৪৪০. কণ্হজাতকং (২)

১১. কণ্হো ৰতাযং পুরিসো, কণ্হং ভুঞ্জতি ভোজনং;

কণ্হে ভূমিপদেসস্মিং, ন ময্হং মনসো পিযো.

১২. ন কণ্হো তচসা হোতি, অন্তোসারো হি ব্রাহ্মণো;

যস্মিং পাপানি কম্মানি, স ৰে কণ্হো সুজম্পতি.

১৩. এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসি.

১৪. ৰরঞ্চে মে অদো সক্ক, সব্বভূতানমিস্সর;

সুনিক্কোধং সুনিদ্দোসং, নিল্লোভং ৰুত্তিমত্তনো;

নিস্নেহমভিকঙ্খামি, এতে মে চতুরো ৰরে.

১৫. কিং নু কোধে ৰা [কোধেৰ (সী. পী.)] দোসে ৰা, লোভে স্নেহে চ ব্রাহ্মণ;

আদীনৰং ত্ৰং পস্সসি [সম্পস্সসি (সী. পী.)], তং মে অক্খাহি পুচ্ছিতো.

১৬. অপ্পো হুত্ৰা বহু হোতি, ৰড্ঢতে সো অখন্তিজো;

আসঙ্গী বহুপাযাসো, তস্মা কোধং ন রোচযে.

১৭. দুট্ঠস্স ফরুসা [পঠমা (পী. সী. নিয্য)] ৰাচা, পরামাসো অনন্তরা;

ততো পাণি ততো দণ্ডো, সত্থস্স পরমা গতি [পরামসতি (ক.)];

দোসো কোধসমুট্ঠানো, তস্মা দোসং ন রোচযে.

১৮. আলোপসাহসাকারা [সহসাকারা (সী. স্যা. পী.)], নিকতী ৰঞ্চনানি চ;

দিস্সন্তি লোভধম্মেসু, তস্মা লোভং ন রোচযে.

১৯. স্নেহসঙ্গথিতা [সঙ্গধিতা (ক.), সঙ্গন্তিতা (স্যা.)] গন্থা, সেন্তি মনোমযা পুথূ;

তে ভুসং উপতাপেন্তি, তস্মা স্নেহং ন রোচযে.

২০. এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসি.

২১. ৰরঞ্চে মে অদো সক্ক, সব্বভূতানমিস্সর;

অরঞ্ঞে মে ৰিহরতো, নিচ্চং একৰিহারিনো;

আবাধা মা [ন (স্যা. পী.)] উপ্পজ্জেয্যুং, অন্তরাযকরা ভুসা.

২২. এতস্মিং তে সুলপিতে, পতিরূপে সুভাসিতে;

ৰরং ব্রাহ্মণ তে দম্মি, যং কিঞ্চি মনসিচ্ছসি.

২৩. ৰরঞ্চে মে অদো সক্ক, সব্বভূতানমিস্সর;

ন মনো ৰা সরীরং ৰা, মং-কতে সক্ক কস্সচি;

কদাচি উপহঞ্ঞেথ, এতং সক্ক ৰরং ৰরেতি.

কণ্হজাতকং দুতিযং.