১৭. কোধৰগ্গো

২২১. কোধং জহে ৰিপ্পজহেয্য মানং, সংযোজনং সব্বমতিক্কমেয্য;

তং নামরূপস্মিমসজ্জমানং, অকিঞ্চনং নানুপতন্তি দুক্খা.

২২২. যো ৰে উপ্পতিতং কোধং, রথং ভন্তংৰ ৰারযে [ধারযে (সী. স্যা. পী.)];

তমহং সারথিং ব্রূমি, রস্মিগ্গাহো ইতরো জনো.

২২৩. অক্কোধেন জিনে কোধং, অসাধুং সাধুনা জিনে;

জিনে কদরিযং দানেন, সচ্চেনালিকৰাদিনং.

২২৪. সচ্চং ভণে ন কুজ্ঝেয্য, দজ্জা অপ্পম্পি [দজ্জা’প্পস্মিম্পি (সী. পী.), দজ্জা অপ্পস্মি (স্যা. ক.)] যাচিতো;

এতেহি তীহি ঠানেহি, গচ্ছে দেৰান সন্তিকে.

২২৫. অহিংসকা যে মুনযো [অহিংসকাযা মুনযো (ক.)], নিচ্চং কাযেন সংৰুতা;

তে যন্তি অচ্চুতং ঠানং, যত্থ গন্ত্ৰা ন সোচরে.

২২৬. সদা জাগরমানানং, অহোরত্তানুসিক্খিনং;

নিব্বানং অধিমুত্তানং, অত্থং গচ্ছন্তি আসৰা.

২২৭. পোরাণমেতং অতুল, নেতং অজ্জতনামিৰ;

নিন্দন্তি তুণ্হিমাসীনং, নিন্দন্তি বহুভাণিনং;

মিতভাণিম্পি নিন্দন্তি, নত্থি লোকে অনিন্দিতো.

২২৮. ন চাহু ন চ ভৰিস্সতি, ন চেতরহি ৰিজ্জতি;

একন্তং নিন্দিতো পোসো, একন্তং ৰা পসংসিতো.

২২৯. যং চে ৰিঞ্ঞূ পসংসন্তি, অনুৰিচ্চ সুৰে সুৰে;

অচ্ছিদ্দৰুত্তিং [অচ্ছিন্নৰুত্তিং (ক.)] মেধাৰিং, পঞ্ঞাসীলসমাহিতং.

২৩০. নিক্খং [নেক্খং (সী. স্যা. পী.)] জম্বোনদস্সেৰ, কো তং নিন্দিতুমরহতি;

দেৰাপি নং পসংসন্তি, ব্রহ্মুনাপি পসংসিতো.

২৩১. কাযপ্পকোপং রক্খেয্য, কাযেন সংৰুতো সিযা;

কাযদুচ্চরিতং হিত্ৰা, কাযেন সুচরিতং চরে.

২৩২. ৰচীপকোপং রক্খেয্য, ৰাচায সংৰুতো সিযা;

ৰচীদুচ্চরিতং হিত্ৰা, ৰাচায সুচরিতং চরে.

২৩৩. মনোপকোপং রক্খেয্য, মনসা সংৰুতো সিযা;

মনোদুচ্চরিতং হিত্ৰা, মনসা সুচরিতং চরে.

২৩৪. কাযেন সংৰুতা ধীরা, অথো ৰাচায সংৰুতা;

মনসা সংৰুতা ধীরা, তে ৰে সুপরিসংৰুতা.

কোধৰগ্গো সত্তরসমো নিট্ঠিতো.