২২. নিরযৰগ্গো

৩০৬. অভূতৰাদী নিরযং উপেতি, যো ৰাপি [যো চাপি (সী. পী. ক.)] কত্ৰা ন করোমি চাহ [ন করোমীতি চাহ (স্যা.)];

উভোপি তে পেচ্চ সমা ভৰন্তি, নিহীনকম্মা মনুজা পরত্থ.

৩০৭. কাসাৰকণ্ঠা বহৰো, পাপধম্মা অসঞ্ঞতা;

পাপা পাপেহি কম্মেহি, নিরযং তে উপপজ্জরে.

৩০৮. সেয্যো অযোগুল়ো ভুত্তো, তত্তো অগ্গিসিখূপমো;

যঞ্চে ভুঞ্জেয্য দুস্সীলো, রট্ঠপিণ্ডমসঞ্ঞতো.

৩০৯. চত্তারি ঠানানি নরো পমত্তো, আপজ্জতি পরদারূপসেৰী;

অপুঞ্ঞলাভং ন নিকামসেয্যং, নিন্দং ততীযং নিরযং চতুত্থং.

৩১০. অপুঞ্ঞলাভো চ গতী চ পাপিকা, ভীতস্স ভীতায রতী চ থোকিকা;

রাজা চ দণ্ডং গরুকং পণেতি, তস্মা নরো পরদারং ন সেৰে.

৩১১. কুসো যথা দুগ্গহিতো, হত্থমেৰানুকন্ততি;

সামঞ্ঞং দুপ্পরামট্ঠং, নিরযাযুপকড্ঢতি.

৩১২. যং কিঞ্চি সিথিলং কম্মং, সংকিলিট্ঠঞ্চ যং ৰতং;

সঙ্কস্সরং ব্রহ্মচরিযং, ন তং হোতি মহপ্ফলং.

৩১৩. কযিরা চে কযিরাথেনং [কযিরা নং (ক.)], দল়্হমেনং পরক্কমে;

সিথিলো হি পরিব্বাজো, ভিয্যো আকিরতে রজং.

৩১৪. অকতং দুক্কটং সেয্যো, পচ্ছা তপ্পতি দুক্কটং;

কতঞ্চ সুকতং সেয্যো, যং কত্ৰা নানুতপ্পতি.

৩১৫. নগরং যথা পচ্চন্তং, গুত্তং সন্তরবাহিরং;

এৰং গোপেথ অত্তানং, খণো ৰো [খণো ৰে (সী. পী. ক.)] মা উপচ্চগা;

খণাতীতা হি সোচন্তি, নিরযম্হি সমপ্পিতা.

৩১৬. অলজ্জিতাযে লজ্জন্তি, লজ্জিতাযে ন লজ্জরে;

মিচ্ছাদিট্ঠিসমাদানা, সত্তা গচ্ছন্তি দুগ্গতিং.

৩১৭. অভযে ভযদস্সিনো, ভযে চাভযদস্সিনো;

মিচ্ছাদিট্ঠিসমাদানা, সত্তা গচ্ছন্তি দুগ্গতিং.

৩১৮. অৰজ্জে ৰজ্জমতিনো, ৰজ্জে চাৰজ্জদস্সিনো;

মিচ্ছাদিট্ঠিসমাদানা, সত্তা গচ্ছন্তি দুগ্গতিং.

৩১৯. ৰজ্জঞ্চ ৰজ্জতো ঞত্ৰা, অৰজ্জঞ্চ অৰজ্জতো;

সম্মাদিট্ঠিসমাদানা, সত্তা গচ্ছন্তি সুগ্গতিং.

নিরযৰগ্গো দ্ৰাৰীসতিমো নিট্ঠিতো.