৫২৪. সঙ্খপালজাতকং (৪)

১৪৩. ‘‘অরিযাৰকাসোসি পসন্ননেত্তো, মঞ্ঞে ভৰং পব্বজিতো কুলম্হা;

কথং নু ৰিত্তানি পহায ভোগে, পব্বজি নিক্খম্ম ঘরা সপঞ্ঞ’’ [সপঞ্ঞো (স্যা.), সপঞ্ঞা (পী.)].

১৪৪. ‘‘সযং ৰিমানং নরদেৰ দিস্ৰা, মহানুভাৰস্স মহোরগস্স;

দিস্ৰান পুঞ্ঞান মহাৰিপাকং, সদ্ধাযহং পব্বজিতোম্হি রাজ’’.

১৪৫. ‘‘ন কামকামা ন ভযা ন দোসা, ৰাচং মুসা পব্বজিতা ভণন্তি;

অক্খাহি মে পুচ্ছিতো এতমত্থং, সুত্ৰান মে জাযিহিতিপ্পসাদো’’.

১৪৬. ‘‘ৰাণিজ্জ [ৰণিজ্জ (পী.)] রট্ঠাধিপ গচ্ছমানো, পথে অদ্দসাসিম্হি ভোজপুত্তে [মিলাচপুত্তে (সী. পী.)];

পৰদ্ধকাযং উরগং মহন্তং, আদায গচ্ছন্তে পমোদমানে’’.

১৪৭. ‘‘সোহং সমাগম্ম জনিন্দ তেহি, পহট্ঠলোমো অৰচম্হি ভীতো;

কুহিং অযং নীযতি [নিয্যতি (ক.)] ভীমকাযো, নাগেন কিং কাহথ ভোজপুত্তা.

১৪৮. ‘‘নাগো অযং নীযতি ভোজনত্থা [ভোজনত্থং (সী. স্যা. পী.)], পৰদ্ধকাযো উরগো মহন্তো;

সাদুঞ্চ থূলঞ্চ মুদুঞ্চ মংসং, ন ত্ৰং রসঞ্ঞাসি ৰিদেহপুত্ত.

১৪৯. ‘‘ইতো মযং গন্ত্ৰা সকং নিকেতং [নিকেতনং (পী.)], আদায সত্থানি ৰিকোপযিত্ৰা;

মংসানি ভোক্খাম [ভক্খাম (স্যা.)] পমোদমানা, মযঞ্হি ৰে সত্তৰো পন্নগানং.

১৫০. ‘‘সচে অযং নীযতি ভোজনত্থা, পৰদ্ধকাযো উরগো মহন্তো;

দদামি ৰো বলিবদ্দানি [বলিৰদ্দানি (পী.)] সোল়স, নাগং ইমং মুঞ্চথ বন্ধনস্মা.

১৫১. ‘‘অদ্ধা হি নো ভক্খো অযং মনাপো, বহূ চ নো উরগা ভুত্তপুব্বা [বহুং চ নো উরগো ভুত্তপুব্বো (ক.)];

করোম তে তং ৰচনং অল়ার [আল়ার (ক.) এৰমুপরিপি], মিত্তঞ্চ নো হোহি ৰিদেহপুত্ত.

১৫২. ‘‘তদস্সু তে বন্ধনা মোচযিংসু, যং নত্থুতো পটিমোক্কস্স পাসে;

মুত্তো চ সো বন্ধনা নাগরাজা, পক্কামি পাচীনমুখো মুহুত্তং.

১৫৩. ‘‘গন্ত্ৰান পাচীনমুখো মুহুত্তং, পুণ্ণেহি নেত্তেহি পলোকযী মং;

তদাস্সহং পিট্ঠিতো অন্ৰগচ্ছিং, দসঙ্গুলিং অঞ্জলিং পগ্গহেত্ৰা.

১৫৪. ‘‘গচ্ছেৰ খো ত্ৰং তরমানরূপো, মা তং অমিত্তা পুনরগ্গহেসুং;

দুক্খো হি লুদ্দেহি পুনা সমাগমো, অদস্সনং ভোজপুত্তান গচ্ছ.

১৫৫. ‘‘অগমাসি সো রহদং ৰিপ্পসন্নং, নীলোভাসং রমণীযং সুতিত্থং;

সমোততং [সমোনতং (স্যা. ক.)] জম্বুহি ৰেতসাহি, পাৰেক্খি নিত্তিণ্ণভযো পতীতো.

