৪৮৪. সালিকেদারজাতকং (১)

১. সম্পন্নং সালিকেদারং, সুৰা ভুঞ্জন্তি কোসিয;

পটিৰেদেমি তে ব্রহ্মে, ন নে [তে (সী. স্যা.), নং (সী. স্যা. পী. অট্ঠ.), তং (ক. অট্ঠ.)] ৰারেতুমুস্সহে.

২. একো চ তত্থ সকুণো, যো নেসং [তেসং (সী. অট্ঠ.)] সব্বসুন্দরো;

ভুত্ৰা সালিং যথাকামং, তুণ্ডেনাদায গচ্ছতি.

৩. ওড্ডেন্তু [উজ্ঝুন্তু (স্যা. ক.) অঙ্গুত্তরনিকাযে পস্সিতব্বং] ৰাল়পাসানি, যথা ৰজ্ঝেথ সো দিজো;

জীৰঞ্চ নং গহেত্ৰান, আনযেহি [আনযেথ (সী. পী.)] মমন্তিকে.

৪. এতে ভুত্ৰা পিৰিত্ৰা চ [ভুত্ৰা চ পিত্ৰা চ (পী.)], পক্কমন্তি ৰিহঙ্গমা;

একো বদ্ধোস্মি পাসেন, কিং পাপং পকতং মযা.

৫. উদরং নূন অঞ্ঞেসং, সুৰ অচ্চোদরং তৰ;

ভুত্ৰা সালিং যথাকামং, তুণ্ডেনাদায গচ্ছসি.

৬. কোট্ঠং নু তত্থ পূরেসি, সুৰ ৰেরং নু তে মযা;

পুট্ঠো মে সম্ম অক্খাহি, কুহিং সালিং নিদাহসি [নিধীযসি (পী.)].

৭. ন মে ৰেরং তযা সদ্ধিং, কোট্ঠো ময্হং ন ৰিজ্জতি;

ইণং মুঞ্চামিণং দম্মি, সম্পত্তো কোটসিম্বলিং;

নিধিম্পি তত্থ নিদহামি, এৰং জানাহি কোসিয.

৮. কীদিসং তে ইণদানং, ইণমোক্খো চ কীদিসো;

নিধিনিধানমক্খাহি, অথ পাসা পমোক্খসি.

৯. অজাতপক্খা তরুণা, পুত্তকা ময্হ কোসিয;

তে মং ভতা ভরিস্সন্তি, তস্মা তেসং ইণং দদে.

১০. মাতা পিতা চ মে ৰুদ্ধা, জিণ্ণকা গতযোব্বনা;

তেসং তুণ্ডেন হাতূন, মুঞ্চে পুব্বকতং [পুব্বে কতং (সী.)] ইণং.

১১. অঞ্ঞেপি তত্থ সকুণা, খীণপক্খা সুদুব্বলা;

তেসং পুঞ্ঞত্থিকো দম্মি, তং নিধিং আহু পণ্ডিতা.

১২. ঈদিসং [এদিসং (সী. পী.)] মে ইণদানং, ইণমোক্খো চ ঈদিসো;

নিধিনিধানমক্খামি [নিধিং নিধানং অক্খাতং (সী. পী.)], এৰং জানাহি কোসিয.

১৩. ভদ্দকো ৰতযং পক্খী, দিজো পরমধম্মিকো;

একচ্চেসু মনুস্সেসু, অযং ধম্মো ন ৰিজ্জতি.

১৪. ভুঞ্জ সালিং যথাকামং, সহ সব্বেহি ঞাতিভি;

পুনাপি সুৰ পস্সেমু, পিযং মে তৰ দস্সনং.

১৫. ভুত্তঞ্চ পীতঞ্চ তৰস্সমম্হি [তৰস্সব্যম্হি (ক.)], রত্তিঞ্চ [রতী চ (সী. পী.)] নো কোসিয তে সকাসে;

নিক্খিত্তদণ্ডেসু দদাহি দানং, জিণ্ণে চ মাতাপিতরো ভরস্সু.

১৬. লক্খী ৰত মে উদপাদি অজ্জ, যো অদ্দসাসিং পৰরং [যোহং অদস্সং পরমং (স্যা. ক.)] দিজানং;

সুৰস্স সুত্ৰান সুভাসিতানি, কাহামি পুঞ্ঞানি অনপ্পকানি.

১৭. সো কোসিযো অত্তমনো উদগ্গো, অন্নঞ্চ পানঞ্চভিসঙ্খরিত্ৰা [অন্নঞ্চ পানং অভিসংহরিত্ৰা (ক.)];

অন্নেন পানেন পসন্নচিত্তো, সন্তপ্পযি সমণব্রাহ্মণে চাতি.

সালিকেদারজাতকং [কেদারজাতকং (ক.)] পঠমং.