১১. পরোসতৰগ্গো

১০১. পরোসতং চেপি সমাগতানং, ঝাযেয্যুং তে ৰস্সসতং অপঞ্ঞা;

একোৰ সেয্যো পুরিসো সপঞ্ঞো, যো ভাসিতস্স ৰিজানাতি অত্থন্তি.

পরোসতজাতকং পঠমং.

১০২. যো দুক্খফুট্ঠায ভৰেয্য তাণং, সো মে পিতা দুব্ভি [দূভি (সী. পী.)] ৰনে করোতি;

সা কস্স কন্দামি ৰনস্স মজ্ঝে, যো তাযিতা সো সহসং [সহসা (সী. স্যা. পী.)] করোতীতি.

পণ্ণিকজাতকং দুতিযং.

১০৩. যত্থ ৰেরী নিৰিসতি [নিৰসতি (সী. ক.)], ন ৰসে তত্থ পণ্ডিতো;

একরত্তং দিরত্তং ৰা, দুক্খং ৰসতি ৰেরিসূতি.

ৰেরিজাতকং ততিযং.

১০৪. চতুব্ভি অট্ঠজ্ঝগমা, অট্ঠাহিপি চ সোল়স;

সোল়সাহি চ বাত্তিংস [বত্তিংস (সী. স্যা. পী.)], অত্রিচ্ছং চক্কমাসদো;

ইচ্ছাহতস্স পোসস্স, চক্কং ভমতি মত্থকেতি.

মিত্তৰিন্দকজাতকং চতুত্থং.

১০৫. বহুম্পেতং ৰনে কট্ঠং, ৰাতো ভঞ্জতি দুব্বলং;

তস্স চে ভাযসী নাগ, কিসো নূন ভৰিস্সসীতি.

দুব্বলকট্ঠজাতকং পঞ্চমং.

১০৬. সুখং ৰত মং জীৰন্তং [সুখকং ৰত জীৰং (ক.)], পচমানা উদঞ্চনী;

চোরী জাযপ্পৰাদেন, তেলং লোণঞ্চ যাচতীতি.

উদঞ্চনীজাতকং ছট্ঠং.

১০৭. সাধু খো সিপ্পকং নাম, অপি যাদিস কীদিসং;

পস্স খঞ্জপ্পহারেন, লদ্ধা গামা চতুদ্দিসাতি.

সালিত্তকজাতকং সত্তমং.

১০৮. সিক্খেয্য সিক্খিতব্বানি, সন্তি তচ্ছন্দিনো [সচ্ছন্দিনো (সী. পী.)] জনা;

বাহিযা হি [পি (সী. স্যা. পী.)] সুহন্নেন, রাজানমভিরাধযীতি.

বাহিযজাতকং অট্ঠমং.

১০৯. যথন্নো পুরিসো হোতি, তথন্না তস্স দেৰতা;

আহরেতং কুণ্ডপূৰং [কণং পূৰং (সী. পী.)], মা মে ভাগং ৰিনাসযাতি.

কুণ্ডপূৰজাতকং নৰমং.

১১০. সব্বসংহারকো [সব্বসাহারকো (ক.)] নত্থি, সুদ্ধং কঙ্গু পৰাযতি;

অলিকং ভাযতিযং ধুত্তী, সচ্চমাহ মহল্লিকাতি.

সব্বসংহারকপঞ্হজাতকং দসমং.

পরোসতৰগ্গো একাদসমো.

তস্সুদ্দানং –

সপরোসত তাযিত ৰেরী পুন, ভমচক্কথ নাগসিরিৰ্হযনো;

সুখকঞ্চ ৰত সিপ্পক বাহিযা, কুণ্ডপূৰ মহল্লিককা চ দসাতি.