৩. অযোঘরচরিযা

২৪. ‘‘পুনাপরং যদা হোমি, কাসিরাজস্স অত্রজো;

অযোঘরম্হি সংৰড্ঢো, নামেনাসি অযোঘরো.

২৫. ‘‘দুক্খেন জীৰিতো লদ্ধো, সংপীল়ে পতিপোসিতো;

অজ্জেৰ পুত্ত পটিপজ্জ, কেৰলং ৰসুধং ইমং.

২৬. ‘‘সরট্ঠকং সনিগমং, সজনং ৰন্দিত্ৰ খত্তিযং;

অঞ্জলিং পগ্গহেত্ৰান, ইদং ৰচনমব্রৰিং.

২৭. ‘‘‘যে কেচি মহিযা সত্তা, হীনমুক্কট্ঠমজ্ঝিমা;

নিরারক্খা সকে গেহে, ৰড্ঢন্তি সকঞাতিভি.

২৮. ‘‘‘ইদং লোকে উত্তরিযং, সংপীল়ে মম পোসনং;

অযোঘরম্হি সংৰড্ঢো, অপ্পভে চন্দসূরিযে.

২৯. ‘‘‘পূতিকুণপসম্পুণ্ণা, মুচ্চিত্ৰা মাতু কুচ্ছিতো;

ততো ঘোরতরে দুক্খে, পুন পক্খিত্তযোঘরে.

৩০. ‘‘‘যদিহং তাদিসং পত্ৰা, দুক্খং পরমদারুণং;

রজ্জেসু যদি রজ্জামি [রঞ্জামি (সী.)], পাপানং উত্তমো সিযং.

৩১. ‘‘‘উক্কণ্ঠিতোম্হি কাযেন, রজ্জেনম্হি অনত্থিকো;

নিব্বুতিং পরিযেসিস্সং, যত্থ মং মচ্চু ন মদ্দিযে’.

৩২. ‘‘এৰাহং চিন্তযিত্ৰান, ৰিরৰন্তে মহাজনে;

নাগোৰ বন্ধনং ছেত্ৰা, পাৰিসিং কাননং ৰনং.

৩৩. ‘‘মাতাপিতা ন মে দেস্সা, নপি মে দেস্সং মহাযসং;

সব্বঞ্ঞুতং পিযং ময্হং, তস্মা রজ্জং পরিচ্চজি’’ন্তি.

অযোঘরচরিযং ততিযং.