২৪. তণ্হাৰগ্গো

৩৩৪. মনুজস্স পমত্তচারিনো, তণ্হা ৰড্ঢতি মালুৰা ৰিয;

সো প্লৰতী [প্লৰতি (সী. পী.), পলৰেতী (ক.), উপ্লৰতি (?)] হুরা হুরং, ফলমিচ্ছংৰ ৰনস্মি ৰানরো.

৩৩৫. যং এসা সহতে জম্মী, তণ্হা লোকে ৰিসত্তিকা;

সোকা তস্স পৰড্ঢন্তি, অভিৰট্ঠংৰ [অভিৰড্ঢংৰ (স্যা.), অভিৰট্টংৰ (পী.), অভিৰুড্ঢংৰ (ক.)] বীরণং.

৩৩৬. যো চেতং সহতে জম্মিং, তণ্হং লোকে দুরচ্চযং;

সোকা তম্হা পপতন্তি, উদবিন্দুৰ পোক্খরা.

৩৩৭. তং ৰো ৰদামি ভদ্দং ৰো, যাৰন্তেত্থ সমাগতা;

তণ্হায মূলং খণথ, উসীরত্থোৰ বীরণং;

মা ৰো নল়ংৰ সোতোৰ, মারো ভঞ্জি পুনপ্পুনং.

৩৩৮. যথাপি মূলে অনুপদ্দৰে দল়্হে, ছিন্নোপি রুক্খো পুনরেৰ রূহতি;

এৰম্পি তণ্হানুসযে অনূহতে, নিব্বত্ততী দুক্খমিদং পুনপ্পুনং.

৩৩৯. যস্স ছত্তিংসতি সোতা, মনাপসৰনা ভুসা;

মাহা [ৰাহা (সী. স্যা. পী.)] ৰহন্তি দুদ্দিট্ঠিং, সঙ্কপ্পা রাগনিস্সিতা.

৩৪০. সৰন্তি সব্বধি সোতা, লতা উপ্পজ্জ [উব্ভিজ্জ (সী. স্যা. কং. পী.)] তিট্ঠতি;

তঞ্চ দিস্ৰা লতং জাতং, মূলং পঞ্ঞায ছিন্দথ.

৩৪১. সরিতানি সিনেহিতানি চ, সোমনস্সানি ভৰন্তি জন্তুনো;

তে সাতসিতা সুখেসিনো, তে ৰে জাতিজরূপগা নরা.

৩৪২. তসিণায পুরক্খতা পজা, পরিসপ্পন্তি সসোৰ বন্ধিতো [বাধিতো (বহূসু)];

সংযোজনসঙ্গসত্তকা, দুক্খমুপেন্তি পুনপ্পুনং চিরায.

৩৪৩. তসিণায পুরক্খতা পজা, পরিসপ্পন্তি সসোৰ বন্ধিতো;

তস্মা তসিণং ৰিনোদযে, আকঙ্খন্ত [ভিক্খূ আকঙ্খী (সী.), ভিক্খু আকঙ্খং (স্যা.)] ৰিরাগমত্তনো.

৩৪৪. যো নিব্বনথো ৰনাধিমুত্তো, ৰনমুত্তো ৰনমেৰ ধাৰতি;

তং পুগ্গলমেথ পস্সথ, মুত্তো বন্ধনমেৰ ধাৰতি.

৩৪৫. ন তং দল়্হং বন্ধনমাহু ধীরা, যদাযসং দারুজপব্বজঞ্চ [দারূজং বব্বজঞ্চ (সী. পী.)];

সারত্তরত্তা মণিকুণ্ডলেসু, পুত্তেসু দারেসু চ যা অপেক্খা.

৩৪৬. এতং দল়্হং বন্ধনমাহু ধীরা, ওহারিনং সিথিলং দুপ্পমুঞ্চং;

এতম্পি ছেত্ৰান পরিব্বজন্তি, অনপেক্খিনো কামসুখং পহায.

৩৪৭. যে রাগরত্তানুপতন্তি সোতং, সযংকতং মক্কটকোৰ জালং;

এতম্পি ছেত্ৰান ৰজন্তি ধীরা, অনপেক্খিনো সব্বদুক্খং পহায.

৩৪৮. মুঞ্চ পুরে মুঞ্চ পচ্ছতো, মজ্ঝে মুঞ্চ ভৰস্স পারগূ;

সব্বত্থ ৰিমুত্তমানসো, ন পুনং জাতিজরং উপেহিসি.

৩৪৯. ৰিতক্কমথিতস্স জন্তুনো, তিব্বরাগস্স সুভানুপস্সিনো;

ভিয্যো তণ্হা পৰড্ঢতি, এস খো দল়্হং [এস গাল়্হং (ক.)] করোতি বন্ধনং.

৩৫০. ৰিতক্কূপসমে চ [ৰিতক্কূপসমেৰ (ক.)] যো রতো, অসুভং ভাৰযতে সদা সতো;

এস [এসো (?)] খো ব্যন্তি কাহিতি, এস [এসো (?)] ছেচ্ছতি মারবন্ধনং.

৩৫১. নিট্ঠঙ্গতো অসন্তাসী, ৰীততণ্হো অনঙ্গণো;

অচ্ছিন্দি ভৰসল্লানি, অন্তিমোযং সমুস্সযো.

৩৫২. ৰীততণ্হো অনাদানো, নিরুত্তিপদকোৰিদো;

অক্খরানং সন্নিপাতং, জঞ্ঞা পুব্বাপরানি চ;

স ৰে ‘‘অন্তিমসারীরো, মহাপঞ্ঞো মহাপুরিসো’’তি ৰুচ্চতি.

৩৫৩. সব্বাভিভূ সব্বৰিদূহমস্মি, সব্বেসু ধম্মেসু অনূপলিত্তো;

সব্বঞ্জহো তণ্হক্খযে ৰিমুত্তো, সযং অভিঞ্ঞায কমুদ্দিসেয্যং.

৩৫৪. সব্বদানং ধম্মদানং জিনাতি, সব্বরসং ধম্মরসো জিনাতি;

সব্বরতিং ধম্মরতি জিনাতি, তণ্হক্খযো সব্বদুক্খং জিনাতি.

৩৫৫. হনন্তি ভোগা দুম্মেধং, নো চ পারগৰেসিনো;

ভোগতণ্হায দুম্মেধো, হন্তি অঞ্ঞেৰ অত্তনং.

৩৫৬. তিণদোসানি খেত্তানি, রাগদোসা অযং পজা;

তস্মা হি ৰীতরাগেসু, দিন্নং হোতি মহপ্ফলং.

৩৫৭. তিণদোসানি খেত্তানি, দোসদোসা অযং পজা;

তস্মা হি ৰীতদোসেসু, দিন্নং হোতি মহপ্ফলং.

৩৫৮. তিণদোসানি খেত্তানি, মোহদোসা অযং পজা;

তস্মা হি ৰীতমোহেসু, দিন্নং হোতি মহপ্ফলং.

৩৫৯. (তিণদোসানি খেত্তানি, ইচ্ছাদোসা অযং পজা;

তস্মা হি ৰিগতিচ্ছেসু, দিন্নং হোতি মহপ্ফলং.) [( ) ৰিদেসপোত্থকেসু নত্থি, অট্ঠকথাযম্পি ন দিস্সতি]

তিণদোসানি খেত্তানি, তণ্হাদোসা অযং পজা;

তস্মা হি ৰীততণ্হেসু, দিন্নং হোতি মহপ্ফলং.

তণ্হাৰগ্গো চতুৰীসতিমো নিট্ঠিতো.