৩. ততিযৰগ্গো

১. মিচ্ছাদিট্ঠিকসুত্তং

৭০. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘দিট্ঠা মযা, ভিক্খৰে, সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা. তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না.

‘‘তং খো পনাহং, ভিক্খৰে, নাঞ্ঞস্স সমণস্স ৰা ব্রাহ্মণস্স ৰা সুত্ৰা ৰদামি. দিট্ঠা মযা, ভিক্খৰে, সত্তা কাযদুচ্চরিতেন সমন্নাগতা ৰচীদুচ্চরিতেন সমন্নাগতা মনোদুচ্চরিতেন সমন্নাগতা অরিযানং উপৰাদকা মিচ্ছাদিট্ঠিকা মিচ্ছাদিট্ঠিকম্মসমাদানা. তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপন্না. অপি চ, ভিক্খৰে, যদেৰ সামং ঞাতং সামং দিট্ঠং সামং ৰিদিতং তদেৰাহং ৰদামি.

‘‘মিচ্ছা মনং পণিধায, মিচ্ছা ৰাচঞ্চ ভাসিয [মিচা ৰাচং অভাসিয (সব্বত্থ)];

মিচ্ছা কম্মানি কত্ৰান, কাযেন ইধ পুগ্গলো.

‘‘অপ্পস্সুতাপুঞ্ঞকরো [অপ্পস্সুতোপুঞ্ঞকরো (সী.), অপ্পস্সুতো অপুঞ্ঞকরো (স্যা. পী.)], অপ্পস্মিং ইধ জীৰিতে;

কাযস্স ভেদা দুপ্পঞ্ঞো, নিরযং সোপপজ্জতী’’তি.

অযম্পি অত্থো ৰুত্তো ভগৰতা, ইতি মে সুতন্তি. পঠমং.

২. সম্মাদিট্ঠিকসুত্তং

৭১. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘দিট্ঠা মযা, ভিক্খৰে, সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা. তে কাযস্স ভেদা পরং মরণা সুগতিং সগ্গং লোকং উপপন্না.

‘‘তং খো পনাহং, ভিক্খৰে, নাঞ্ঞস্স সমণস্স ৰা ব্রাহ্মণস্স ৰা সুত্ৰা ৰদামি. দিট্ঠা মযা, ভিক্খৰে, সত্তা কাযসুচরিতেন সমন্নাগতা ৰচীসুচরিতেন সমন্নাগতা মনোসুচরিতেন সমন্নাগতা অরিযানং অনুপৰাদকা সম্মাদিট্ঠিকা সম্মাদিট্ঠিকম্মসমাদানা. তে কাযস্স ভেদা পরং মরণা সুগতিং সগ্গং লোকং উপপন্না. অপি চ, ভিক্খৰে, যদেৰ সামং ঞাতং সামং দিট্ঠং সামং ৰিদিতং তদেৰাহং ৰদামি.

‘‘সম্মা মনং পণিধায, সম্মা ৰাচঞ্চ ভাসিয [সম্মা ৰাচং অভাসিয (সব্বত্থ)];

সম্মা কম্মানি কত্ৰান, কাযেন ইধ পুগ্গলো.

‘‘বহুস্সুতো পুঞ্ঞকরো, অপ্পস্মিং ইধ জীৰিতে;

কাযস্স ভেদা সপ্পঞ্ঞো, সগ্গং সো উপপজ্জতী’’তি.

অযম্পি অত্থো ৰুত্তো ভগৰতা, ইতি মে সুতন্তি. দুতিযং.

৩. নিস্সরণিযসুত্তং

৭২. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘তিস্সো ইমা, ভিক্খৰে, নিস্সরণিযা [নিস্সারণীযা (অ. নি. ৫.২০০)] ধাতুযো. কতমা তিস্সো? কামানমেতং নিস্সরণং যদিদং নেক্খম্মং, রূপানমেতং নিস্সরণং যদিদং আরুপ্পং, যং খো পন কিঞ্চি ভূতং সঙ্খতং পটিচ্চসমুপ্পন্নং নিরোধো তস্স নিস্সরণং – ইমা খো, ভিক্খৰে, তিস্সো নিস্সরণিযা ধাতুযো’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘কামনিস্সরণং ঞত্ৰা, রূপানঞ্চ অতিক্কমং;

সব্বসঙ্খারসমথং, ফুসং আতাপি সব্বদা.

