১৮. মলৰগ্গো

২৩৫. পণ্ডুপলাসোৰ দানিসি, যমপুরিসাপি চ তে [তং (সী. স্যা. কং. পী.)] উপট্ঠিতা;

উয্যোগমুখে চ তিট্ঠসি, পাথেয্যম্পি চ তে ন ৰিজ্জতি.

২৩৬. সো করোহি দীপমত্তনো, খিপ্পং ৰাযম পণ্ডিতো ভৰ;

নিদ্ধন্তমলো অনঙ্গণো, দিব্বং অরিযভূমিং উপেহিসি [দিব্বং অরিযভূমিমেহিসি (সী. স্যা. পী.), দিব্বমরিযভূমিং উপেহিসি (?)].

২৩৭. উপনীতৰযো চ দানিসি, সম্পযাতোসি যমস্স সন্তিকে;

ৰাসো [ৰাসোপি চ (বহূসু)] তে নত্থি অন্তরা, পাথেয্যম্পি চ তে ন ৰিজ্জতি.

২৩৮. সো করোহি দীপমত্তনো, খিপ্পং ৰাযম পণ্ডিতো ভৰ;

নিদ্ধন্তমলো অনঙ্গণো, ন পুনং জাতিজরং [ন পুন জাতিজরং (সী. স্যা.), ন পুন জাতিজ্জরং (ক.)] উপেহিসি.

২৩৯. অনুপুব্বেন মেধাৰী, থোকং থোকং খণে খণে;

কম্মারো রজতস্সেৰ, নিদ্ধমে মলমত্তনো.

২৪০. অযসাৰ মলং সমুট্ঠিতং [সমুট্ঠায (ক.)], ততুট্ঠায [তদুট্ঠায (সী. স্যা. পী.)] তমেৰ খাদতি;

এৰং অতিধোনচারিনং, সানি কম্মানি [সককম্মানি (সী. পী.)] নযন্তি দুগ্গতিং.

২৪১. অসজ্ঝাযমলা মন্তা, অনুট্ঠানমলা ঘরা;

মলং ৰণ্ণস্স কোসজ্জং, পমাদো রক্খতো মলং.

২৪২. মলিত্থিযা দুচ্চরিতং, মচ্ছেরং দদতো মলং;

মলা ৰে পাপকা ধম্মা, অস্মিং লোকে পরম্হি চ.

২৪৩. ততো মলা মলতরং, অৰিজ্জা পরমং মলং;

এতং মলং পহন্ত্ৰান, নিম্মলা হোথ ভিক্খৰো.

২৪৪. সুজীৰং অহিরিকেন, কাকসূরেন ধংসিনা;

পক্খন্দিনা পগব্ভেন, সংকিলিট্ঠেন জীৰিতং.

২৪৫. হিরীমতা চ দুজ্জীৰং, নিচ্চং সুচিগৰেসিনা;

অলীনেনাপ্পগব্ভেন, সুদ্ধাজীৰেন পস্সতা.

২৪৬. যো পাণমতিপাতেতি, মুসাৰাদঞ্চ ভাসতি;

লোকে অদিন্নমাদিযতি, পরদারঞ্চ গচ্ছতি.

২৪৭. সুরামেরযপানঞ্চ, যো নরো অনুযুঞ্জতি;

ইধেৰমেসো লোকস্মিং, মূলং খণতি অত্তনো.

২৪৮. এৰং ভো পুরিস জানাহি, পাপধম্মা অসঞ্ঞতা;

মা তং লোভো অধম্মো চ, চিরং দুক্খায রন্ধযুং.

২৪৯. দদাতি ৰে যথাসদ্ধং, যথাপসাদনং [যত্থ পসাদনং (কত্থচি)] জনো;

তত্থ যো মঙ্কু ভৰতি [তত্থ চে মংকু যো হোতি (সী.), তত্থ যো মঙ্কুতো হোতি (স্যা.)], পরেসং পানভোজনে;

ন সো দিৰা ৰা রত্তিং ৰা, সমাধিমধিগচ্ছতি.

২৫০. যস্স চেতং সমুচ্ছিন্নং, মূলঘচ্চং [মূলঘচ্ছং (ক.)] সমূহতং;

স ৰে দিৰা ৰা রত্তিং ৰা, সমাধিমধিগচ্ছতি.

২৫১. নত্থি রাগসমো অগ্গি, নত্থি দোসসমো গহো;

নত্থি মোহসমং জালং, নত্থি তণ্হাসমা নদী.

২৫২. সুদস্সং ৰজ্জমঞ্ঞেসং, অত্তনো পন দুদ্দসং;

পরেসং হি সো ৰজ্জানি, ওপুনাতি [ওফুনাতি (ক.)] যথা ভুসং;

অত্তনো পন ছাদেতি, কলিংৰ কিতৰা সঠো.

২৫৩. পরৰজ্জানুপস্সিস্স, নিচ্চং উজ্ঝানসঞ্ঞিনো;

আসৰা তস্স ৰড্ঢন্তি, আরা সো আসৰক্খযা.

২৫৪. আকাসেৰ পদং নত্থি, সমণো নত্থি বাহিরে;

পপঞ্চাভিরতা পজা, নিপ্পপঞ্চা তথাগতা.

২৫৫. আকাসেৰ পদং নত্থি, সমণো নত্থি বাহিরে;

সঙ্খারা সস্সতা নত্থি, নত্থি বুদ্ধানমিঞ্জিতং.

মলৰগ্গো অট্ঠারসমো নিট্ঠিতো.