১৫৬. ‘‘সো তং পৰিস্স ন চিরস্স নাগো, দিব্বেন মে পাতুরহুং জনিন্দ;

উপট্ঠহী মং পিতরংৰ পুত্তো, হদযঙ্গমং কণ্ণসুখং ভণন্তো.

১৫৭. ‘‘ত্ৰং মেসি মাতা চ পিতা [পিতা চ (পী.)] অল়ার, অব্ভন্তরো পাণদদো সহাযো;

সকঞ্চ ইদ্ধিং পটিলাভকোস্মি [পটিলাভিতোস্মি (পী.)], অল়ার পস্স মে নিৰেসনানি;

পহূতভক্খং বহুঅন্নপানং, মসক্কসারং ৰিয ৰাসৰস্স’’.

১৫৮. ‘‘তং ভূমিভাগেহি উপেতরূপং, অসক্খরা চেৰ মুদূ সুভা চ;

নীচত্তিণা [নীচা তিণা (স্যা. পী.)] অপ্পরজা চ ভূমি, পাসাদিকা যত্থ জহন্তি সোকং.

১৫৯. ‘‘অনাৰকুলা ৰেল়ুরিযূপনীলা, চতুদ্দিসং অম্বৰনং সুরম্মং;

পক্কা চ পেসী চ ফলা সুফুল্লা, নিচ্চোতুকা ধারযন্তী ফলানি.

১৬০. ‘‘তেসং ৰনানং নরদেৰ মজ্ঝে, নিৰেসনং ভস্সরসন্নিকাসং;

রজতগ্গল়ং সোৰণ্ণমযং উল়ারং, ওভাসতী ৰিজ্জুরিৰন্তলিক্খে.

১৬১. ‘‘মণীমযা সোণ্ণমযা [সোৰণ্ণমযা (সী. স্যা. পী.)] উল়ারা, অনেকচিত্তা সততং সুনিম্মিতা;

পরিপূরা কঞ্ঞাহি অলঙ্কতাভি, সুৰণ্ণকাযূরধরাহি রাজ.

১৬২. ‘‘সো সঙ্খপালো তরমানরূপো, পাসাদমারুয্হ অনোমৰণ্ণো;

সহস্সথম্ভং অতুলানুভাৰং, যত্থস্স ভরিযা মহেসী অহোসি.

১৬৩. ‘‘একা চ নারী তরমানরূপা, আদায ৰেল়ুরিযমযং মহগ্ঘং;

সুভং মণিং জাতিমন্তূপপন্নং, অচোদিতা আসনমব্ভিহাসি.

১৬৪. ‘‘ততো মং উরগো হত্থে গহেত্ৰা, নিসীদযী পামুখআসনস্মিং;

ইদমাসনং অত্র ভৰং নিসীদতু, ভৰঞ্হি মে অঞ্ঞতরো গরূনং.

১৬৫. ‘‘অঞ্ঞা চ নারী তরমানরূপা, আদায ৰারিং উপসঙ্কমিত্ৰা;

পাদানি পক্খালযী মে জনিন্দ, ভরিযাৰ [ভরিযা চ (পী.)] ভত্তূ পতিনো পিযস্স.

১৬৬. ‘‘অপরা চ নারী তরমানরূপা, পগ্গয্হ সোৰণ্ণমযায [সোৰণ্ণমযা (পী.)] পাতিযা;

অনেকসূপং ৰিৰিধং ৰিযঞ্জনং, উপনামযী ভত্ত মনুঞ্ঞরূপং.

১৬৭. ‘‘তুরিযেহি [তূরিযেহি (ক.)] মং ভারত ভুত্তৰন্তং, উপট্ঠহুং ভত্তু মনো ৰিদিত্ৰা;

ততুত্তরিং [তদুত্তরিং (ক.)] মং নিপতী মহন্তং, দিব্বেহি কামেহি অনপ্পকেহি.

১৬৮. ‘‘ভরিযা মমেতা তিসতা অল়ার, সব্বত্তমজ্ঝা পদুমুত্তরাভা;

অল়ার এতাস্সু তে কামকারা, দদামি তে তা পরিচারযস্সু.

