১১. কণ্হদীপাযনচরিযা

৯২. ‘‘পুনাপরং যদা হোমি, কণ্হদীপাযনো ইসি;

পরোপঞ্ঞাসৰস্সানি, অনভিরতোচরিং অহং.

৯৩. ‘‘ন কোচি এতং জানাতি, অনভিরতিমনং মম;

অহঞ্হি কস্সচি নাচিক্খিং, অরতি মে চরতি মানসে.

৯৪. ‘‘সব্রহ্মচারী মণ্ডব্যো, সহাযো মে মহাইসি;

পুব্বকম্মসমাযুত্তো, সূলমারোপনং লভি.

৯৫. ‘‘তমহং উপট্ঠহিত্ৰান, আরোগ্যমনুপাপযিং;

আপুচ্ছিত্ৰান আগঞ্ছিং, যং ময্হং সকমস্সমং.

৯৬. ‘‘সহাযো ব্রাহ্মণো ময্হং, ভরিযং আদায পুত্তকং;

তযো জনা সমাগন্ত্ৰা, আগঞ্ছুং পাহুনাগতং.

৯৭. ‘‘সম্মোদমানো তেহি সহ, নিসিন্নো সকমস্সমে;

দারকো ৰট্টমনুক্খিপং, আসীৰিসমকোপযি.

৯৮. ‘‘ততো সো ৰট্টগতং মগ্গং, অন্ৰেসন্তো কুমারকো;

আসীৰিসস্স হত্থেন, উত্তমঙ্গং পরামসি.

৯৯. ‘‘তস্স আমসনে কুদ্ধো, সপ্পো ৰিসবলস্সিতো;

কুপিতো পরমকোপেন, অডংসি দারকং খণে.

১০০. ‘‘সহদট্ঠো আসীৰিসেন [অতিৰিসেন (পী. ক.)], দারকো পপতি [পততি (ক.)] ভূমিযং;

তেনাহং দুক্খিতো আসিং, মম ৰাহসি তং দুক্খং.

১০১. ‘‘ত্যাহং অস্সাসযিত্ৰান, দুক্খিতে সোকসল্লিতে;

পঠমং অকাসিং কিরিযং, অগ্গং সচ্চং ৰরুত্তমং.

১০২. ‘‘‘সত্তাহমেৰাহং পসন্নচিত্তো, পুঞ্ঞত্থিকো অচরিং ব্রহ্মচরিযং;

অথাপরং যং চরিতং মমেদং, ৰস্সানি পঞ্ঞাসসমাধিকানি.

১০৩. ‘‘‘অকামকো ৰাহি অহং চরামি, এতেন সচ্চেন সুৰত্থি হোতু;

হতং ৰিসং জীৰতু যঞ্ঞদত্তো’.

১০৪. ‘‘সহ সচ্চে কতে ময্হং, ৰিসৰেগেন ৰেধিতো;

অবুজ্ঝিত্ৰান ৰুট্ঠাসি, অরোগো চাসি মাণৰো;

সচ্চেন মে সমো নত্থি, এসা মে সচ্চপারমী’’তি.

কণ্হদীপাযনচরিযং একাদসমং.