নমো তস্স ভগৰতো অরহতো সম্মাসম্বুদ্ধস্স

খুদ্দকনিকাযে

চরিযাপিটকপাল়ি

১. অকিত্তিৰগ্গো

১. অকিত্তিচরিযা

১. ‘‘কপ্পে চ সতসহস্সে, চতুরো চ অসঙ্খিযে;

এত্থন্তরে যং চরিতং, সব্বং তং বোধিপাচনং.

২. ‘‘অতীতকপ্পে চরিতং, ঠপযিত্ৰা ভৰাভৰে;

ইমম্হি কপ্পে চরিতং, পৰক্খিস্সং সুণোহি মে.

৩. ‘‘যদা অহং ব্রহারঞ্ঞে, সুঞ্ঞে ৰিপিনকাননে;

অজ্ঝোগাহেত্ৰা [অজ্ঝোগহেত্ৰা (সী. স্যা.)] ৰিহরামি, অকিত্তি নাম তাপসো.

৪. ‘‘তদা মং তপতেজেন, সন্তত্তো তিদিৰাভিভূ;

ধারেন্তো ব্রাহ্মণৰণ্ণং, ভিক্খায মং উপাগমি.

৫. ‘‘পৰনা আভতং পণ্ণং, অতেলঞ্চ অলোণিকং;

মম দ্ৰারে ঠিতং দিস্ৰা, সকটাহেন আকিরিং.

৬. ‘‘তস্স দত্ৰানহং পণ্ণং, নিক্কুজ্জিত্ৰান ভাজনং;

পুনেসনং জহিত্ৰান, পাৰিসিং পণ্ণসালকং.

৭. ‘‘দুতিযম্পি ততিযম্পি, উপগঞ্ছি মমন্তিকং;

অকম্পিতো অনোলগ্গো, এৰমেৰমদাসহং.

৮. ‘‘ন মে তপ্পচ্চযা অত্থি, সরীরস্মিং ৰিৰণ্ণিযং;

পীতিসুখেন রতিযা, ৰীতিনামেমি তং দিৰং.

৯. ‘‘যদি মাসম্পি দ্ৰেমাসং, দক্খিণেয্যং ৰরং লভে;

অকম্পিতো অনোলীনো, দদেয্যং দানমুত্তমং.

১০. ‘‘ন তস্স দানং দদমানো, যসং লাভঞ্চ পত্থযিং;

সব্বঞ্ঞুতং পত্থযানো, তানি কম্মানি আচরি’’ন্তি.

অকিত্তিচরিযং পঠমং.

২. সঙ্খচরিযা

১১. ‘‘পুনাপরং যদা হোমি, ব্রাহ্মণো সঙ্খসৰ্হযো;

মহাসমুদ্দং তরিতুকামো, উপগচ্ছামি পট্টনং.

১২. ‘‘তত্থদ্দসং পটিপথে, সযম্ভুং অপরাজিতং;

কন্তারদ্ধানং পটিপন্নং [কন্তারদ্ধানপটিপন্নং (সী. স্যা.)], তত্তায কঠিনভূমিযা.

১৩. ‘‘তমহং পটিপথে দিস্ৰা, ইমমত্থং ৰিচিন্তযিং;

‘ইদং খেত্তং অনুপ্পত্তং, পুঞ্ঞকামস্স জন্তুনো.

১৪. ‘‘‘যথা কস্সকো পুরিসো, খেত্তং দিস্ৰা মহাগমং;

তত্থ বীজং ন রোপেতি, ন সো ধঞ্ঞেন অত্থিকো.

১৫. ‘‘‘এৰমেৰাহং পুঞ্ঞকামো, দিস্ৰা খেত্তৰরুত্তমং;

যদি তত্থ কারং ন করোমি, নাহং পুঞ্ঞেন অত্থিকো.

