১৫. ককণ্টকৰগ্গো

১৪১. গোধজাতকং

১৪১. ন পাপজনসংসেৰী, অচ্চন্তসুখমেধতি;

গোধাকুলং [গোধক্কুলং (ক.)] ককণ্টাৰ [ককণ্টকা (ক.)], কলিং পাপেতি অত্তনন্তি.

গোধজাতকং পঠমং.

১৪২. সিঙ্গালজাতকং

১৪২. এতঞ্হি তে দুরাজানং, যং সেসি মতসাযিকং;

যস্স তে কড্ঢমানস্স, হত্থা দণ্ডো ন মুচ্চতীতি.

সিঙ্গালজাতকং দুতিযং.

১৪৩. ৰিরোচজাতকং

১৪৩. লসী চ তে নিপ্ফলিতা, মত্থকো চ পদালিতো [ৰিদালিতো (সী. পী.)];

সব্বা তে ফাসুকা ভগ্গা, অজ্জ খো ত্ৰং ৰিরোচসীতি.

ৰিরোচজাতকং ততিযং.

১৪৪. নঙ্গুট্ঠজাতকং

১৪৪. বহুম্পেতং অসব্ভি [বহুপেতমসব্ভি (ক.)] জাতৰেদ, যং তং ৰালধিনাভিপূজযাম;

মংসারহস্স নত্থজ্জ মংসং, নঙ্গুট্ঠম্পি ভৰং পটিগ্গহাতূতি.

নঙ্গুট্ঠজাতকং চতুত্থং.

১৪৫. রাধজাতকং

১৪৫. ন ত্ৰং রাধ ৰিজানাসি, অড্ঢরত্তে অনাগতে;

অব্যযতং [অব্যাযতং (সী. স্যা. পী.), অব্যত্ততং (?)] ৰিলপসি, ৰিরত্তা কোসিযাযনেতি.

রাধজাতকং পঞ্চমং.

১৪৬. সমুদ্দকাকজাতকং

১৪৬. অপি নু হনুকা সন্তা, মুখঞ্চ পরিসুস্সতি;

ওরমাম ন পারেম, পূরতেৰ মহোদধীতি.

সমুদ্দকাকজাতকং ছট্ঠং.

১৪৭. পুপ্ফরত্তজাতকং

১৪৭. নযিদং দুক্খং অদুং দুক্খং, যং মং তুদতি ৰাযসো;

যং সামা পুপ্ফরত্তেন, কত্তিকং নানুভোস্সতীতি.

পুপ্ফরত্তজাতকং সত্তমং.

১৪৮. সিঙ্গালজাতকং

১৪৮. নাহং পুনং ন চ পুনং, ন চাপি অপুনপ্পুনং;

হত্থিবোন্দিং পৰেক্খামি, তথা হি ভযতজ্জিতোতি.

সিঙ্গালজাতকং অট্ঠমং.

১৪৯. একপণ্ণজাতকং

১৪৯. একপণ্ণো অযং রুক্খো, ন ভূম্যা চতুরঙ্গুলো;

ফলেন ৰিসকপ্পেন, মহাযং কিং ভৰিস্সতীতি.

একপণ্ণজাতকং নৰমং.

১৫০. সঞ্জীৰজাতকং

১৫০. অসন্তং যো পগ্গণ্হাতি, অসন্তং চূপসেৰতি;

তমেৰ ঘাসং কুরুতে, ব্যগ্ঘো সঞ্জীৰকো যথাতি.

সঞ্জীৰজাতকং দসমং.

ককণ্টক [পাপসেৰন (ক.)] ৰগ্গো পন্নরসমো.

তস্সুদ্দানং –

সুখমেধতি দণ্ডৰরো চ পুন, লসি ৰালধি পঞ্চমরাধৰরো;

সমহোদধি কত্তিক বোন্দি পুন, চতুরঙ্গুলব্যগ্ঘৰরেন দসাতি.

(উপরিমো পণ্ণাসকো.) [( ) সীহল়পোত্থকেযেৰ দিস্সতি]

অথ ৰগ্গুদ্দানং –

অপণ্ণকং সীলৰগ্গকুরুঙ্গ, কুলাৰকং অত্থকামেন পঞ্চমং;

আসীসো ইত্থিৰরুণং অপাযি, লিত্তৰগ্গেন তে দস;

পরোসতং হংচি কুসনাল়ি [হংসি সরিক্খং (সব্বত্থ)], অসম্পদং ককণ্টকৰগ্গো.

একনিপাতম্হিলঙ্কতন্তি.

এককনিপাতং নিট্ঠিতং.