১০. দণ্ডৰগ্গো

১২৯. সব্বে তসন্তি দণ্ডস্স, সব্বে ভাযন্তি মচ্চুনো;

অত্তানং উপমং কত্ৰা, ন হনেয্য ন ঘাতযে.

১৩০. সব্বে তসন্তি দণ্ডস্স, সব্বেসং জীৰিতং পিযং;

অত্তানং উপমং কত্ৰা, ন হনেয্য ন ঘাতযে.

১৩১. সুখকামানি ভূতানি, যো দণ্ডেন ৰিহিংসতি;

অত্তনো সুখমেসানো, পেচ্চ সো ন লভতে সুখং.

১৩২. সুখকামানি ভূতানি, যো দণ্ডেন ন হিংসতি;

অত্তনো সুখমেসানো, পেচ্চ সো লভতে সুখং.

১৩৩. মাৰোচ ফরুসং কঞ্চি, ৰুত্তা পটিৰদেয্যু তং [পটিৰদেয্যুং তং (ক.)];

দুক্খা হি সারম্ভকথা, পটিদণ্ডা ফুসেয্যু তং [ফুসেয্যুং তং (ক.)].

১৩৪. সচে নেরেসি অত্তানং, কংসো উপহতো যথা;

এস পত্তোসি নিব্বানং, সারম্ভো তে ন ৰিজ্জতি.

১৩৫. যথা দণ্ডেন গোপালো, গাৰো পাজেতি গোচরং;

এৰং জরা চ মচ্চু চ, আযুং পাজেন্তি পাণিনং.

১৩৬. অথ পাপানি কম্মানি, করং বালো ন বুজ্ঝতি;

সেহি কম্মেহি দুম্মেধো, অগ্গিদড্ঢোৰ তপ্পতি.

১৩৭. যো দণ্ডেন অদণ্ডেসু, অপ্পদুট্ঠেসু দুস্সতি;

দসন্নমঞ্ঞতরং ঠানং, খিপ্পমেৰ নিগচ্ছতি.

১৩৮. ৰেদনং ফরুসং জানিং, সরীরস্স চ ভেদনং [সরীরস্স পভেদনং (স্যা.)];

গরুকং ৰাপি আবাধং, চিত্তক্খেপঞ্চ [চিত্তক্খেপং ৰ (সী. স্যা. পী.)] পাপুণে.

১৩৯. রাজতো ৰা উপসগ্গং [উপস্সগ্গং (সী. পী.)], অব্ভক্খানঞ্চ [অব্ভক্খানং ৰ (সী. পী.)] দারুণং;

পরিক্খযঞ্চ [পরিক্খযং ৰ (সী. স্যা. পী.)] ঞাতীনং, ভোগানঞ্চ [ভোগানং ৰ (সী. স্যা. পী.)] পভঙ্গুরং [পভঙ্গুনং (ক.)].

১৪০. অথ ৰাস্স অগারানি, অগ্গি ডহতি [ডয্হতি (ক.)] পাৰকো;

কাযস্স ভেদা দুপ্পঞ্ঞো, নিরযং সোপপজ্জতি [সো উপপজ্জতি (সী. স্যা.)].

১৪১. ন নগ্গচরিযা ন জটা ন পঙ্কা, নানাসকা থণ্ডিলসাযিকা ৰা;

রজোজল্লং উক্কুটিকপ্পধানং, সোধেন্তি মচ্চং অৰিতিণ্ণকঙ্খং.

১৪২. অলঙ্কতো চেপি সমং চরেয্য, সন্তো দন্তো নিযতো ব্রহ্মচারী;

সব্বেসু ভূতেসু নিধায দণ্ডং, সো ব্রাহ্মণো সো সমণো স ভিক্খু.

১৪৩. হিরীনিসেধো পুরিসো, কোচি লোকস্মি ৰিজ্জতি;

যো নিদ্দং [নিন্দং (সী. পী.) সং. নি. ১.১৮] অপবোধেতি [অপবোধতি (সী. স্যা. পী.)], অস্সো ভদ্রো কসামিৰ.

১৪৪. অস্সো যথা ভদ্রো কসানিৰিট্ঠো, আতাপিনো সংৰেগিনো ভৰাথ;

সদ্ধায সীলেন চ ৰীরিযেন চ, সমাধিনা ধম্মৰিনিচ্ছযেন চ;

সম্পন্নৰিজ্জাচরণা পতিস্সতা, জহিস্সথ [পহস্সথ (সী. স্যা. পী.)] দুক্খমিদং অনপ্পকং.

১৪৫. উদকঞ্হি নযন্তি নেত্তিকা, উসুকারা নমযন্তি তেজনং;

দারুং নমযন্তি তচ্ছকা, অত্তানং দমযন্তি সুব্বতা.

দণ্ডৰগ্গো দসমো নিট্ঠিতো.