১৬. ‘‘‘যথা অমচ্চো মুদ্দিকামো, রঞ্ঞো অন্তেপুরে জনে;

ন দেতি তেসং ধনধঞ্ঞং, মুদ্দিতো পরিহাযতি.

১৭. ‘‘‘এৰমেৰাহং পুঞ্ঞকামো, ৰিপুলং দিস্ৰান দক্খিণং;

যদি তস্স দানং ন দদামি, পরিহাযিস্সামি পুঞ্ঞতো’.

১৮. ‘‘এৰাহং চিন্তযিত্ৰান, ওরোহিত্ৰা উপাহনা;

তস্স পাদানি ৰন্দিত্ৰা, অদাসিং ছত্তুপাহনং.

১৯. ‘‘তেনেৰাহং সতগুণতো, সুখুমালো সুখেধিতো;

অপি চ দানং পরিপূরেন্তো, এৰং তস্স অদাসহ’’ন্তি.

সঙ্খচরিযং দুতিযং.

৩. কুরুরাজচরিযা

২০. ‘‘পুনাপরং যদা হোমি, ইন্দপত্থে [ইন্দপত্তে (সী. ক.)] পুরুত্তমে;

রাজা ধনঞ্চযো নাম, কুসলে দসহুপাগতো.

২১. ‘‘কলিঙ্গরট্ঠৰিসযা, ব্রাহ্মণা উপগঞ্ছু মং;

আযাচুং মং হত্থিনাগং, ধঞ্ঞং মঙ্গলসম্মতং.

২২. ‘‘‘অৰুট্ঠিকো জনপদো, দুব্ভিক্খো ছাতকো মহা;

দদাহি পৰরং নাগং, নীলং অঞ্জনসৰ্হযং.

২৩. ‘‘‘ন মে যাচকমনুপ্পত্তে, পটিক্খেপো অনুচ্ছৰো;

মা মে ভিজ্জি সমাদানং, দস্সামি ৰিপুলং গজং’.

২৪. ‘‘নাগং গহেত্ৰা সোণ্ডায, ভিঙ্গারে [ভিঙ্কারে (সী.)] রতনামযে;

জলং হত্থে আকিরিত্ৰা, ব্রাহ্মণানং অদং গজং.

২৫. ‘‘তস্স নাগে পদিন্নম্হি, অমচ্চা এতদব্রৰুং;

‘কিং নু তুয্হং ৰরং নাগং, যাচকানং পদস্সসি.

২৬. ‘‘‘ধঞ্ঞং মঙ্গলসম্পন্নং, সঙ্গামৰিজযুত্তমং;

তস্মিং নাগে পদিন্নম্হি, কিং তে রজ্জং করিস্সতি.

২৭. ‘‘‘রজ্জম্পি মে দদে সব্বং, সরীরং দজ্জমত্তনো;

সব্বঞ্ঞুতং পিযং ময্হং, তস্মা নাগং অদাসহ’’’ন্তি.

কুরুরাজচরিযং ততিযং.

৪. মহাসুদস্সনচরিযা

২৮. ‘‘কুসাৰতিম্হি নগরে, যদা আসিং মহীপতি;

মহাসুদস্সনো নাম, চক্কৰত্তী মহব্বলো.

২৯. ‘‘তত্থাহং দিৰসে তিক্খত্তুং, ঘোসাপেমি তহিং তহিং;

‘কো কিং ইচ্ছতি পত্থেতি, কস্স কিং দীযতূ ধনং.

৩০. ‘‘‘কো ছাতকো কো তসিতো, কো মালং কো ৰিলেপনং;

নানারত্তানি ৰত্থানি, কো নগ্গো পরিদহিস্সতি.

৩১. ‘‘‘কো পথে ছত্তমাদেতি, কোপাহনা মুদূ সুভা’;

ইতি সাযঞ্চ পাতো চ, ঘোসাপেমি তহিং তহিং.

৩২. ‘‘ন তং দসসু ঠানেসু, নপি ঠানসতেসু ৰা;

অনেকসতঠানেসু, পটিযত্তং যাচকে ধনং.