‘‘স ৰে সম্মদ্দসো ভিক্খু, যতো তত্থ ৰিমুচ্চতি;

অভিঞ্ঞাৰোসিতো সন্তো, স ৰে যোগাতিগো মুনী’’তি.

অযম্পি অত্থো ৰুত্তো ভগৰতা, ইতি মে সুতন্তি. ততিযং.

৪. সন্ততরসুত্তং

৭৩. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘রূপেহি, ভিক্খৰে, অরূপা [আরুপ্পা (সী.)] সন্ততরা, অরূপেহি নিরোধো সন্ততরো’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘যে চ রূপূপগা সত্তা, যে চ অরূপট্ঠাযিনো [আরুপ্পট্ঠাযিনো (সী.)];

নিরোধং অপ্পজানন্তা, আগন্তারো পুনব্ভৰং.

‘‘যে চ রূপে পরিঞ্ঞায, অরূপেসু অসণ্ঠিতা;

নিরোধে যে ৰিমুচ্চন্তি, তে জনা মচ্চুহাযিনো.

‘‘কাযেন অমতং ধাতুং, ফুসযিত্ৰা নিরূপধিং;

উপধিপ্পটিনিস্সগ্গং, সচ্ছিকত্ৰা অনাসৰো;

দেসেতি সম্মাসম্বুদ্ধো, অসোকং ৰিরজং পদ’’ন্তি.

অযম্পি অত্থো ৰুত্তো ভগৰতা, ইতি মে সুতন্তি. চতুত্থং.

৫. পুত্তসুত্তং

৭৪. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘তযোমে, ভিক্খৰে, পুত্তা সন্তো সংৰিজ্জমানা লোকস্মিং. কতমে তযো? অতিজাতো, অনুজাতো, অৰজাতোতি.

‘‘কথঞ্চ, ভিক্খৰে, পুত্তো অতিজাতো হোতি? ইধ, ভিক্খৰে, পুত্তস্স মাতাপিতরো হোন্তি ন বুদ্ধং সরণং গতা, ন ধম্মং সরণং গতা, ন সঙ্ঘং সরণং গতা; পাণাতিপাতা অপ্পটিৰিরতা, অদিন্নাদানা অপ্পটিৰিরতা, কামেসুমিচ্ছাচারা অপ্পটিৰিরতা, মুসাৰাদা অপ্পটিৰিরতা, সুরামেরযমজ্জপমাদট্ঠানা অপ্পটিৰিরতা, দুস্সীলা পাপধম্মা. পুত্তো চ নেসং হোতি বুদ্ধং সরণং গতো, ধম্মং সরণং গতো, সঙ্ঘং সরণং গতো; পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, সুরামেরযমজ্জপমাদট্ঠানা পটিৰিরতো, সীলৰা কল্যাণধম্মো. এৰং খো, ভিক্খৰে, পুত্তো অতিজাতো হোতি.

‘‘কথঞ্চ, ভিক্খৰে, পুত্তো অনুজাতো হোতি? ইধ, ভিক্খৰে, পুত্তস্স মাতাপিতরো হোন্তি বুদ্ধং সরণং গতা, ধম্মং সরণং গতা, সঙ্ঘং সরণং গতা; পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপমাদট্ঠানা পটিৰিরতা, সীলৰন্তো কল্যাণধম্মা. পুত্তোপি নেসং হোতি বুদ্ধং সরণং গতো, ধম্মং সরণং গতো, সঙ্ঘং সরণং গতো; পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, সুরামেরযমজ্জপমাদট্ঠানা পটিৰিরতো, সীলৰা কল্যাণধম্মো. এৰং খো, ভিক্খৰে, পুত্তো অনুজাতো হোতি.

