৬. তেমিযচরিযা

৪৮. ‘‘পুনাপরং যদা হোমি, কাসিরাজস্স অত্রজো;

মূগপক্খোতি নামেন, তেমিযোতি ৰদন্তি মং.

৪৯. ‘‘সোল়সিত্থিসহস্সানং, ন ৰিজ্জতি পুমো তদা [সদা (সী.)];

অহোরত্তানং অচ্চযেন, নিব্বত্তো অহমেককো.

৫০. ‘‘কিচ্ছা লদ্ধং পিযং পুত্তং, অভিজাতং জুতিন্ধরং;

সেতচ্ছত্তং ধারযিত্ৰান, সযনে পোসেতি মং পিতা.

৫১. ‘‘নিদ্দাযমানো সযনৰরে, পবুজ্ঝিত্ৰানহং তদা;

অদ্দসং পণ্ডরং ছত্তং, যেনাহং নিরযং গতো.

৫২. ‘‘সহ দিট্ঠস্স মে ছত্তং, তাসো উপ্পজ্জি ভেরৰো;

ৰিনিচ্ছযং সমাপন্নো, ‘কথাহং ইমং মুঞ্চিস্সং’.

৫৩. ‘‘পুব্বসালোহিতা ময্হং, দেৰতা অত্থকামিনী;

সা মং দিস্ৰান দুক্খিতং, তীসু ঠানেসু যোজযি.

৫৪. ‘‘‘মা পণ্ডিচ্চযং ৰিভাৰয, বালমতো ভৰ সব্বপাণিনং;

সব্বো তং জনো ওচিনাযতু, এৰং তৰ অত্থো ভৰিস্সতি’.

৫৫. ‘‘এৰং ৰুত্তাযহং তস্সা, ইদং ৰচনমব্রৰিং;

‘করোমি তে তং ৰচনং, যং ত্ৰং ভণসি দেৰতে;

অত্থকামাসি মে অম্ম, হিতকামাসি দেৰতে’.

৫৬. ‘‘তস্সাহং ৰচনং সুত্ৰা, সাগরেৰ থলং লভিং;

হট্ঠো সংৰিগ্গমানসো, তযো অঙ্গে অধিট্ঠহিং.

৫৭. ‘‘মূগো অহোসিং বধিরো, পক্খো গতিৰিৰজ্জিতো;

এতে অঙ্গে অধিট্ঠায, ৰস্সানি সোল়সং ৰসিং.

৫৮. ‘‘ততো মে হত্থপাদে চ, জিৰ্হং সোতঞ্চ মদ্দিয;

অনূনতং মে পস্সিত্ৰা, ‘কাল়কণ্ণী’তি নিন্দিসুং.

৫৯. ‘‘ততো জানপদা সব্বে, সেনাপতিপুরোহিতা;

সব্বে একমনা হুত্ৰা, ছড্ডনং অনুমোদিসুং.

৬০. ‘‘সোহং তেসং মতিং সুত্ৰা, হট্ঠো সংৰিগ্গমানসো;

যস্সত্থায তপোচিণ্ণো, সো মে অত্থো সমিজ্ঝথ.

৬১. ‘‘ন্হাপেত্ৰা অনুলিম্পিত্ৰা, ৰেঠেত্ৰা রাজৰেঠনং;

ছত্তেন অভিসিঞ্চিত্ৰা, কারেসুং পুরং পদক্খিণং.

৬২. ‘‘সত্তাহং ধারযিত্ৰান, উগ্গতে রৰিমণ্ডলে;

রথেন মং নীহরিত্ৰা, সারথী ৰনমুপাগমি.

৬৩. ‘‘একোকাসে রথং কত্ৰা, সজ্জস্সং হত্থমুচ্চিতো [হত্থমুঞ্চিতো (সী. স্যা.)];

সারথী খণতী কাসুং, নিখাতুং পথৰিযা মমং.

৬৪. ‘‘অধিট্ঠিতমধিট্ঠানং, তজ্জেন্তো ৰিৰিধকারণা;

ন ভিন্দিং তমধিট্ঠানং, বোধিযাযেৰ কারণা.

৬৫. ‘‘মাতাপিতা ন মে দেস্সা, অত্তা মে ন চ দেস্সিযো;

সব্বঞ্ঞুতং পিযং ময্হং, তস্মা ৰতমধিট্ঠহিং.

৬৬. ‘‘এতে অঙ্গে অধিট্ঠায, ৰস্সানি সোল়সং ৰসিং;

অধিট্ঠানেন মে সমো নত্থি, এসা মে অধিট্ঠানপারমী’’তি.

তেমিযচরিযং ছট্ঠং.