২৫. ভিক্খুৰগ্গো

৩৬০. চক্খুনা সংৰরো সাধু, সাধু সোতেন সংৰরো;

ঘানেন সংৰরো সাধু, সাধু জিৰ্হায সংৰরো.

৩৬১. কাযেন সংৰরো সাধু, সাধু ৰাচায সংৰরো;

মনসা সংৰরো সাধু, সাধু সব্বত্থ সংৰরো;

সব্বত্থ সংৰুতো ভিক্খু, সব্বদুক্খা পমুচ্চতি.

৩৬২. হত্থসংযতো পাদসংযতো, ৰাচাসংযতো সংযতুত্তমো;

অজ্ঝত্তরতো সমাহিতো, একো সন্তুসিতো তমাহু ভিক্খুং.

৩৬৩. যো মুখসংযতো ভিক্খু, মন্তভাণী অনুদ্ধতো;

অত্থং ধম্মঞ্চ দীপেতি, মধুরং তস্স ভাসিতং.

৩৬৪. ধম্মারামো ধম্মরতো, ধম্মং অনুৰিচিন্তযং;

ধম্মং অনুস্সরং ভিক্খু, সদ্ধম্মা ন পরিহাযতি.

৩৬৫. সলাভং নাতিমঞ্ঞেয্য, নাঞ্ঞেসং পিহযং চরে;

অঞ্ঞেসং পিহযং ভিক্খু, সমাধিং নাধিগচ্ছতি.

৩৬৬. অপ্পলাভোপি চে ভিক্খু, সলাভং নাতিমঞ্ঞতি;

তং ৰে দেৰা পসংসন্তি, সুদ্ধাজীৰিং অতন্দিতং.

৩৬৭. সব্বসো নামরূপস্মিং, যস্স নত্থি মমাযিতং;

অসতা চ ন সোচতি, স ৰে ‘‘ভিক্খূ’’তি ৰুচ্চতি.

৩৬৮. মেত্তাৰিহারী যো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খারূপসমং সুখং.

৩৬৯. সিঞ্চ ভিক্খু ইমং নাৰং, সিত্তা তে লহুমেস্সতি;

ছেত্ৰা রাগঞ্চ দোসঞ্চ, ততো নিব্বানমেহিসি.

৩৭০. পঞ্চ ছিন্দে পঞ্চ জহে, পঞ্চ চুত্তরি ভাৰযে;

পঞ্চ সঙ্গাতিগো ভিক্খু, ‘‘ওঘতিণ্ণো’’তি ৰুচ্চতি.

৩৭১. ঝায ভিক্খু [ঝায তুৰং ভিক্খু (?)] মা পমাদো [মা চ পমাদো (সী. স্যা. পী.)], মা তে কামগুণে রমেস্সু [ভমস্সু (সী. পী.), ভৰস্সু (স্যা.), রমস্সু (ক.)] চিত্তং;

মা লোহগুল়ং গিলী পমত্তো, মা কন্দি ‘‘দুক্খমিদ’’ন্তি ডয্হমানো.

৩৭২. নত্থি ঝানং অপঞ্ঞস্স, পঞ্ঞা নত্থি অঝাযতো [অজ্ঝাযিনো (ক.)];

যম্হি ঝানঞ্চ পঞ্ঞা চ, স ৰে নিব্বানসন্তিকে.

৩৭৩. সুঞ্ঞাগারং পৰিট্ঠস্স, সন্তচিত্তস্স ভিক্খুনো;

অমানুসী রতি হোতি, সম্মা ধম্মং ৰিপস্সতো.

৩৭৪. যতো যতো সম্মসতি, খন্ধানং উদযব্বযং;

লভতী [লভতি (পী.), লভতে (ক.)] পীতিপামোজ্জং, অমতং তং ৰিজানতং.

৩৭৫. তত্রাযমাদি ভৰতি, ইধ পঞ্ঞস্স ভিক্খুনো;

ইন্দ্রিযগুত্তি সন্তুট্ঠি, পাতিমোক্খে চ সংৰরো.

৩৭৬. মিত্তে ভজস্সু কল্যাণে, সুদ্ধাজীৰে অতন্দিতে;

পটিসন্থারৰুত্যস্স [পটিসন্ধারৰুত্যস্স (ক.)], আচারকুসলো সিযা;

ততো পামোজ্জবহুলো, দুক্খস্সন্তং করিস্সতি.

৩৭৭. ৰস্সিকা ৰিয পুপ্ফানি, মদ্দৰানি [মজ্জৰানি (ক. টীকা) পচ্চৰানি (ক. অট্ঠ.)] পমুঞ্চতি;

এৰং রাগঞ্চ দোসঞ্চ, ৰিপ্পমুঞ্চেথ ভিক্খৰো.

৩৭৮. সন্তকাযো সন্তৰাচো, সন্তৰা সুসমাহিতো [সন্তমনো সুসমাহিতো (স্যা. পী.), সন্তমনো সমাহিতো (ক.)];

ৰন্তলোকামিসো ভিক্খু, ‘‘উপসন্তো’’তি ৰুচ্চতি.

৩৭৯. অত্তনা চোদযত্তানং, পটিমংসেথ অত্তনা [পটিমাসে অত্তমত্তনা (সী. পী.), পটিমংসে তমত্তনা (স্যা.)];

সো অত্তগুত্তো সতিমা, সুখং ভিক্খু ৰিহাহিসি.

৩৮০. অত্তা হি অত্তনো নাথো, (কো হি নাথো পরো সিযা) [( ) ৰিদেসপোত্থকেসু নত্থি]

অত্তা হি অত্তনো গতি;

তস্মা সংযমমত্তানং [সংযময’ত্তানং (সী. পী.)], অস্সং ভদ্রংৰ ৰাণিজো.

৩৮১. পামোজ্জবহুলো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খারূপসমং সুখং.

৩৮২. যো হৰে দহরো ভিক্খু, যুঞ্জতি বুদ্ধসাসনে;

সোমং [সো ইমং (সী. স্যা. কং. পী.)] লোকং পভাসেতি, অব্ভা মুত্তোৰ চন্দিমা.

ভিক্খুৰগ্গো পঞ্চৰীসতিমো নিট্ঠিতো.