৪৮৯. সুরুচিজাতকং (৬)

১০২. মহেসী সুরুচিনো [রুচিনো (সী. স্যা. পী.)] ভরিযা, আনীতা পঠমং অহং;

দস ৰস্সসহস্সানি, যং মং সুরুচিমানযি.

১০৩. সাহং ব্রাহ্মণ রাজানং, ৰেদেহং মিথিলগ্গহং;

নাভিজানামি কাযেন, ৰাচায উদ চেতসা;

সুরুচিং অতিমঞ্ঞিত্থ [অতিমঞ্ঞিত্থো (সী. পী.), অতিমঞ্ঞিতা (?)], আৰি [আৰিং (সী. পী.)] ৰা যদি ৰা রহো.

১০৪. এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১০৫. ভত্তু মম সস্সু মাতা, পিতা চাপি চ সস্সুরো;

তে মং ব্রহ্মে ৰিনেতারো, যাৰ অট্ঠংসু জীৰিতং.

১০৬. সাহং অহিংসারতিনী, কামসা [কামসো (সী.)] ধম্মচারিনী [ধম্মচারিণী (সী.)];

সক্কচ্চং তে উপট্ঠাসিং, রত্তিন্দিৰমতন্দিতা.

১০৭. এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১০৮. সোল়সিত্থিসহস্সানি, সহভরিযানি ব্রাহ্মণ;

তাসু ইস্সা ৰা কোধো ৰা, নাহু ময্হং কুদাচনং.

১০৯. হিতেন তাসং নন্দামি, ন চ মে কাচি অপ্পিযা;

অত্তানংৰানুকম্পামি, সদা সব্বা সপত্তিযো.

১১০. এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১১. দাসে কম্মকরে পেস্সে [পোসে (স্যা. ক.)], যে চঞ্ঞে অনুজীৰিনো;

পেসেমি [পোসেমি (সী. স্যা. পী.)] সহধম্মেন, সদা পমুদিতিন্দ্রিযা.

১১২. এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৩. সমণে ব্রাহ্মণে চাপি, অঞ্ঞে চাপি ৰনিব্বকে;

তপ্পেমি অন্নপানেন, সদা পযতপাণিনী.

১১৪. এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৫. চাতুদ্দসিং পঞ্চদ্দসিং [পন্নরসিং (সী. পী.)], যা চ পক্খস্স অট্ঠমী [অট্ঠমিং (সী. পী.)];

পাটিহারিযপক্খঞ্চ, অট্ঠঙ্গসুসমাগতং [অট্ঠঙ্গসুসমাহিতং (সব্বত্থ) ৰি. ৰ. ১২৯ পাল়িযা অট্ঠকথা পস্সিতব্বা];

উপোসথং উপৰসামি [উপৰসিং (ক.)], সদা সীলেসু সংৰুতা.

১১৬. এতেন সচ্চৰজ্জেন, পুত্তো উপ্পজ্জতং ইসে;

মুসা মে ভণমানায, মুদ্ধা ফলতু সত্তধা.

১১৭. সব্বেৰ তে ধম্মগুণা, রাজপুত্তি যসস্সিনি;

সংৰিজ্জন্তি তযি ভদ্দে, যে ত্ৰং কিত্তেসি অত্তনি.

১১৮. খত্তিযো জাতিসম্পন্নো, অভিজাতো যসস্সিমা;

ধম্মরাজা ৰিদেহানং, পুত্তো উপ্পজ্জতে তৰ [তৰং (সী. পী.)].

১১৯. দুম্মী [রুম্মী (সী. পী.)] রজোজল্লধরো, অঘে ৰেহাযসং ঠিতো;

মনুঞ্ঞং ভাসসে ৰাচং, যং ময্হং হদযঙ্গমং.

১২০. দেৰতানুসি সগ্গম্হা, ইসি ৰাসি [চাপি (ক.)] মহিদ্ধিকো;

কো ৰাসি ত্ৰং অনুপ্পত্তো, অত্তানং মে পৰেদয.

১২১. যং দেৰসঙ্ঘা ৰন্দন্তি, সুধম্মাযং সমাগতা;

সোহং সক্কো সহস্সক্খো, আগতোস্মি তৰন্তিকে.

১২২. ইত্থিযো [ইত্থিযা (পী.)] জীৰলোকস্মিং, যা হোতি [হোন্তি (সী. স্যা.)] সমচারিনী [সমচারিণী (সী.)];

মেধাৰিনী সীলৰতী, সস্সুদেৰা পতিব্বতা.

১২৩. তাদিসায সুমেধায, সুচিকম্মায নারিযা;

দেৰা দস্সনমাযন্তি, মানুসিযা অমানুসা.

১২৪. ত্ৰঞ্চ ভদ্দে সুচিণ্ণেন, পুব্বে সুচরিতেন চ;

ইধ রাজকুলে জাতা, সব্বকামসমিদ্ধিনী.

১২৫. অযঞ্চ তে রাজপুত্তি, উভযত্থ কটগ্গহো;

দেৰলোকূপপত্তী চ, কিত্তী চ ইধ জীৰিতে.

১২৬. চিরং সুমেধে সুখিনী, ধম্মমত্তনি পালয;

এসাহং তিদিৰং যামি, পিযং মে তৰ দস্সনন্তি.

সুরুচিজাতকং ছট্ঠং.