৫১৯. সম্বুলাজাতকং (৯)

২৯৭. কা ৰেধমানা গিরিকন্দরাযং, একা তুৰং তিট্ঠসি সংহিতূরু [সঞ্ঞতূর (সী. পী.), সঞ্চিতূরু (স্যা.)];

পুট্ঠাসি মে পাণিপমেয্যমজ্ঝে, অক্খাহি মে নামঞ্চ বন্ধৰে চ.

২৯৮. ওভাসযং ৰনং রম্মং, সীহব্যগ্ঘনিসেৰিতং;

কা ৰা ত্ৰমসি কল্যাণি, কস্স ৰা ত্ৰং সুমজ্ঝিমে;

অভিৰাদেমি তং ভদ্দে, দানৰাহং নমত্থু তে.

২৯৯. যো পুত্তো কাসিরাজস্স, সোত্থিসেনোতি তং ৰিদূ;

তস্সাহং সম্বুলা ভরিযা, এৰং জানাহি দানৰ;

অভিৰাদেমি তং ভন্তে [ভদ্দন্তে (সী. স্যা.)], সম্বুলাহং নমত্থু তে.

৩০০. ৰেদেহপুত্তো ভদ্দন্তে, ৰনে ৰসতি আতুরো;

তমহং রোগসম্মত্তং, একা একং উপট্ঠহং [উপট্ঠহিং (সী.)].

৩০১. অহঞ্চ ৰনমুঞ্ছায, মধুমংসং মিগাবিলং [মিগাৰিলং (সী.)];

যদা হরামি তং ভক্খো, তস্স নূনজ্জ নাধতি [নাথতি (ক.)].

৩০২. কিং ৰনে রাজপুত্তেন, আতুরেন করিস্সসি;

সম্বুলে পরিচিণ্ণেন, অহং ভত্তা ভৰামি তে.

৩০৩. সোকট্টায দুরত্তায, কিং রূপং ৰিজ্জতে মম;

অঞ্ঞং পরিযেস ভদ্দন্তে, অভিরূপতরং মযা.

৩০৪. এহিমং গিরিমারুয্হ, ভরিযা মে [ময্হং (সী. স্যা. পী.)] চতুস্সতা;

তাসং ত্ৰং পৰরা হোহি, সব্বকামসমিদ্ধিনী.

৩০৫. নূন [ননু (সী. স্যা. পী. ক.)] তারকৰণ্ণাভে [হাটকৰণ্ণাভে (পী.)], যং কিঞ্চি মনসিচ্ছসি;

সব্বং তং পচুরং ময্হং, রমস্স্ৰজ্জ [রমসুজ্জ (সী. স্যা.)] মযা সহ.

৩০৬. নো চে তুৰং মহেসেয্যং, সম্বুলে কারযিস্সসি;

অলং ত্ৰং পাতরাসায, পণ্হে [মঞ্ঞে (সী. পী.)] ভক্খা ভৰিস্সসি.

৩০৭. তঞ্চ সত্তজটো লুদ্দো, কল়ারো পুরিসাদকো;

ৰনে নাথং অপস্সন্তিং, সম্বুলং অগ্গহী ভুজে.

৩০৮. অধিপন্না পিসাচেন, লুদ্দেনামিসচক্খুনা;

সা চ সত্তুৰসম্পত্তা, পতিমেৰানুসোচতি.

৩০৯. ন মে ইদং তথা দুক্খং, যং মং খাদেয্য রক্খসো;

যঞ্চ মে অয্যপুত্তস্স, মনো হেস্সতি অঞ্ঞথা.

৩১০. ন সন্তি দেৰা পৰসন্তি নূন, ন হি নূন সন্তি ইধ লোকপালা;

সহসা করোন্তানমসঞ্ঞতানং, ন হি নূন সন্তি পটিসেধিতারো.

৩১১. ইত্থীনমেসা পৰরা যসস্সিনী, সন্তা সমা অগ্গিরিৰুগ্গতেজা;

তঞ্চে তুৰং রক্খসাদেসি কঞ্ঞং, মুদ্ধা চ হি সত্তধা তে ফলেয্য;

মা ত্ৰং দহী [জহী (পী.)] মুঞ্চ পতিব্বতায [পতিব্বতা সা (সী.), পতিব্বতা যা (পী.)].

৩১২. সা চ অস্সমমাগচ্ছি, পমুত্তা পুরিসাদকা;

নীল়ং [নিড্ডং (স্যা. ক.)] পল়িনং সকুণীৰ [ফলিনসকুণীৰ (সী. স্যা. পী.)], গতসিঙ্গংৰ আলযং.

৩১৩. সা তত্থ পরিদেৰেসি, রাজপুত্তী যসস্সিনী;

সম্বুলা উতুমত্তক্খা, ৰনে নাথং অপস্সন্তী [অপস্সতী (সী.)].

৩১৪. সমণে ব্রাহ্মণে ৰন্দে, সম্পন্নচরণে ইসে;

রাজপুত্তং অপস্সন্তী, তুম্হংম্হি [তুম্হং হি (পী.)] সরণং গতা.

