১৯. ধম্মট্ঠৰগ্গো

২৫৬. ন তেন হোতি ধম্মট্ঠো, যেনত্থং সাহসা [সহসা (সী. স্যা. ক.)] নযে;

যো চ অত্থং অনত্থঞ্চ, উভো নিচ্ছেয্য পণ্ডিতো.

২৫৭. অসাহসেন ধম্মেন, সমেন নযতী পরে;

ধম্মস্স গুত্তো মেধাৰী, ‘‘ধম্মট্ঠো’’তি পৰুচ্চতি.

২৫৮. ন তেন পণ্ডিতো হোতি, যাৰতা বহু ভাসতি;

খেমী অৰেরী অভযো, ‘‘পণ্ডিতো’’তি পৰুচ্চতি.

২৫৯. ন তাৰতা ধম্মধরো, যাৰতা বহু ভাসতি;

যো চ অপ্পম্পি সুত্ৰান, ধম্মং কাযেন পস্সতি;

স ৰে ধম্মধরো হোতি, যো ধম্মং নপ্পমজ্জতি.

২৬০. ন তেন থেরো সো হোতি [থেরো হোতি (সী. স্যা.)], যেনস্স পলিতং সিরো;

পরিপক্কো ৰযো তস্স, ‘‘মোঘজিণ্ণো’’তি ৰুচ্চতি.

২৬১. যম্হি সচ্চঞ্চ ধম্মো চ, অহিংসা সংযমো দমো;

স ৰে ৰন্তমলো ধীরো, ‘‘থেরো’’ ইতি [সো থেরোতি (স্যা. ক.)] পৰুচ্চতি.

২৬২. ন ৰাক্করণমত্তেন, ৰণ্ণপোক্খরতায ৰা;

সাধুরূপো নরো হোতি, ইস্সুকী মচ্ছরী সঠো.

২৬৩. যস্স চেতং সমুচ্ছিন্নং, মূলঘচ্চং সমূহতং;

স ৰন্তদোসো মেধাৰী, ‘‘সাধুরূপো’’তি ৰুচ্চতি.

২৬৪. ন মুণ্ডকেন সমণো, অব্বতো অলিকং ভণং;

ইচ্ছালোভসমাপন্নো, সমণো কিং ভৰিস্সতি.

২৬৫. যো চ সমেতি পাপানি, অণুং থূলানি সব্বসো;

সমিতত্তা হি পাপানং, ‘‘সমণো’’তি পৰুচ্চতি.

২৬৬. ন তেন ভিক্খু সো হোতি, যাৰতা ভিক্খতে পরে;

ৰিস্সং ধম্মং সমাদায, ভিক্খু হোতি ন তাৰতা.

২৬৭. যোধ পুঞ্ঞঞ্চ পাপঞ্চ, বাহেত্ৰা ব্রহ্মচরিযৰা [ব্রহ্মচরিযং (ক.)];

সঙ্খায লোকে চরতি, স ৰে ‘‘ভিক্খূ’’তি ৰুচ্চতি.

২৬৮. ন মোনেন মুনী হোতি, মূল়্হরূপো অৰিদ্দসু;

যো চ তুলংৰ পগ্গয্হ, ৰরমাদায পণ্ডিতো.

২৬৯. পাপানি পরিৰজ্জেতি, স মুনী তেন সো মুনি;

যো মুনাতি উভো লোকে, ‘‘মুনি’’ তেন পৰুচ্চতি.

২৭০. ন তেন অরিযো হোতি, যেন পাণানি হিংসতি;

অহিংসা সব্বপাণানং, ‘‘অরিযো’’তি পৰুচ্চতি.

২৭১. ন সীলব্বতমত্তেন, বাহুসচ্চেন ৰা পন;

অথ ৰা সমাধিলাভেন, ৰিৰিত্তসযনেন ৰা.

২৭২. ফুসামি নেক্খম্মসুখং, অপুথুজ্জনসেৰিতং;

ভিক্খু ৰিস্সাসমাপাদি, অপ্পত্তো আসৰক্খযং.

ধম্মট্ঠৰগ্গো একূনৰীসতিমো নিট্ঠিতো.