৯. পাপৰগ্গো

১১৬. অভিত্থরেথ কল্যাণে, পাপা চিত্তং নিৰারযে;

দন্ধঞ্হি করোতো পুঞ্ঞং, পাপস্মিং রমতী মনো.

১১৭. পাপঞ্চে পুরিসো কযিরা, ন নং [ন তং (সী. পী.)] কযিরা পুনপ্পুনং;

ন তম্হি ছন্দং কযিরাথ, দুক্খো পাপস্স উচ্চযো.

১১৮. পুঞ্ঞঞ্চে পুরিসো কযিরা, কযিরা নং [কযিরাথেতং (সী. স্যা.), কযিরাথেনং (পী.)] পুনপ্পুনং;

তম্হি ছন্দং কযিরাথ, সুখো পুঞ্ঞস্স উচ্চযো.

১১৯. পাপোপি পস্সতি ভদ্রং, যাৰ পাপং ন পচ্চতি;

যদা চ পচ্চতি পাপং, অথ পাপো পাপানি [অথ পাপানি (?)] পস্সতি.

১২০. ভদ্রোপি পস্সতি পাপং, যাৰ ভদ্রং ন পচ্চতি;

যদা চ পচ্চতি ভদ্রং, অথ ভদ্রো ভদ্রানি [অথ ভদ্রানি (?)] পস্সতি.

১২১. মাৰমঞ্ঞেথ [মাপ্পমঞ্ঞেথ (সী. স্যা. পী.)] পাপস্স, ন মন্তং [ন মং তং (সী. পী.), ন মত্তং (স্যা.)] আগমিস্সতি;

উদবিন্দুনিপাতেন, উদকুম্ভোপি পূরতি;

বালো পূরতি [পূরতি বালো (সী. ক.), আপূরতি বালো (স্যা.)] পাপস্স, থোকং থোকম্পি [থোক থোকম্পি (সী. পী.)] আচিনং.

১২২. মাৰমঞ্ঞেথ পুঞ্ঞস্স, ন মন্তং আগমিস্সতি;

উদবিন্দুনিপাতেন, উদকুম্ভোপি পূরতি;

ধীরো পূরতি পুঞ্ঞস্স, থোকং থোকম্পি আচিনং.

১২৩. ৰাণিজোৰ ভযং মগ্গং, অপ্পসত্থো মহদ্ধনো;

ৰিসং জীৰিতুকামোৰ, পাপানি পরিৰজ্জযে.

১২৪. পাণিম্হি চে ৰণো নাস্স, হরেয্য পাণিনা ৰিসং;

নাব্বণং ৰিসমন্ৰেতি, নত্থি পাপং অকুব্বতো.

১২৫. যো অপ্পদুট্ঠস্স নরস্স দুস্সতি, সুদ্ধস্স পোসস্স অনঙ্গণস্স;

তমেৰ বালং পচ্চেতি পাপং, সুখুমো রজো পটিৰাতংৰ খিত্তো.

১২৬. গব্ভমেকে উপ্পজ্জন্তি, নিরযং পাপকম্মিনো;

সগ্গং সুগতিনো যন্তি, পরিনিব্বন্তি অনাসৰা.

১২৭. ন অন্তলিক্খে ন সমুদ্দমজ্ঝে, ন পব্বতানং ৰিৰরং পৰিস্স [পৰিসং (স্যা.)];

ন ৰিজ্জতী [ন ৰিজ্জতি (ক. সী. পী. ক.)] সো জগতিপ্পদেসো, যত্থট্ঠিতো [যত্রট্ঠিতো (স্যা.)] মুচ্চেয্য পাপকম্মা.

১২৮. ন অন্তলিক্খে ন সমুদ্দমজ্ঝে, ন পব্বতানং ৰিৰরং পৰিস্স;

ন ৰিজ্জতী সো জগতিপ্পদেসো, যত্থট্ঠিতং [যত্রট্ঠিতং (স্যা.)] নপ্পসহেয্য মচ্চু.

পাপৰগ্গো নৰমো নিট্ঠিতো.