‘‘কথঞ্চ, ভিক্খৰে, পুত্তো অৰজাতো হোতি? ইধ, ভিক্খৰে, পুত্তস্স মাতাপিতরো হোন্তি বুদ্ধং সরণং গতা, ধম্মং সরণং গতা, সঙ্ঘং সরণং গতা; পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপমাদট্ঠানা পটিৰিরতা, সীলৰন্তো কল্যাণধম্মা. পুত্তো চ নেসং হোতি ন বুদ্ধং সরণং গতো, ন ধম্মং সরণং গতো, ন সঙ্ঘং সরণং গতো; পাণাতিপাতা অপ্পটিৰিরতো, অদিন্নাদানা অপ্পটিৰিরতো, কামেসুমিচ্ছাচারা অপ্পটিৰিরতো, মুসাৰাদা অপ্পটিৰিরতো, সুরামেরযমজ্জপমাদট্ঠানা অপ্পটিৰিরতো, দুস্সীলো পাপধম্মো. এৰং খো, ভিক্খৰে, পুত্তো অৰজাতো হোতি. ইমে খো, ভিক্খৰে, তযো পুত্তা সন্তো সংৰিজ্জমানা লোকস্মি’’ন্তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘অতিজাতং অনুজাতং, পুত্তমিচ্ছন্তি পণ্ডিতা;

অৰজাতং ন ইচ্ছন্তি, যো হোতি কুলগন্ধনো.

‘‘এতে খো পুত্তা লোকস্মিং, যে ভৰন্তি উপাসকা;

সদ্ধা সীলেন সম্পন্না, ৰদঞ্ঞূ ৰীতমচ্ছরা;

চন্দো অব্ভঘনা মুত্তো, পরিসাসু ৰিরোচরে’’তি.

অযম্পি অত্থো ৰুত্তো ভগৰতা, ইতি মে সুতন্তি. পঞ্চমং.

৬. অৰুট্ঠিকসুত্তং

৭৫. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘তযোমে, ভিক্খৰে, পুগ্গলা সন্তো সংৰিজ্জমানা লোকস্মিং. কতমে তযো? অৰুট্ঠিকসমো, পদেসৰস্সী, সব্বত্থাভিৰস্সী.

‘‘কথঞ্চ, ভিক্খৰে, পুগ্গলো অৰুট্ঠিকসমো হোতি? ইধ, ভিক্খৰে, একচ্চো পুগ্গলো সব্বেসঞ্ঞেৰ ন দাতা হোতি, সমণব্রাহ্মণকপণদ্ধিকৰনিব্বকযাচকানং [… ৰণিব্বকযাচকানং (সী.)] অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. এৰং খো, ভিক্খৰে, পুগ্গলো অৰুট্ঠিকসমো হোতি.

‘‘কথঞ্চ, ভিক্খৰে, পুগ্গলো পদেসৰস্সী হোতি? ইধ, ভিক্খৰে, একচ্চো পুগ্গলো একচ্চানং দাতা (হোতি) [( ) নত্থি স্যামপোত্থকে], একচ্চানং ন দাতা হোতি সমণব্রাহ্মণকপণদ্ধিকৰনিব্বকযাচকানং অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. এৰং খো, ভিক্খৰে, পুগ্গলো পদেসৰস্সী হোতি.

‘‘কথঞ্চ, ভিক্খৰে, পুগ্গলো সব্বত্থাভিৰস্সী হোতি? ইধ, ভিক্খৰে, একচ্চো পুগ্গলো সব্বেসংৰ দেতি, সমণব্রাহ্মণকপণদ্ধিকৰনিব্বকযাচকানং অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং. এৰং খো, ভিক্খৰে, পুগ্গলো সব্বত্থাভিৰস্সী হোতি. ইমে খো, ভিক্খৰে, তযো পুগ্গলা সন্তো সংৰিজ্জমানা লোকস্মি’’ন্তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘ন সমণে ন ব্রাহ্মণে, ন কপণদ্ধিকৰনিব্বকে;

লদ্ধান সংৰিভাজেতি, অন্নং পানঞ্চ ভোজনং;

তং ৰে অৰুট্ঠিকসমোতি, আহু নং পুরিসাধমং.

‘‘একচ্চানং ন দদাতি, একচ্চানং পৰেচ্ছতি;

তং ৰে পদেসৰস্সীতি, আহু মেধাৰিনো জনা.

‘‘সুভিক্খৰাচো পুরিসো, সব্বভূতানুকম্পকো;

আমোদমানো পকিরেতি, দেথ দেথাতি ভাসতি.

‘‘যথাপি মেঘো থনযিত্ৰা, গজ্জযিত্ৰা পৰস্সতি;

থলং নিন্নঞ্চ পূরেতি, অভিসন্দন্তোৰ [অভিসন্দেন্তোৰ (?)] ৰারিনা.

