৫. অত্থকামৰগ্গো

৪১. যো অত্থকামস্স হিতানুকম্পিনো, ওৰজ্জমানো ন করোতি সাসনং;

অজিযা পাদমোলম্ব [পাদমোলুম্ব (সী. স্যা. পী.)], মিত্তকো ৰিয সোচতীতি.

লোসকজাতকং পঠমং.

৪২. যো অত্থকামস্স হিতানুকম্পিনো, ওৰজ্জমানো ন করোতি সাসনং;

কপোতকস্স ৰচনং অকত্ৰা, অমিত্তহত্থত্থগতোৰ সেতীতি.

কপোতজাতকং দুতিযং.

৪৩. যো অত্থকামস্স হিতানুকম্পিনো, ওৰজ্জমানো ন করোতি সাসনং;

এৰং সো নিহতো সেতি, ৰেল়ুকস্স যথা পিতাতি.

ৰেল়ুকজাতকং ততিযং.

৪৪. সেয্যো অমিত্তো মতিযা উপেতো, ন ত্ৰেৰ মিত্তো মতিৰিপ্পহীনো;

মকসং ৰধিস্সন্তি হি এল়মূগো, পুত্তো পিতু অব্ভিদা উত্তমঙ্গন্তি.

মকসজাতকং চতুত্থং.

৪৫. সেয্যো অমিত্তো মেধাৰী, যঞ্চে বালানুকম্পকো;

পস্স রোহিণিকং জম্মিং, মাতরং হন্ত্ৰান সোচতীতি.

রোহিণিজাতকং পঞ্চমং.

৪৬. ন ৰে অনত্থকুসলেন, অত্থচরিযা সুখাৰহা;

হাপেতি অত্থং দুম্মেধো, কপি আরামিকো যথাতি.

আরামদূসকজাতকং ছট্ঠং.

৪৭. ন ৰে অনত্থকুসলেন, অত্থচরিযা সুখাৰহা;

হাপেতি অত্থং দুম্মেধো, কোণ্ডঞ্ঞো ৰারুণিং যথাতি.

ৰারুণিদূসকজাতকং সত্তমং.

৪৮. অনুপাযেন যো অত্থং, ইচ্ছতি সো ৰিহঞ্ঞতি;

চেতা হনিংসু ৰেদব্বং [ৰেদব্ভং (সী. পী.)], সব্বে তে ব্যসনমজ্ঝগূতি.

ৰেদব্ব [ৰেদব্ভ (সী. পী.)] জাতকং অট্ঠমং.

৪৯. নক্খত্তং পটিমানেন্তং, অত্থো বালং উপচ্চগা;

অত্থো অত্থস্স নক্খত্তং, কিং করিস্সন্তি তারকাতি.

নক্খত্তজাতকং নৰমং.

৫০. দুম্মেধানং সহস্সেন, যঞ্ঞো মে উপযাচিতো;

ইদানি খোহং যজিস্সামি, বহু [বহূ (সী. পী.), বহুং (ক.)] অধম্মিকো জনোতি.

দুম্মেধজাতকং দসমং.

অত্থকামৰগ্গো পঞ্চমো.

তস্সুদ্দানং –

অথ মিত্তক মাতু কপোতৰরো, তথা ৰেল়ূক এল়মূগো রোহিণী;

কপি ৰারুণি চেতচরা চ পুন, তথা তারক যঞ্ঞৰরেন দসাতি.

পঠমো পণ্ণাসকো.