১২. দিট্ঠিগতসুত্তং

৪৯. ৰুত্তঞ্হেতং ভগৰতা, ৰুত্তমরহতাতি মে সুতং –

‘‘দ্ৰীহি, ভিক্খৰে, দিট্ঠিগতেহি পরিযুট্ঠিতা দেৰমনুস্সা ওলীযন্তি একে, অতিধাৰন্তি একে; চক্খুমন্তো চ পস্সন্তি.

‘‘কথঞ্চ, ভিক্খৰে, ওলীযন্তি একে? ভৰারামা, ভিক্খৰে, দেৰমনুস্সা ভৰরতা ভৰসম্মুদিতা তেসং ভৰনিরোধায ধম্মে দেসিযমানে চিত্তং ন পক্খন্দতি ন পসীদতি ন সন্তিট্ঠতি নাধিমুচ্চতি. এৰং খো, ভিক্খৰে, ওলীযন্তি একে.

‘‘কথঞ্চ, ভিক্খৰে, অতিধাৰন্তি একে? ভৰেনেৰ খো পনেকে অট্টীযমানা হরাযমানা জিগুচ্ছমানা ৰিভৰং অভিনন্দন্তি – যতো কির, ভো, অযং অত্তা [সত্তো (সী. ক.)] কাযস্স ভেদা পরং মরণা উচ্ছিজ্জতি ৰিনস্সতি ন হোতি পরং মরণা; এতং সন্তং এতং পণীতং এতং যাথাৰন্তি. এৰং খো, ভিক্খৰে, অতিধাৰন্তি একে.

‘‘কথঞ্চ, ভিক্খৰে, চক্খুমন্তো পস্সন্তি? ইধ ভিক্খু ভূতং ভূততো পস্সতি; ভূতং ভূততো দিস্ৰা ভূতস্স নিব্বিদায ৰিরাগায নিরোধায পটিপন্নো হোতি. এৰং খো, ভিক্খৰে, চক্খুমন্তো পস্সন্তী’’তি. এতমত্থং ভগৰা অৰোচ. তত্থেতং ইতি ৰুচ্চতি –

‘‘যে [যো (স্যা. ক.)] ভূতং ভূততো দিস্ৰা, ভূতস্স চ অতিক্কমং;

যথাভূতে ৰিমুচ্চন্তি, ভৰতণ্হা পরিক্খযা.

‘‘স ৰে [সচে (ক. সী. স্যা. পী.)] ভূতপরিঞ্ঞো, সো ৰীততণ্হো ভৰাভৰে;

ভূতস্স ৰিভৰা ভিক্খু, নাগচ্ছতি পুনব্ভৰ’’ন্তি.

অযম্পি অত্থো ৰুত্তো ভগৰতা, ইতি মে সুতন্তি. দ্ৰাদসমং.

দুতিযো ৰগ্গো নিট্ঠিতো.

তস্সুদ্দানং –

দ্ৰে ইন্দ্রিযা দ্ৰে তপনীযা, সীলেন অপরে দুৰে;

অনোত্তাপী কুহনা দ্ৰে চ, সংৰেজনীযেন তে দস.

ৰিতক্কা দেসনা ৰিজ্জা, পঞ্ঞা ধম্মেন পঞ্চমং;

অজাতং ধাতুসল্লানং, সিক্খা জাগরিযেন চ;

অপাযদিট্ঠিযা চেৰ [যেৰ (সী. স্যা.)], বাৰীসতি পকাসিতাতি.

দুকনিপাতো নিট্ঠিতো.