১০. সঙ্খপালচরিযা

৮৫. ‘‘পুনাপরং যদা হোমি, সঙ্খপালো মহিদ্ধিকো;

দাঠাৰুধো ঘোরৰিসো, দ্ৰিজিৰ্হো উরগাধিভূ.

৮৬. ‘‘চতুপ্পথে মহামগ্গে, নানাজনসমাকুলে;

চতুরো অঙ্গে অধিট্ঠায, তত্থ ৰাসমকপ্পযিং.

৮৭. ‘‘ছৰিযা চম্মেন মংসেন, নহারুঅট্ঠিকেহি ৰা;

যস্স এতেন করণীযং, দিন্নংযেৰ হরাতু সো.

৮৮. ‘‘অদ্দসংসু ভোজপুত্তা, খরা লুদ্দা অকারুণা;

উপগঞ্ছুং মমং তত্থ, দণ্ডমুগ্গরপাণিনো.

৮৯. ‘‘নাসায ৰিনিৰিজ্ঝিত্ৰা, নঙ্গুট্ঠে পিট্ঠিকণ্টকে;

কাজে আরোপযিত্ৰান, ভোজপুত্তা হরিংসু মং.

৯০. ‘‘সসাগরন্তং পথৰিং, সকাননং সপব্বতং;

ইচ্ছমানো চহং তত্থ, নাসাৰাতেন ঝাপযে.

৯১. ‘‘সূলেহি ৰিনিৰিজ্ঝন্তে, কোট্টযন্তেপি সত্তিভি;

ভোজপুত্তে ন কুপ্পামি, এসা মে সীলপারমী’’তি.

সঙ্খপালচরিযং দসমং.

হত্থিনাগৰগ্গো দুতিযো.

তস্সুদ্দানং –

হত্থিনাগো ভূরিদত্তো, চম্পেয্যো বোধি মহিংসো;

রুরু মাতঙ্গো ধম্মো চ, অত্রজো চ জযদ্দিসো.

এতে নৰ সীলবলা, পরিক্খারা পদেসিকা;

জীৰিতং পরিরক্খিত্ৰা, সীলানি অনুরক্খিসং.

সঙ্খপালস্স মে সতো, সব্বকালম্পি জীৰিতং;

যস্স কস্সচি নিয্যত্তং, তস্মা সা সীলপারমীতি.

সীলপারমিনিদ্দেসো নিট্ঠিতো.