৩১৫. ৰন্দে সীহে চ ব্যগ্ঘে চ, যে চ অঞ্ঞে ৰনে মিগা;

রাজপুত্তং অপস্সন্তী, তুম্হংম্হি সরণং গতা.

৩১৬. তিণা [তিণ (পী.)] লতানি ওসধ্যো, পব্বতানি ৰনানি চ;

রাজপুত্তং অপস্সন্তী, তুম্হংম্হি সরণং গতা.

৩১৭. ৰন্দে ইন্দীৰরীসামং, রত্তিং নক্খত্তমালিনিং;

রাজপুত্তং অপস্সন্তী, তুম্হংম্হি সরণং গতা.

৩১৮. ৰন্দে ভাগীরথিং গঙ্গং, সৰন্তীনং পটিগ্গহং;

রাজপুত্তং অপস্সন্তী, তুম্হংম্হি সরণং গতা.

৩১৯. ৰন্দে অহং পব্বতরাজসেট্ঠং, হিমৰন্তং সিলুচ্চযং;

রাজপুত্তং অপস্সন্তী, তুম্হংম্হি সরণং গতা.

৩২০. অতিসাযং ৰতাগচ্ছি, রাজপুত্তি যসস্সিনি;

কেন নুজ্জ সমাগচ্ছি [সমাগচ্ছি (সী. পী.)], কো তে পিযতরো মযা.

৩২১. ইদং খোহং তদাৰোচং [তদৰোচং (সী. স্যা.)], গহিতা তেন সত্তুনা;

ন মে ইদং তথা দুক্খং, যং মং খাদেয্য রক্খসো;

যঞ্চ মে অয্যপুত্তস্স, মনো হেস্সতি অঞ্ঞথা.

৩২২. চোরীনং বহুবুদ্ধীনং, যাসু সচ্চং সুদুল্লভং;

থীনং ভাৰো দুরাজানো, মচ্ছস্সেৰোদকে গতং.

৩২৩. তথা মং সচ্চং পালেতু, পালযিস্সতি চে মমং;

যথাহং নাভিজানামি, অঞ্ঞং পিযতরং তযা;

এতেন সচ্চৰজ্জেন, ব্যাধি তে ৰূপসম্মতু.

৩২৪. যে কুঞ্জরা সত্তসতা উল়ারা, রক্খন্তি রত্তিন্দিৰমুয্যুতাৰুধা;

ধনুগ্গহানঞ্চ সতানি সোল়স, কথংৰিধে পস্সসি ভদ্দে সত্তৰো.

৩২৫. অলঙ্কতাযো পদুমুত্তরত্তচা, ৰিরাগিতা পস্সতি হংসগগ্গরা;

তাসং সুণিত্ৰা মিতগীতৰাদিতং [মিতগীতৰাদিনং (পী.)], ন দানি মে তাত তথা যথা পুরে.

৩২৬. সুৰণ্ণসংকচ্চধরা সুৰিগ্গহা, অলঙ্কতা মানুসিযচ্ছরূপমা;

সেনোপিযা [সেনূপিযা (পী.)] তাত অনিন্দিতঙ্গিযো, খত্তিযকঞ্ঞা পটিলোভযন্তি [পটিলাভযন্তি (পী.)] নং.

৩২৭. সচে অহং তাত তথা যথা পুরে, পতিং তমুঞ্ছায পুনা ৰনে ভরে;

সম্মানযে মং ন চ মং ৰিমানযে, ইতোপি মে তাত ততো ৰরং সিযা.

৩২৮. যমন্নপানে ৰিপুলস্মি ওহিতে, নারী ৰিমট্ঠাভরণা অলঙ্কতা;

সব্বঙ্গুপেতা [পঞ্চঙ্গুপেতা (সী. স্যা. পী.)] পতিনো চ অপ্পিযা, অবজ্ঝ [অৰজ্ঝ (স্যা.), আবজ্ঝ (পী.)] তস্সা মরণং ততো ৰরং.

৩২৯. অপি চে দলিদ্দা কপণা অনাল়্হিযা, কটাদুতীযা পতিনো চ সা পিযা;

সব্বঙ্গুপেতাযপি অপ্পিযায, অযমেৰ সেয্যা [সেয্যো (স্যা. ক.)] কপণাপি যা পিযা [কপণাপি যা (ক.)].

৩৩০. সুদুল্লভিত্থী পুরিসস্স যা হিতা, ভত্তিত্থিযা দুল্লভো যো হিতো চ;

হিতা চ তে সীলৰতী চ ভরিযা, জনিন্দ ধম্মং চর সম্বুলায.

৩৩১. সচে তুৰং ৰিপুলে লদ্ধভোগে, ইস্সাৰতিণ্ণা মরণং উপেসি;

অহঞ্চ তে ভদ্দে ইমা রাজকঞ্ঞা [ইমা চ কঞ্ঞা (পী.)], সব্বে [সব্বেৰ (সী. স্যা. পী.)] তে ৰচনকরা ভৰামাতি.

সম্বুলাজাতকং নৰমং.