৯. ৰেস্সন্তরচরিযা

৬৭. ‘‘যা মে অহোসি জনিকা, ফুস্সতী [ফুসতী (সী.)] নাম খত্তিযা;

সা অতীতাসু জাতীসু, সক্কস্স মহেসী পিযা.

৬৮. ‘‘তস্সা আযুক্খযং ঞত্ৰা, দেৰিন্দো এতদব্রৰি;

‘দদামি তে দস ৰরে, ৰরভদ্দে যদিচ্ছসি’.

৬৯. ‘‘এৰং ৰুত্তা চ সা দেৰী, সক্কং পুনিদমব্রৰি;

‘কিং নু মে অপরাধত্থি, কিং নু দেস্সা অহং তৰ;

রম্মা চাৰেসি মং ঠানা, ৰাতোৰ ধরণীরুহং’.

৭০. ‘‘এৰং ৰুত্তো চ সো সক্কো, পুন তস্সিদমব্রৰি;

‘ন চেৰ তে কতং পাপং, ন চ মে ত্ৰংসি অপ্পিযা.

৭১. ‘‘‘এত্তকংযেৰ তে আযু, চৰনকালো ভৰিস্সতি;

পটিগ্গণ্হ মযা দিন্নে, ৰরে দস ৰরুত্তমে’.

৭২. ‘‘সক্কেন সা দিন্নৰরা, তুট্ঠহট্ঠা পমোদিতা;

মমং অব্ভন্তরং কত্ৰা, ফুস্সতী দস ৰরে ৰরী.

৭৩. ‘‘ততো চুতা সা ফুস্সতী, খত্তিযে উপপজ্জথ;

জেতুত্তরম্হি নগরে, সঞ্জযেন সমাগমি.

৭৪. ‘‘যদাহং ফুস্সতিযা কুচ্ছিং, ওক্কন্তো পিযমাতুযা;

মম তেজেন মে মাতা, সদা দানরতা অহু.

৭৫. ‘‘অধনে আতুরে জিণ্ণে, যাচকে অদ্ধিকে [পথিকে (ক.)] জনে;

সমণে ব্রাহ্মণে খীণে, দেতি দানং অকিঞ্চনে.

৭৬. ‘‘দস মাসে ধারযিত্ৰান, করোন্তে পুরং পদক্খিণং;

ৰেস্সানং ৰীথিযা মজ্ঝে, জনেসি ফুস্সতী মমং.

৭৭. ‘‘ন ময্হং মত্তিকং নামং, নপি পেত্তিকসম্ভৰং;

জাতেত্থ ৰেস্সৰীথিযা, তস্মা ৰেস্সন্তরো অহু.

৭৮. ‘‘যদাহং দারকো হোমি, জাতিযা অট্ঠৰস্সিকো;

তদা নিসজ্জ পাসাদে, দানং দাতুং ৰিচিন্তযিং.

৭৯. ‘‘‘হদযং দদেয্যং চক্খুং, মংসম্পি রুধিরম্পি চ;

দদেয্যং কাযং সাৰেত্ৰা, যদি কোচি যাচযে মমং’.

৮০. ‘‘সভাৰং চিন্তযন্তস্স, অকম্পিতমসণ্ঠিতং;

অকম্পি তত্থ পথৰী, সিনেরুৰনৰটংসকা.

৮১. ‘‘অন্ৰদ্ধমাসে পন্নরসে, পুণ্ণমাসে উপোসথে;

পচ্চযং নাগমারুয্হ, দানং দাতুং উপাগমিং.

৮২. ‘‘কলিঙ্গরট্ঠৰিসযা, ব্রাহ্মণা উপগঞ্ছু মং;

অযাচুং মং হত্থিনাগং, ধঞ্ঞং মঙ্গলসম্মতং.

৮৩. ‘‘অৰুট্ঠিকো জনপদো, দুব্ভিক্খো ছাতকো মহা;

দদাহি পৰরং নাগং, সব্বসেতং গজুত্তমং.

৮৪. ‘‘দদামি ন ৰিকম্পামি, যং মং যাচন্তি ব্রাহ্মণা;

সন্তং নপ্পতিগূহামি [নপ্পতিগুয্হামি (সী. ক.)], দানে মে রমতে মনো.

৮৫. ‘‘ন মে যাচকমনুপ্পত্তে, পটিক্খেপো অনুচ্ছৰো;

‘মা মে ভিজ্জি সমাদানং, দস্সামি ৰিপুলং গজং’.

৮৬. ‘‘নাগং গহেত্ৰা সোণ্ডায, ভিঙ্গারে রতনামযে;

জলং হত্থে আকিরিত্ৰা, ব্রাহ্মণানং অদং গজং.

৮৭. ‘‘পুনাপরং দদন্তস্স, সব্বসেতং গজুত্তমং;

তদাপি পথৰী কম্পি, সিনেরুৰনৰটংসকা.

৮৮. ‘‘তস্স নাগস্স দানেন, সিৰযো কুদ্ধা সমাগতা;

পব্বাজেসুং সকা রট্ঠা, ‘ৰঙ্কং গচ্ছতু পব্বতং’.

