২৩. নাগৰগ্গো

৩২০. অহং নাগোৰ সঙ্গামে, চাপতো পতিতং সরং;

অতিৰাক্যং তিতিক্খিস্সং, দুস্সীলো হি বহুজ্জনো.

৩২১. দন্তং নযন্তি সমিতিং, দন্তং রাজাভিরূহতি;

দন্তো সেট্ঠো মনুস্সেসু, যোতিৰাক্যং তিতিক্খতি.

৩২২. ৰরমস্সতরা দন্তা, আজানীযা চ [আজানীযাৰ (স্যা.)] সিন্ধৰা;

কুঞ্জরা চ [কুঞ্জরাৰ (স্যা.)] মহানাগা, অত্তদন্তো ততো ৰরং.

৩২৩. ন হি এতেহি যানেহি, গচ্ছেয্য অগতং দিসং;

যথাত্তনা সুদন্তেন, দন্তো দন্তেন গচ্ছতি.

৩২৪. ধনপালো [ধনপালকো (সী. স্যা. কং. পী.)] নাম কুঞ্জরো, কটুকভেদনো [কটুকপ্পভেদনো (সী. স্যা. পী.)] দুন্নিৰারযো;

বদ্ধো কবল়ং ন ভুঞ্জতি, সুমরতি [সুসরতি (ক.)] নাগৰনস্স কুঞ্জরো.

৩২৫. মিদ্ধী যদা হোতি মহগ্ঘসো চ, নিদ্দাযিতা সম্পরিৰত্তসাযী;

মহাৰরাহোৰ নিৰাপপুট্ঠো, পুনপ্পুনং গব্ভমুপেতি মন্দো.

৩২৬. ইদং পুরে চিত্তমচারি চারিকং, যেনিচ্ছকং যত্থকামং যথাসুখং;

তদজ্জহং নিগ্গহেস্সামি যোনিসো, হত্থিপ্পভিন্নং ৰিয অঙ্কুসগ্গহো.

৩২৭. অপ্পমাদরতা হোথ, সচিত্তমনুরক্খথ;

দুগ্গা উদ্ধরথত্তানং, পঙ্কে সন্নোৰ [সত্তোৰ (সী. পী.)] কুঞ্জরো.

৩২৮. সচে লভেথ নিপকং সহাযং, সদ্ধিং চরং সাধুৰিহারিধীরং;

অভিভুয্য সব্বানি পরিস্সযানি, চরেয্য তেনত্তমনো সতীমা.

৩২৯. নো চে লভেথ নিপকং সহাযং, সদ্ধিং চরং সাধুৰিহারিধীরং;

রাজাৰ রট্ঠং ৰিজিতং পহায, একো চরে মাতঙ্গরঞ্ঞেৰ নাগো.

৩৩০. একস্স চরিতং সেয্যো, নত্থি বালে সহাযতা;

একো চরে ন চ পাপানি কযিরা, অপ্পোস্সুক্কো মাতঙ্গরঞ্ঞেৰ নাগো.

৩৩১. অত্থম্হি জাতম্হি সুখা সহাযা, তুট্ঠী সুখা যা ইতরীতরেন;

পুঞ্ঞং সুখং জীৰিতসঙ্খযম্হি, সব্বস্স দুক্খস্স সুখং পহানং.

৩৩২. সুখা মত্তেয্যতা লোকে, অথো পেত্তেয্যতা সুখা;

সুখা সামঞ্ঞতা লোকে, অথো ব্রহ্মঞ্ঞতা সুখা.

৩৩৩. সুখং যাৰ জরা সীলং, সুখা সদ্ধা পতিট্ঠিতা;

সুখো পঞ্ঞায পটিলাভো, পাপানং অকরণং সুখং.

নাগৰগ্গো তেৰীসতিমো নিট্ঠিতো.