৪৪৪. কণ্হদীপাযনজাতকং (৬)

৬২. সত্তাহমেৰাহং পসন্নচিত্তো, পুঞ্ঞত্থিকো আচরিং [অচরিং (সী. স্যা. পী.)] ব্রহ্মচরিযং;

অথাপরং যং চরিতং মমেদং [মম যিদং (স্যা.), মমাযিদং (পী.)], ৰস্সানি পঞ্ঞাস সমাধিকানি;

অকামকো ৰাপি [ৰাহি (পী. ক.)] অহং চরামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো.

৬৩. যস্মা দানং নাভিনন্দিং কদাচি, দিস্ৰানহং অতিথিং ৰাসকালে;

ন চাপি মে অপ্পিযতং অৰেদুং, বহুস্সুতা সমণব্রাহ্মণা চ.

অকামকো ৰাপি অহং দদামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো.

৬৪. আসীৰিসো তাত পহূততেজো, যো তং অদংসী [অডংসী (স্যা.)] সচরা [বিলরা (সী.), পিল়ারা (স্যা.), পতরা (পী.)] উদিচ্চ;

তস্মিঞ্চ মে অপ্পিযতায অজ্জ, পিতরি চ তে নত্থি কোচি ৰিসেসো;

এতেন সচ্চেন সুৰত্থি হোতু, হতং ৰিসং জীৰতু যঞ্ঞদত্তো.

৬৫. সন্তা দন্তাযেৰ [দন্তা সন্তা যে চ (স্যা. ক.)] পরিব্বজন্তি, অঞ্ঞত্র কণ্হা নত্থাকামরূপা [অনকামরূপা (সী. স্যা. পী.)];

দীপাযন কিস্স জিগুচ্ছমানো, অকামকো চরসি ব্রহ্মচরিযং.

৬৬. সদ্ধায নিক্খম্ম পুনং নিৰত্তো, সো এল়মূগোৰ বালো [এল়মূগো চপলো (স্যা. ক.)] ৰতাযং;

এতস্স ৰাদস্স জিগুচ্ছমানো, অকামকো চরামি ব্রহ্মচরিযং;

ৰিঞ্ঞুপ্পসত্থঞ্চ সতঞ্চ ঠানং [ৰিঞ্ঞূপসত্থং ৰসিতং চ ঠানং (ক.)], এৰম্পহং পুঞ্ঞকরো ভৰামি.

৬৭. সমণে তুৰং ব্রাহ্মণে অদ্ধিকে চ, সন্তপ্পযাসি অন্নপানেন ভিক্খং;

ওপানভূতংৰ ঘরং তৰ যিদং, অন্নেন পানেন উপেতরূপং;

অথ কিস্স ৰাদস্স জিগুচ্ছমানো, অকামকো দানমিমং দদাসি.

৬৮. পিতরো চ মে আসুং পিতামহা চ, সদ্ধা অহুং দানপতী ৰদঞ্ঞূ;

তং কুল্লৰত্তং অনুৰত্তমানো, মাহং কুলে অন্তিমগন্ধনো [গন্ধিনো (স্যা. পী. ক.), গন্ধিনী (সী.)] অহুং;

এতস্স ৰাদস্স জিগুচ্ছমানো, অকামকো দানমিমং দদামি.

৬৯. দহরিং কুমারিং অসমত্থপঞ্ঞং, যং তানযিং ঞাতিকুলা সুগত্তে;

ন চাপি মে অপ্পিযতং অৰেদি, অঞ্ঞত্র কামা পরিচারযন্তা [পরিচারযন্তী (সী. পী.)];

অথ কেন ৰণ্ণেন মযা তে ভোতি, সংৰাসধম্মো অহু এৰরূপো.

৭০. আরা দূরে নযিধ কদাচি অত্থি, পরম্পরা নাম কুলে ইমস্মিং;

তং কুল্লৰত্তং অনুৰত্তমানা, মাহং কুলে অন্তিমগন্ধিনী অহুং;

এতস্স ৰাদস্স জিগুচ্ছমানা, অকামিকা পদ্ধচরাম্হি [পট্ঠচরাম্হি (স্যা. ক.)] তুয্হং.

৭১. মণ্ডব্য ভাসিং যমভাসনেয্যং [ভাসিস্সং অভাসনেয্যং (সী. স্যা. পী.), ভাসিস্স’মভাসনেয্যং (?)], তং খম্যতং পুত্তকহেতু মজ্জ;

পুত্তপেমা ন ইধ পরত্থি কিঞ্চি, সো নো অযং জীৰতি যঞ্ঞদত্তোতি.

কণ্হদীপাযনজাতকং [মণ্ডব্যজাতকং (স্যা. ক.)] ছট্ঠং.