‘‘এৰমেৰ ইধেকচ্চো, পুগ্গলো হোতি তাদিসো;

ধম্মেন সংহরিত্ৰান, উট্ঠানাধিগতং ধনং;

তপ্পেতি অন্নপানেন, সম্মা পত্তে ৰনিব্বকে’’তি.

অযম্পি অত্থো ৰুত্তো ভগৰতা, ইতি মে সুতন্তি. ছট্ঠং.

৭. সুখপত্থনাসুত্তং

৭৬. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘তীণিমানি, ভিক্খৰে, সুখানি পত্থযমানো সীলং রক্খেয্য পণ্ডিতো. কতমানি তীণি? পসংসা মে আগচ্ছতূতি [আগচ্ছন্তূতি (স্যা.)] সীলং রক্খেয্য পণ্ডিতো, ভোগা মে উপ্পজ্জন্তূতি সীলং রক্খেয্য পণ্ডিতো, কাযস্স ভেদা পরং মরণা সুগতিং সগ্গং লোকং উপপজ্জিস্সামীতি সীলং রক্খেয্য পণ্ডিতো. ইমানি খো, ভিক্খৰে, তীণি সুখানি পত্থযমানো সীলং রক্খেয্য পণ্ডিতো’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘সীলং রক্খেয্য মেধাৰী, পত্থযানো তযো সুখে;

পসংসং ৰিত্তলাভঞ্চ, পেচ্চ সগ্গে পমোদনং.

‘‘অকরোন্তোপি চে পাপং, করোন্তমুপসেৰতি;

সঙ্কিযো হোতি পাপস্মিং, অৰণ্ণো চস্স রূহতি.

‘‘যাদিসং কুরুতে মিত্তং, যাদিসং চূপসেৰতি;

স ৰে তাদিসকো হোতি, সহৰাসো হি [সহৰাসোপি (সী. ক.)] তাদিসো.

‘‘সেৰমানো সেৰমানং, সম্ফুট্ঠো সম্ফুসং পরং;

সরো দিদ্ধো কলাপংৰ, অলিত্তমুপলিম্পতি;

উপলেপভযা [উপলিম্পভযা (ক.)] ধীরো, নেৰ পাপসখা সিযা.

‘‘পূতিমচ্ছং কুসগ্গেন, যো নরো উপনয্হতি;

কুসাপি পূতি ৰাযন্তি, এৰং বালূপসেৰনা.

‘‘তগরঞ্চ পলাসেন, যো নরো উপনয্হতি;

পত্তাপি সুরভি ৰাযন্তি, এৰং ধীরূপসেৰনা.

‘‘তস্মা পত্তপুটস্সেৰ [পলাসপুটস্সেৰ (পী. ক.)], ঞত্ৰা সম্পাকমত্তনো;

অসন্তে নুপসেৰেয্য, সন্তে সেৰেয্য পণ্ডিতো;

অসন্তো নিরযং নেন্তি, সন্তো পাপেন্তি সুগ্গতি’’ন্তি.

অযম্পি অত্থো ৰুত্তো ভগৰতা, ইতি মে সুতন্তি. সত্তমং.

৮. ভিদুরসুত্তং

৭৭. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘ভিদুরাযং [ভিন্দন্তাযং (স্যা. পী. ক.)], ভিক্খৰে, কাযো, ৰিঞ্ঞাণং ৰিরাগধম্মং, সব্বে উপধী অনিচ্চা দুক্খা ৰিপরিণামধম্মা’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘কাযঞ্চ ভিদুরং [ভিন্দন্তং (স্যা. পী. ক.)] ঞত্ৰা, ৰিঞ্ঞাণঞ্চ ৰিরাগুনং [ৰিরাগিকং (ক. সী.), পভঙ্গুণং (স্যা.)];

উপধীসু ভযং দিস্ৰা, জাতিমরণমচ্চগা;

সম্পত্ৰা পরমং সন্তিং, কালং কঙ্খতি ভাৰিতত্তো’’তি.

অযম্পি অত্থো ৰুত্তো ভগৰতা, ইতি মে সুতন্তি. অট্ঠমং.

