাজ পামদো’’তি.

উম্মাদন্তীজাতকং দুতিযং.