১৬৯. ‘‘সংৰচ্ছরং দিব্বরসানুভুত্ৰা, তদাস্সুহং [তদস্সহং (পী.)] উত্তরিমজ্ঝভাসিং [উত্তরি পচ্চভাসিং (সী. স্যা.), উত্তরিং পচ্চভাসিং (পী.)];

নাগস্সিদং কিন্তি কথঞ্চ লদ্ধং, কথজ্ঝগমাসি ৰিমানসেট্ঠং’’.

১৭০. ‘‘অধিচ্চ লদ্ধং পরিণামজং তে, সযংকতং উদাহু দেৰেহি দিন্নং;

পুচ্ছামি তং [তে (পী.)] নাগরাজেতমত্থং, কথজ্ঝগমাসি ৰিমানসেট্ঠং’’.

১৭১. ‘‘নাধিচ্চ লদ্ধং ন পরিণামজং মে, ন সযংকতং নাপি দেৰেহি দিন্নং;

সকেহি কম্মেহি অপাপকেহি, পুঞ্ঞেহি মে লদ্ধমিদং ৰিমানং’’.

১৭২. ‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;

অক্খাহি মে নাগরাজেতমত্থং, কথং নু তে লদ্ধমিদং ৰিমানং’’.

১৭৩. ‘‘রাজা অহোসিং মগধানমিস্সরো, দুয্যোধনো নাম মহানুভাৰো;

সো ইত্তরং জীৰিতং সংৰিদিত্ৰা, অসস্সতং ৰিপরিণামধম্মং.

১৭৪. ‘‘অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং [অদাসি (পী.)];

ওপানভূতং মে ঘরং তদাসি, সন্তপ্পিতা সমণব্রাহ্মণা চ.

১৭৫. [অযং গাথা পী. পোত্থকে নত্থি] ‘‘মালঞ্চ গন্ধঞ্চ ৰিলেপনঞ্চ, পদীপিযং [পদীপযং (স্যা. ক.)] যানমুপস্সযঞ্চ;

অচ্ছাদনং সেয্যমথন্নপানং, সক্কচ্চ দানানি অদম্হ তত্থ [অযং গাথা পী. পোত্থকে নত্থি].

১৭৬. ‘‘তং মে ৰতং তং পন ব্রহ্মচরিযং, তস্স সুচিণ্ণস্স অযং ৰিপাকো;

তেনেৰ মে লদ্ধমিদং ৰিমানং, পহূতভক্খং বহুঅন্নপানং’’;

‘‘নচ্চেহি গীতেহি চুপেতরূপং, চিরট্ঠিতিকং ন চ সস্সতাযং.

১৭৭. ‘‘অপ্পানুভাৰা তং মহানুভাৰং, তেজস্সিনং হন্তি অতেজৰন্তো;

কিমেৰ দাঠাৰুধ কিং পটিচ্চ, হত্থত্ত [হত্থত্থ (সী. স্যা. পী.)] মাগচ্ছি ৰনিব্বকানং [ৰণিব্বকানং (সী.)].

১৭৮. ‘‘ভযং নু তে অন্ৰগতং মহন্তং, তেজো নু তে নান্ৰগং দন্তমূলং;

কিমেৰ দাঠাৰুধ কিং পটিচ্চ, কিলেসমাপজ্জি ৰনিব্বকানং’’.

১৭৯. ‘‘ন মে ভযং অন্ৰগতং মহন্তং, তেজো ন সক্কা মম তেহি হন্তুং [তেভিহন্তুং (স্যা. ক.)];

সতঞ্চ ধম্মানি সুকিত্তিতানি, সমুদ্দৰেলাৰ দুরচ্চযানি.

১৮০. ‘‘চাতুদ্দসিং পঞ্চদসিং অল়ার, উপোসথং নিচ্চমুপাৰসামি;

অথাগমুং সোল়স ভোজপুত্তা, রজ্জুং গহেত্ৰান দল়্হঞ্চ পাসং.

১৮১. ‘‘ভেত্ৰান নাসং অতিকস্স [অন্তকস্স (ক.)] রজ্জুং, নযিংসু মং সম্পরিগয্হ লুদ্দা;

এতাদিসং দুক্খমহং তিতিক্খং [তিতিক্খিং (পী.)], উপোসথং অপ্পটিকোপযন্তো’’.

