৪৬১. দসরথজাতকং (৭)

৮৪. এথ লক্খণ সীতা চ, উভো ওতরথোদকং;

এৰাযং ভরতো আহ, ‘‘রাজা দসরথো মতো’’.

৮৫. কেন রামপ্পভাৰেন, সোচিতব্বং ন সোচসি;

পিতরং কালকতং [কালঙ্কতং (ক.)] সুত্ৰা, ন তং পসহতে দুখং.

৮৬. যং ন সক্কা নিপালেতুং, পোসেন লপতং বহুং;

স কিস্স ৰিঞ্ঞূ মেধাৰী, অত্তানমুপতাপযে.

৮৭. দহরা চ হি ৰুদ্ধা চ [যে ৰুদ্ধা (সী. অট্ঠ.), যে ৰুড্ঢা (স্যা.)], যে বালা যে চ পণ্ডিতা;

অড্ঢা চেৰ দলিদ্দা চ, সব্বে মচ্চুপরাযণা.

৮৮. ফলানমিৰ পক্কানং, নিচ্চং পতনতো ভযং;

এৰং জাতান মচ্চানং, নিচ্চ মরণতো ভযং.

৮৯. সাযমেকে ন দিস্সন্তি, পাতো দিট্ঠা বহুজ্জনা;

পাতো একে ন দিস্সন্তি, সাযং দিট্ঠা বহুজ্জনা.

৯০. পরিদেৰযমানো চে, কিঞ্চিদত্থং উদব্বহে;

সম্মূল়্হো হিংসমত্তানং, কযিরা তং ৰিচক্খণো.

৯১. কিসো ৰিৰণ্ণো ভৰতি, হিংসমত্তানমত্তনো [মত্তনা (সী. অট্ঠ. সু. নি. ৫৯০)];

ন তেন পেতা পালেন্তি, নিরত্থা পরিদেৰনা.

৯২. যথা সরণমাদিত্তং, ৰারিনা পরিনিব্বযে [ৰারিনাৰনিব্বাপযে (স্যা. ক.)];

এৰম্পি ধীরো সুতৰা, মেধাৰী পণ্ডিতো নরো;

খিপ্পমুপ্পতিতং সোকং, ৰাতো তূলংৰ ধংসযে.

৯৩. মচ্চো একোৰ [একোৰ মচ্চো (সী. স্যা. পী.)] অচ্চেতি, একোৰ জাযতে কুলে;

সংযোগপরমাত্ৰেৰ, সম্ভোগা সব্বপাণিনং.

৯৪. তস্মা হি ধীরস্স বহুস্সুতস্স, সম্পস্সতো লোকমিমং পরঞ্চ;

অঞ্ঞায ধম্মং হদযং মনঞ্চ, সোকা মহন্তাপি ন তাপযন্তি.

৯৫. সোহং দস্সঞ্চ ভোক্খঞ্চ, ভরিস্সামি চ [সোহং যসঞ্চ ভোগঞ্চ, ভরিযাপি চ (স্যা. ক.)] ঞাতকে;

সেসঞ্চ পালযিস্সামি, কিচ্চমেতং [কিচ্চমেৰং (পী.)] ৰিজানতো.

৯৬. দস ৰস্সসহস্সানি, সট্ঠি ৰস্সসতানি চ;

কম্বুগীৰো মহাবাহু, রামো রজ্জমকারযীতি.

দসরথজাতকং সত্তমং.