৪৬০. যুধঞ্চযজাতকং (৬)

৭৩. মিত্তামচ্চপরিব্যূল়্হং [পরিব্বূল়্হং (সী. পী.)], অহং ৰন্দে রথেসভং;

পব্বজিস্সামহং রাজ [পব্বজিস্সং মহারাজ (সী. পী.)], তং দেৰো অনুমঞ্ঞতু.

৭৪. সচে তে ঊনং কামেহি, অহং পরিপূরযামি [অহংৰ পূরযামি (ক.)] তে;

যো তং হিংসতি ৰারেমি, মা পব্বজ [পব্বজি (পী.)] যুধঞ্চয [যুধঞ্জয (সী. স্যা.), যুৰঞ্জয (পী.)].

৭৫. ন মত্থি ঊনং কামেহি, হিংসিতা মে ন ৰিজ্জতি;

দীপঞ্চ কাতুমিচ্ছামি, যং জরা নাভিকীরতি.

৭৬. পুত্তো ৰা পিতরং যাচে, পিতা ৰা পুত্তমোরসং;

নেগমো তং যাচে [নেগমো যাচতে (সী. স্যা. পী.)] তাত, মা পব্বজ যুধঞ্চয.

৭৭. মা মং দেৰ নিৰারেহি, পব্বজন্তং রথেসভ;

মাহং কামেহি সম্মত্তো, জরায ৰসমন্ৰগূ.

৭৮. অহং তং তাত যাচামি, অহং পুত্ত নিৰারযে;

চিরং তং দট্ঠুমিচ্ছামি, মা পব্বজ যুধঞ্চয.

৭৯. উস্সাৰোৰ তিণগ্গম্হি, সূরিযুগ্গমনং পতি;

এৰমাযু মনুস্সানং, মা মং অম্ম নিৰারয.

৮০. তরমানো ইমং যানং, আরোপেতু [তরমানা ইমং যানং, আরোপেন্তু (সী. পী.)] রথেসভ;

মা মে মাতা তরন্তস্স, অন্তরাযকরা অহু.

৮১. অভিধাৰথ ভদ্দন্তে, সুঞ্ঞং হেস্সতি রম্মকং;

যুধঞ্চযো অনুঞ্ঞাতো, সব্বদত্তেন রাজিনা.

৮২. যোহু সেট্ঠো সহস্সস্স [মনুস্সানং (স্যা.), সহস্সানং (ক.)], যুৰা কঞ্চনসন্নিভো;

সোযং কুমারো পব্বজিতো, কাসাযৰসনো বলী.

৮৩. উভো কুমারা পব্বজিতা, যুধঞ্চযো যুধিট্ঠিলো;

পহায মাতাপিতরো, সঙ্গং ছেত্ৰান মচ্চুনোতি.

যুধঞ্চযজাতকং ছট্ঠং.