১৮২. ‘‘একাযনে তং পথে অদ্দসংসু, বলেন ৰণ্ণেন চুপেতরূপং;

সিরিযা পঞ্ঞায চ ভাৰিতোসি, কিং পত্থযং [কিমত্থিযং (সী. স্যা. পী.)] নাগ তপো করোসি.

১৮৩. ‘‘ন পুত্তহেতূ ন ধনস্স হেতু, ন আযুনো চাপি অল়ার হেতু;

মনুস্সযোনিং অভিপত্থযানো, তস্মা পরক্কম্ম তপো করোমি’’.

১৮৪. ‘‘ত্ৰং লোহিতক্খো ৰিহতন্তরংসো, অলঙ্কতো কপ্পিতকেসমস্সু;

সুরোসিতো লোহিতচন্দনেন, গন্ধব্বরাজাৰ দিসা পভাসসি [পভাসি (ক.)].

১৮৫. ‘‘দেৰিদ্ধিপত্তোসি মহানুভাৰো, সব্বেহি কামেহি সমঙ্গিভূতো;

পুচ্ছামি তং নাগরাজেতমত্থং, সেয্যো ইতো কেন মনুস্সলোকো’’.

১৮৬. ‘‘অল়ার নাঞ্ঞত্র মনুস্সলোকা, সুদ্ধী ৰ সংৰিজ্জতি সংযমো ৰা;

অহঞ্চ লদ্ধান মনুস্সযোনিং, কাহামি জাতিমরণস্স অন্তং’’.

১৮৭. ‘‘সংৰচ্ছরো মে ৰসতো [ৰুসিতো (পী.)] তৰন্তিকে, অন্নেন পানেন উপট্ঠিতোস্মি;

আমন্তযিত্ৰান পলেমি নাগ, চিরপ্পৰুট্ঠোস্মি [চিরপ্পৰুত্থো অস্মি (পী.)] অহং জনিন্দ’’.

১৮৮. ‘‘পুত্তা চ দারা অনুজীৰিনো চ [চ’নুজীৰিনো (স্যা. পী.)], নিচ্চানুসিট্ঠা উপতিট্ঠতে তং;

কচ্চিন্নু তং নাভিসপিত্থ [নাভিসংসিত্থ (স্যা. পী.)] কোচি, পিযঞ্হি মে দস্সনং তুয্হং [তুয্হ (পী.)] অল়ার’’.

১৮৯. ‘‘যথাপি মাতূ চ পিতূ অগারে, পুত্তো পিযো পটিৰিহিতো ৰসেয্য [সেয্যো (পী.)];

ততোপি ময্হং ইধমেৰ সেয্যো, চিত্তঞ্হি তে নাগ মযী পসন্নং’’.

১৯০. ‘‘মণী মমং ৰিজ্জতি লোহিতঙ্কো [লোহিতঙ্গো (ক.)], ধনাহরো মণিরতনং উল়ারং;

আদায ত্ৰং [তং (পী.)] গচ্ছ সকং নিকেতং, লদ্ধা ধনং তং মণিমোস্সজস্সু’’.

১৯১. ‘‘দিট্ঠা মযা মানুসকাপি কামা, অসস্সতা ৰিপরিণামধম্মা;

আদীনৰং কামগুণেসু দিস্ৰা, সদ্ধাযহং পব্বজিতোম্হি রাজ.

১৯২. ‘‘দুমপ্ফলানীৰ পতন্তি মাণৰা, দহরা চ ৰুদ্ধা চ সরীরভেদা;

এতম্পি দিস্ৰা পব্বজিতোম্হি রাজ, অপণ্ণকং সামঞ্ঞমেৰ সেয্যো’’.

১৯৩. ‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নাগঞ্চ সুত্ৰান তৰঞ্চল়ার, কাহামি পুঞ্ঞানি অনপ্পকানি’’.

১৯৪. ‘‘অদ্ধা হৰে সেৰিতব্বা সপঞ্ঞা, বহুস্সুতা যে বহুঠানচিন্তিনো;

নাগঞ্চ সুত্ৰান মমঞ্চ রাজ, করোহি পুঞ্ঞানি অনপ্পকানী’’তি.

সঙ্খপালজাতকং চতুত্থং.