২০. মগ্গৰগ্গো

২৭৩. মগ্গানট্ঠঙ্গিকো সেট্ঠো, সচ্চানং চতুরো পদা;

ৰিরাগো সেট্ঠো ধম্মানং, দ্ৰিপদানঞ্চ চক্খুমা.

২৭৪. এসেৰ [এসোৰ (সী. পী.)] মগ্গো নত্থঞ্ঞো, দস্সনস্স ৰিসুদ্ধিযা;

এতঞ্হি তুম্হে পটিপজ্জথ, মারস্সেতং পমোহনং.

২৭৫. এতঞ্হি তুম্হে পটিপন্না, দুক্খস্সন্তং করিস্সথ;

অক্খাতো ৰো [অক্খাতো ৰে (সী. পী.)] মযা মগ্গো, অঞ্ঞায সল্লকন্তনং [সল্লসন্থনং (সী. পী.), সল্লসত্থনং (স্যা.)].

২৭৬. তুম্হেহি কিচ্চমাতপ্পং, অক্খাতারো তথাগতা;

পটিপন্না পমোক্খন্তি, ঝাযিনো মারবন্ধনা.

২৭৭. ‘‘সব্বে সঙ্খারা অনিচ্চা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

২৭৮. ‘‘সব্বে সঙ্খারা দুক্খা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

২৭৯. ‘‘সব্বে ধম্মা অনত্তা’’তি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা.

২৮০. উট্ঠানকালম্হি অনুট্ঠহানো, যুৰা বলী আলসিযং উপেতো;

সংসন্নসঙ্কপ্পমনো [অসম্পন্নসঙ্কপ্পমনো (ক.)] কুসীতো, পঞ্ঞায মগ্গং অলসো ন ৰিন্দতি.

২৮১. ৰাচানুরক্খী মনসা সুসংৰুতো, কাযেন চ নাকুসলং কযিরা [অকুসলং ন কযিরা (সী. স্যা. কং. পী.)];

এতে তযো কম্মপথে ৰিসোধযে, আরাধযে মগ্গমিসিপ্পৰেদিতং.

২৮২. যোগা ৰে জাযতী [জাযতে (কত্থচি)] ভূরি, অযোগা ভূরিসঙ্খযো;

এতং দ্ৰেধাপথং ঞত্ৰা, ভৰায ৰিভৰায চ;

তথাত্তানং নিৰেসেয্য, যথা ভূরি পৰড্ঢতি.

২৮৩. ৰনং ছিন্দথ মা রুক্খং, ৰনতো জাযতে ভযং;

ছেত্ৰা ৰনঞ্চ ৰনথঞ্চ, নিব্বনা হোথ ভিক্খৰো.

২৮৪. যাৰ হি ৰনথো ন ছিজ্জতি, অণুমত্তোপি নরস্স নারিসু;

পটিবদ্ধমনোৰ [পটিবন্ধমনোৰ (ক.)] তাৰ সো, ৰচ্ছো খীরপকোৰ [খীরপানোৰ (পী.)] মাতরি.

২৮৫. উচ্ছিন্দ সিনেহমত্তনো কুমুদং সারদিকংৰ [পাণিনা];

সন্তিমগ্গমেৰ ব্রূহয, নিব্বানং সুগতেন দেসিতং.

২৮৬. ইধ ৰস্সং ৰসিস্সামি, ইধ হেমন্তগিম্হিসু;

ইতি বালো ৰিচিন্তেতি, অন্তরাযং ন বুজ্ঝতি.

২৮৭. তং পুত্তপসুসম্মত্তং, ব্যাসত্তমনসং নরং;

সুত্তং গামং মহোঘোৰ, মচ্চু আদায গচ্ছতি.

২৮৮. ন সন্তি পুত্তা তাণায, ন পিতা নাপি বন্ধৰা;

অন্তকেনাধিপন্নস্স, নত্থি ঞাতীসু তাণতা.

২৮৯. এতমত্থৰসং ঞত্ৰা, পণ্ডিতো সীলসংৰুতো;

নিব্বানগমনং মগ্গং, খিপ্পমেৰ ৰিসোধযে.

মগ্গৰগ্গো ৰীসতিমো নিট্ঠিতো.