৪. কুলাৰকৰগ্গো

৩১. কুলাৰকা মাতলি সিম্বলিস্মিং, ঈসামুখেন পরিৰজ্জযস্সু;

কামং চজাম অসুরেসু পাণং, মা মে দিজা ৰিক্কুলৰা [মাযিমে দিজা ৰিকুলাৰা (সী. স্যা. পী.)] অহেসুন্তি.

কুলাৰকজাতকং পঠমং.

৩২. রুদং মনুঞ্ঞং রুচিরা চ পিট্ঠি, ৰেল়ুরিযৰণ্ণূপনিভা [ৰণ্ণূপটিভা (স্যা.), ৰণ্ণসন্নিভা (ক.)] চ গীৰা;

ব্যামমত্তানি চ পেখুণানি, নচ্চেন তে ধীতরং নো দদামীতি.

নচ্চজাতকং দুতিযং.

৩৩. সম্মোদমানা গচ্ছন্তি, জালমাদায পক্খিনো;

যদা তে ৰিৰদিস্সন্তি, তদা এহিন্তি মে ৰসন্তি.

সম্মোদমানজাতকং ততিযং.

৩৪. ন মং সীতং ন মং উণ্হং, ন মং জালস্মি বাধনং;

যঞ্চ মং মঞ্ঞতে মচ্ছী, অঞ্ঞং সো রতিযা গতোতি.

মচ্ছজাতকং চতুত্থং.

৩৫. সন্তি পক্খা অপতনা, সন্তি পাদা অৰঞ্চনা;

মাতাপিতা চ নিক্খন্তা, জাতৰেদ পটিক্কমাতি.

ৰট্টকজাতকং পঞ্চমং.

৩৬. যং নিস্সিতা জগতিরুহং ৰিহঙ্গমা, স্ৰাযং অগ্গিং পমুঞ্চতি;

দিসা ভজথ ৰক্কঙ্গা [ৰঙ্কঙ্গা (স্যা.)], জাতং সরণতো ভযন্তি.

সকুণজাতকং ছট্ঠং.

৩৭. যে ৰুড্ঢ [ৰদ্ধ (সী. পী.)] মপচাযন্তি, নরা ধম্মস্স কোৰিদা;

দিট্ঠেৰ ধম্মে পাসংসা, সম্পরাযে চ সুগ্গতীতি.

তিত্তিরজাতকং সত্তমং.

৩৮. নাচ্চন্তং নিকতিপ্পঞ্ঞো, নিকত্যা সুখমেধতি;

আরাধেতি নিকতিপ্পঞ্ঞো [আরাধে নিকতিপ্পঞ্ঞো (পী.)], বকো কক্কটকামিৰাতি.

বকজাতকং অট্ঠমং.

৩৯. মঞ্ঞে সোৰণ্ণযো রাসি, সোণ্ণমালা চ নন্দকো;

যত্থ দাসো আমজাতো, ঠিতো থুল্লানি [থূলানি (ক.)] গজ্জতীতি.

নন্দজাতকং নৰমং.

৪০. কামং পতামি নিরযং, উদ্ধংপাদো অৰংসিরো;

নানরিযং করিস্সামি, হন্দ পিণ্ডং পটিগ্গহাতি.

খদিরঙ্গারজাতকং দসমং.

কুলাৰকৰগ্গো চতুত্থো.

তস্সুদ্দানং –

সিরিমাতলি ধীতর পক্খিৰরো, রতিযাগতো মাতাপিতা চ পুন;

জগতীরুহ ৰুড্ঢ সুকক্কটকো, তথা নন্দকপিণ্ডৰরেন দসাতি.