৩৩. ‘‘দিৰা ৰা যদি ৰা রত্তিং, যদি এতি ৰনিব্বকো;

লদ্ধা যদিচ্ছকং ভোগং, পূরহত্থোৰ গচ্ছতি.

৩৪. ‘‘এৰরূপং মহাদানং, অদাসিং যাৰজীৰিকং;

নপাহং দেস্সং ধনং দম্মি, নপি নত্থি নিচযো মযি.

৩৫. ‘‘যথাপি আতুরো নাম, রোগতো পরিমুত্তিযা;

ধনেন ৰেজ্জং তপ্পেত্ৰা, রোগতো পরিমুচ্চতি.

৩৬. ‘‘তথেৰাহং জানমানো, পরিপূরেতুমসেসতো;

ঊনমনং পূরযিতুং, দেমি দানং ৰনিব্বকে;

নিরালযো অপচ্চাসো, সম্বোধিমনুপত্তিযা’’তি.

মহাসুদস্সনচরিযং চতুত্থং.

৫. মহাগোৰিন্দচরিযা

৩৭. ‘‘পুনাপরং যদা হোমি, সত্তরাজপুরোহিতো;

পূজিতো নরদেৰেহি, মহাগোৰিন্দব্রাহ্মণো.

৩৮. ‘‘তদাহং সত্তরজ্জেসু, যং মে আসি উপাযনং;

তেন দেমি মহাদানং, অক্খোব্ভং [অক্খোভং (স্যা. কং.)] সাগরূপমং.

৩৯. ‘‘ন মে দেস্সং ধনং ধঞ্ঞং, নপি নত্থি নিচযো মযি;

সব্বঞ্ঞুতং পিযং ময্হং, তস্মা দেমি ৰরং ধন’’ন্তি.

মহাগোৰিন্দচরিযং পঞ্চমং.

৬. নিমিরাজচরিযা

৪০. ‘‘পুনাপরং যদা হোমি, মিথিলাযং পুরুত্তমে;

নিমি নাম মহারাজা, পণ্ডিতো কুসলত্থিকো.

৪১. ‘‘তদাহং মাপযিত্ৰান, চতুস্সালং চতুম্মুখং;

তত্থ দানং পৰত্তেসিং, মিগপক্খিনরাদিনং.

৪২. ‘‘অচ্ছাদনঞ্চ সযনং, অন্নং পানঞ্চ ভোজনং;

অব্বোচ্ছিন্নং করিত্ৰান, মহাদানং পৰত্তযিং.

৪৩. ‘‘যথাপি সেৰকো সামিং, ধনহেতুমুপাগতো;

কাযেন ৰাচা মনসা, আরাধনীযমেসতি.

৪৪. ‘‘তথেৰাহং সব্বভৰে, পরিযেসিস্সামি বোধিজং;

দানেন সত্তে তপ্পেত্ৰা, ইচ্ছামি বোধিমুত্তম’’ন্তি.

নিমিরাজচরিযং ছট্ঠং.

৭. চন্দকুমারচরিযা

৪৫. ‘‘পুনাপরং যদা হোমি, একরাজস্স অত্রজো;

নগরে পুপ্ফৰতিযা, কুমারো চন্দসৰ্হযো.

৪৬. ‘‘তদাহং যজনা মুত্তো, নিক্খন্তো যঞ্ঞৰাটতো;

সংৰেগং জনযিত্ৰান, মহাদানং পৰত্তযিং.

৪৭. ‘‘নাহং পিৰামি খাদামি, নপি ভুঞ্জামি ভোজনং;

দক্খিণেয্যে অদত্ৰান, অপি ছপ্পঞ্চরত্তিযো.

৪৮. ‘‘যথাপি ৰাণিজো নাম, কত্ৰান ভণ্ডসঞ্চযং;

যত্থ লাভো মহা হোতি, তত্থ তং [তত্থ নং (সী.), তত্থ (ক.)] হরতি ভণ্ডকং.