৯. ধাতুসোসংসন্দনসুত্তং

৭৮. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘ধাতুসো, ভিক্খৰে, সত্তা সত্তেহি সদ্ধিং সংসন্দন্তি সমেন্তি. হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দন্তি সমেন্তি, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দন্তি সমেন্তি.

‘‘অতীতম্পি, ভিক্খৰে, অদ্ধানং ধাতুসোৰ সত্তা সত্তেহি সদ্ধিং সংসন্দিংসু সমিংসু. হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দিংসু সমিংসু, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দিংসু সমিংসু.

‘‘অনাগতম্পি, ভিক্খৰে, অদ্ধানং ধাতুসোৰ সত্তা সত্তেহি সদ্ধিং সংসন্দিস্সন্তি সমেস্সন্তি. হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দিস্সন্তি সমেস্সন্তি, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দিস্সন্তি সমেস্সন্তি.

‘‘এতরহিপি, ভিক্খৰে, পচ্চুপ্পনং অদ্ধানং ধাতুসোৰ সত্তা সত্তেহি সদ্ধিং সংসন্দন্তি সমেন্তি. হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দন্তি সমেন্তি, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দন্তি সমেন্তী’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘সংসগ্গা ৰনথো জাতো, অসংসগ্গেন ছিজ্জতি;

পরিত্তং দারুমারুয্হ, যথা সীদে মহণ্ণৰে.

‘‘এৰং কুসীতমাগম্ম, সাধুজীৰীপি সীদতি;

তস্মা তং পরিৰজ্জেয্য, কুসীতং হীনৰীরিযং.

‘‘পৰিৰিত্তেহি অরিযেহি, পহিতত্তেহি ঝাযিভি;

নিচ্চং আরদ্ধৰীরিযেহি, পণ্ডিতেহি সহাৰসে’’তি.

অযম্পি অত্থো ৰুত্তো ভগৰতা, ইতি মে সুতন্তি. নৰমং.

১০. পরিহানসুত্তং

৭৯. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘তযোমে, ভিক্খৰে, ধম্মা সেখস্স ভিক্খুনো পরিহানায সংৰত্তন্তি. কতমে তযো? ইধ, ভিক্খৰে, সেখো ভিক্খু কম্মারামো হোতি, কম্মরতো, কম্মারামতমনুযুত্তো; ভস্সারামো হোতি, ভস্সরতো, ভস্সারামতমনুযুত্তো; নিদ্দারামো হোতি, নিদ্দারতো, নিদ্দারামতমনুযুত্তো. ইমে খো, ভিক্খৰে, তযো ধম্মা সেখস্স ভিক্খুনো পরিহানায সংৰত্তন্তি.

‘‘তযোমে, ভিক্খৰে, ধম্মা সেখস্স ভিক্খুনো অপরিহানায সংৰত্তন্তি. কতমে তযো? ইধ, ভিক্খৰে, সেখো ভিক্খু ন কম্মারামো হোতি, ন কম্মরতো, ন কম্মারামতমনুযুত্তো; ন ভস্সারামো হোতি, ন ভস্সরতো, ন ভস্সারামতমনুযুত্তো; ন নিদ্দারামো হোতি, ন নিদ্দারতো, ন নিদ্দারামতমনুযুত্তো. ইমে খো, ভিক্খৰে, তযো ধম্মা সেখস্স ভিক্খুনো অপরিহানায সংৰত্তন্তী’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘কম্মারামো ভস্সারামো [ভস্সরতো (সব্বথ)], নিদ্দারামো চ উদ্ধতো;

অভব্বো তাদিসো ভিক্খু, ফুট্ঠুং সম্বোধিমুত্তমং.

‘‘তস্মা হি অপ্পকিচ্চস্স, অপ্পমিদ্ধো অনুদ্ধতো;

ভব্বো সো তাদিসো ভিক্খু, ফুট্ঠুং সম্বোধিমুত্তম’’ন্তি.

অযম্পি অত্থো ৰুত্তো ভগৰতা, ইতি মে সুতন্তি. দসমং.

ততিযো ৰগ্গো নিট্ঠিতো.

তস্সুদ্দানং –

দ্ৰে দিট্ঠী নিস্সরণং রূপং, পুত্তো অৰুট্ঠিকেন চ;

সুখা চ ভিদুরো [ভিন্দনা (সব্বত্থ)] ধাতু, পরিহানেন তে দসাতি.