৪৬২. সংৰরজাতকং (৮)

৯৭. জানন্তো নো মহারাজ, তৰ সীলং জনাধিপো;

ইমে কুমারে পূজেন্তো, ন তং কেনচি মঞ্ঞথ.

৯৮. তিট্ঠন্তে নো মহারাজে, অদু [আদু (সী. পী.), আদূ (স্যা.)] দেৰে দিৰঙ্গতে;

ঞাতী তং সমনুঞ্ঞিংসু, সম্পস্সং অত্থমত্তনো.

৯৯. কেন সংৰরৰত্তেন, সঞ্জাতে অভিতিট্ঠসি;

কেন তং নাতিৰত্তন্তি, ঞাতিসঙ্ঘা সমাগতা.

১০০. ন রাজপুত্ত উসূযামি [রাজপুত্ত নুস্সুয্যামি (ক.)], সমণানং মহেসিনং;

সক্কচ্চং তে নমস্সামি, পাদে ৰন্দামি তাদিনং.

১০১. তে মং ধম্মগুণে যুত্তং, সুস্সূসমনুসূযকং;

সমণা মনুসাসন্তি [সমনুসাসন্তি (সী. স্যা. পী.)], ইসী ধম্মগুণে রতা.

১০২. তেসাহং ৰচনং সুত্ৰা, সমণানং মহেসিনং;

ন কিঞ্চি অতিমঞ্ঞামি, ধম্মে মে নিরতো মনো.

১০৩. হত্থারোহা অনীকট্ঠা, রথিকা পত্তিকারকা;

তেসং [তেসু (পী.)] নপ্পটিবন্ধামি, নিৰিট্ঠং [নিবদ্ধং (সী. পী.)] ভত্তৰেতনং.

১০৪. মহামত্তা চ মে অত্থি, মন্তিনো পরিচারকা;

বারাণসিং ৰোহরন্তি, বহুমংসসুরোদকং.

১০৫. অথোপি ৰাণিজা ফীতা, নানারট্ঠেহি আগতা;

তেসু মে ৰিহিতা রক্খা, এৰং জানাহুপোসথ.

১০৬. ধম্মেন কির ঞাতীনং, রজ্জং কারেহি সংৰর;

মেধাৰী পণ্ডিতো চাসি [চাপি (সী. পী.)], অথোপি ঞাতিনং হিতো.

১০৭. তং তং ঞাতিপরিব্যূল়্হং, নানারতনমোচিতং;

অমিত্তা নপ্পসহন্তি, ইন্দংৰ অসুরাধিপোতি.

সংৰরজাতকং অট্ঠমং.