৪৯. ‘‘তথেৰ সকভুত্তাপি, পরে দিন্নং মহপ্ফলং;

তস্মা পরস্স দাতব্বং, সতভাগো ভৰিস্সতি.

৫০. ‘‘এতমত্থৰসং ঞত্ৰা, দেমি দানং ভৰাভৰে;

ন পটিক্কমামি দানতো, সম্বোধিমনুপত্তিযা’’তি.

চন্দকুমারচরিযং সত্তমং.

৮. সিৰিরাজচরিযা

৫১. ‘‘অরিট্ঠসৰ্হযে নগরে, সিৰিনামাসি খত্তিযো;

নিসজ্জ পাসাদৰরে, এৰং চিন্তেসহং তদা.

৫২. ‘‘‘যং কিঞ্চি মানুসং দানং, অদিন্নং মে ন ৰিজ্জতি;

যোপি যাচেয্য মং চক্খুং, দদেয্যং অৰিকম্পিতো’.

৫৩. ‘‘মম সঙ্কপ্পমঞ্ঞায, সক্কো দেৰানমিস্সরো;

নিসিন্নো দেৰপরিসায, ইদং ৰচনমব্রৰি.

৫৪. ‘‘‘নিসজ্জ পাসাদৰরে, সিৰিরাজা মহিদ্ধিকো;

চিন্তেন্তো ৰিৰিধং দানং, অদেয্যং সো ন পস্সতি.

৫৫. ‘‘‘তথং নু ৰিতথং নেতং, হন্দ ৰীমংসযামি তং;

মুহুত্তং আগমেয্যাথ, যাৰ জানামি তং মনং’.

৫৬. ‘‘পৰেধমানো পলিতসিরো, ৰলিগত্তো [ৰলিতগত্তো (সী.)] জরাতুরো;

অন্ধৰণ্ণোৰ হুত্ৰান, রাজানং উপসঙ্কমি.

৫৭. ‘‘সো তদা পগ্গহেত্ৰান, ৰামং দক্খিণবাহু চ;

সিরস্মিং অঞ্জলিং কত্ৰা, ইদং ৰচনমব্রৰি.

৫৮. ‘‘‘যাচামি তং মহারাজ, ধম্মিক রট্ঠৰড্ঢন;

তৰ দানরতা কিত্তি, উগ্গতা দেৰমানুসে.

৫৯. ‘‘‘উভোপি নেত্তা নযনা, অন্ধা উপহতা মম;

একং মে নযনং দেহি, ত্ৰম্পি একেন যাপয’.

৬০. ‘‘তস্সাহং ৰচনং সুত্ৰা, হট্ঠো সংৰিগ্গমানসো;

কতঞ্জলী ৰেদজাতো, ইদং ৰচনমব্রৰিং.

৬১. ‘‘‘ইদানাহং চিন্তযিত্ৰান, পাসাদতো ইধাগতো;

ত্ৰং মম চিত্তমঞ্ঞায, নেত্তং যাচিতুমাগতো.

৬২. ‘‘‘অহো মে মানসং সিদ্ধং, সঙ্কপ্পো পরিপূরিতো;

অদিন্নপুব্বং দানৰরং, অজ্জ দস্সামি যাচকে.

৬৩. ‘‘‘এহি সিৰক উট্ঠেহি, মা দন্ধযি মা পৰেধযি;

উভোপি নযনং দেহি, উপ্পাটেত্ৰা ৰণিব্বকে’.

৬৪. ‘‘ততো সো চোদিতো ময্হং, সিৰকো ৰচনং করো;

উদ্ধরিত্ৰান পাদাসি, তালমিঞ্জংৰ যাচকে.

৬৫. ‘‘দদমানস্স দেন্তস্স, দিন্নদানস্স মে সতো;

চিত্তস্স অঞ্ঞথা নত্থি, বোধিযাযেৰ কারণা.