১২. হংচিৰগ্গো

১১১. গদ্রভপঞ্হজাতকং

১১১. হংচি [হংসি (সী. স্যা.), হঞ্চি (?)] তুৰং এৰমঞ্ঞসি সেয্যো, পুত্তেন পিতাতি রাজসেট্ঠ;

হন্দস্সতরস্স তে অযং, অস্সতরস্স হি গদ্রভো পিতাতি.

গদ্রভপঞ্হজাতকং পঠমং.

১১২. অমরাদেৰীপঞ্হজাতকং

১১২. যেন সত্তুবিলঙ্গা চ, দিগুণপলাসো চ পুপ্ফিতো;

যেন দদামি [যেনা’দামি (সী. স্যা.)] তেন ৰদামি, যেন ন দদামি [যেন না’দামি (সী. স্যা.)] ন তেন ৰদামি;

এস মগ্গো যৰমজ্ঝকস্স, এতং ছন্নপথং ৰিজানাহীতি.

অমরাদেৰীপঞ্হজাতকং দুতিযং.

১১৩. সিঙ্গালজাতকং

১১৩. সদ্দহাসি সিঙ্গালস্স [সিগালস্স (সী. স্যা. পী.)], সুরাপীতস্স ব্রাহ্মণ;

সিপ্পিকানং সতং নত্থি, কুতো কংসসতা দুৰেতি.

সিঙ্গালজাতকং ততিযং.

১১৪. মিতচিন্তিজাতকং

১১৪. বহুচিন্তী অপ্পচিন্তী, উভো জালে অবজ্ঝরে;

মিতচিন্তী পমোচেসী, উভো তত্থ সমাগতাতি.

মিতচিন্তিজাতকং চতুত্থং.

১১৫. অনুসাসিকজাতকং

১১৫. যাযঞ্ঞ [যাযঞ্ঞে (ক.)] মনুসাসতি, সযং লোলুপ্পচারিনী;

সাযং ৰিপক্খিকা সেতি, হতা চক্কেন সাসিকাতি [সালিকাতি (সী. স্যা. পী.)].

অনুসাসিকজাতকং পঞ্চমং.

১১৬. দুব্বচজাতকং

১১৬. অতিকরমকরাচরিয, ময্হম্পেতং ন রুচ্চতি;

চতুত্থে লঙ্ঘযিত্ৰান, পঞ্চমাযসি আৰুতোতি.

দুব্বচজাতকং ছট্ঠং.

১১৭. তিত্তিরজাতকং

১১৭. অচ্চুগ্গতাতিলপতা [অতিবলতা (সী. স্যা. পী.), অতিলপকা (কত্থচি)], অতিৰেলং পভাসিতা;

ৰাচা হনতি দুম্মেধং, তিত্তিরংৰাতিৰস্সিতন্তি.

তিত্তিরজাতকং সত্তমং.

১১৮. ৰট্টকজাতকং

১১৮. নাচিন্তযন্তো পুরিসো, ৰিসেসমধিগচ্ছতি;

চিন্তিতস্স ফলং পস্স, মুত্তোস্মি ৰধবন্ধনাতি.

ৰট্টকজাতকং অট্ঠমং.

১১৯. অকালরাৰিজাতকং

১১৯. অমাতাপিতরসংৰদ্ধো [পিতরি (সী. পী.), পিতু (স্যা.)], অনাচেরকুলে ৰসং;

নাযং কালং অকালং ৰা, অভিজানাতি কুক্কুটোতি.

অকালরাৰিজাতকং নৰমং.

১২০. বন্ধনমোক্খজাতকং

১২০. অবদ্ধা তত্থ বজ্ঝন্তি, যত্থ বালা পভাসরে;

বদ্ধাপি তত্থ মুচ্চন্তি, যত্থ ধীরা পভাসরেতি.

বন্ধনমোক্খজাতকং দসমং.

হংচিৰগ্গো [হংসিৰগ্গো (সী. স্যা.)] দ্ৰাদসমো.

তস্সুদ্দানং –

অথ গদ্রভ সত্তুৰ কংসসতং, বহুচিন্তি সাসিকাযাতিকর;

অতিৰেল ৰিসেসমনাচরিযোৰ, ধীরাপভাসরতেন দসাতি.