১০. লিত্তৰগ্গো

৯১. লিত্তং পরমেন তেজসা, গিলমক্খং পুরিসো ন বুজ্ঝতি;

গিল রে গিল পাপধুত্তক, পচ্ছা তে কটুকং ভৰিস্সতীতি.

লিত্তজাতকং পঠমং.

৯২. উক্কট্ঠে সূরমিচ্ছন্তি, মন্তীসু অকুতূহলং;

পিযঞ্চ অন্নপানম্হি, অত্থে জাতে চ পণ্ডিতন্তি.

মহাসারজাতকং দুতিযং.

৯৩. ন ৰিস্সসে অৰিস্সত্থে, ৰিস্সত্থেপি ন ৰিস্সসে;

ৰিস্সাসা ভযমন্ৰেতি, সীহংৰ মিগমাতুকাতি [মিগমাতুযা (ক.)].

ৰিসাসভোজনজাতকং ততিযং.

৯৪. সোতত্তো সোসিন্দো [সোসীতো (সী. স্যা. পী.), সোসিনো (ক.)] চেৰ, একো ভিংসনকে ৰনে;

নগ্গো ন চগ্গিমাসীনো, এসনাপসুতো মুনীতি.

লোমহংসজাতকং চতুত্থং.

৯৫. অনিচ্চা ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখোতি.

মহাসুদস্সনজাতকং পঞ্চমং.

৯৬. সমতিত্তিকং অনৰসেকং, তেলপত্তং যথা পরিহরেয্য;

এৰং সচিত্তমনুরক্খে, পত্থযানো দিসং অগতপুব্বন্তি.

তেলপত্তজাতকং ছট্ঠং.

৯৭. জীৰকঞ্চ মতং দিস্ৰা, ধনপালিঞ্চ দুগ্গতং;

পন্থকঞ্চ ৰনে মূল়্হং, পাপকো পুনরাগতোতি.

নামসিদ্ধিজাতকং সত্তমং.

৯৮. সাধু খো পণ্ডিতো নাম, ন ত্ৰেৰ অতিপণ্ডিতো;

অতিপণ্ডিতেন পুত্তেন, মনম্হি উপকূল়িতোতি [উপকূলিতোতি (সী.), উপকুট্ঠিতোতি (স্যা.), উপকুটিতো (ক.)].

কূটৰাণিজজাতকং অট্ঠমং.

৯৯. পরোসহস্সম্পি সমাগতানং, কন্দেয্যুং তে ৰস্সসতং অপঞ্ঞা;

একোৰ সেয্যো পুরিসো সপঞ্ঞো, যো ভাসিতস্স ৰিজানাতি অত্থন্তি.

পরোসহস্সজাতকং নৰমং.

১০০. অসাতং সাতরূপেন, পিযরূপেন অপ্পিযং;

দুক্খং সুখস্স রূপেন, পমত্তমতিৰত্ততীতি.

অসাতরূপজাতকং দসমং.

লিত্তৰগ্গো দসমো.

তস্সুদ্দানং –

গিলমক্খকুতূহল মাতুকস্সা, মুনিনা চ অনিচ্চত পত্তৰরং;

ধনপালিৰরো অতিপণ্ডিতকো, সপরোসহস্সঅসাতদসাতি.

মজ্ঝিমো পণ্ণাসকো.