৮৯. ‘‘তেসং নিচ্ছুভমানানং, অকম্পিত্থমসণ্ঠিতং;

মহাদানং পৰত্তেতুং, একং ৰরমযাচিসং.

৯০. ‘‘যাচিতা সিৰযো সব্বে, একং ৰরমদংসু মে;

সাৰযিত্ৰা কণ্ণভেরিং, মহাদানং দদামহং.

৯১. ‘‘অথেত্থ ৰত্ততী সদ্দো, তুমুলো ভেরৰো মহা;

দানেনিমং নীহরন্তি, পুন দানং দদাতযং.

৯২. ‘‘হত্থিং অস্সে রথে দত্ৰা, দাসিং দাসং গৰং ধনং;

মহাদানং দদিত্ৰান, নগরা নিক্খমিং তদা.

৯৩. ‘‘নিক্খমিত্ৰান নগরা, নিৰত্তিত্ৰা ৰিলোকিতে;

তদাপি পথৰী কম্পি, সিনেরুৰনৰটংসকা.

৯৪. ‘‘চতুৰাহিং রথং দত্ৰা, ঠত্ৰা চাতুম্মহাপথে;

একাকিযো অদুতিযো, মদ্দিদেৰিং ইদমব্রৰিং.

৯৫. ‘‘‘ত্ৰং মদ্দি কণ্হং গণ্হাহি, লহুকা এসা কনিট্ঠিকা;

অহং জালিং গহেস্সামি, গরুকো ভাতিকো হি সো’.

৯৬. ‘‘পদুমং পুণ্ডরীকংৰ, মদ্দী কণ্হাজিনগ্গহী;

অহং সুৰণ্ণবিম্বংৰ, জালিং খত্তিযমগ্গহিং.

৯৭. ‘‘অভিজাতা সুখুমালা, খত্তিযা চতুরো জনা;

ৰিসমং সমং অক্কমন্তা, ৰঙ্কং গচ্ছাম পব্বতং.

৯৮. ‘‘যে কেচি মনুজা এন্তি, অনুমগ্গে পটিপ্পথে;

মগ্গন্তে পটিপুচ্ছাম, ‘কুহিং ৰঙ্কন্ত [ৰঙ্কত (সী.)] পব্বতো’.

৯৯. ‘‘তে তত্থ অম্হে পস্সিত্ৰা, করুণং গিরমুদীরযুং;

দুক্খং তে পটিৰেদেন্তি, দূরে ৰঙ্কন্তপব্বতো.

১০০. ‘‘যদি পস্সন্তি পৰনে, দারকা ফলিনে দুমে;

তেসং ফলানং হেতুম্হি, উপরোদন্তি দারকা.

১০১. ‘‘রোদন্তে দারকে দিস্ৰা, উব্বিদ্ধা [উব্বিগ্গা (স্যা. কং.)] ৰিপুলা দুমা;

সযমেৰোণমিত্ৰান, উপগচ্ছন্তি দারকে.

১০২. ‘‘ইদং অচ্ছরিযং দিস্ৰা, অব্ভুতং লোমহংসনং;

সাহুকারং [সাধুকারং (সব্বত্থ)] পৰত্তেসি, মদ্দী সব্বঙ্গসোভনা.

১০৩. ‘‘অচ্ছেরং ৰত লোকস্মিং, অব্ভুতং লোমহংসনং;

ৰেস্সন্তরস্স তেজেন, সযমেৰোণতা দুমা.

১০৪. ‘‘সঙ্খিপিংসু পথং যক্খা, অনুকম্পায দারকে;

নিক্খন্তদিৰসেনেৰ [নিক্খন্তদিৰসেযেৰ (সী.)], চেতরট্ঠমুপাগমুং.

১০৫. ‘‘সট্ঠিরাজসহস্সানি, তদা ৰসন্তি মাতুলে;

সব্বে পঞ্জলিকা হুত্ৰা, রোদমানা উপাগমুং.

১০৬. ‘‘তত্থ ৰত্তেত্ৰা সল্লাপং, চেতেহি চেতপুত্তেহি;

তে ততো নিক্খমিত্ৰান, ৰঙ্কং অগমু পব্বতং.

১০৭. ‘‘আমন্তযিত্ৰা দেৰিন্দো, ৰিস্সকম্মং [ৰিসুকম্মং (ক.)] মহিদ্ধিকং;

অস্সমং সুকতং রম্মং, পণ্ণসালং সুমাপয.

১০৮. ‘‘সক্কস্স ৰচনং সুত্ৰা, ৰিস্সকম্মো মহিদ্ধিকো;

অস্সমং সুকতং রম্মং, পণ্ণসালং সুমাপযি.

১০৯. ‘‘অজ্ঝোগাহেত্ৰা পৰনং, অপ্পসদ্দং নিরাকুলং;

চতুরো জনা মযং তত্থ, ৰসাম পব্বতন্তরে.

১১০. ‘‘অহঞ্চ মদ্দিদেৰী চ, জালী কণ্হাজিনা চুভো;

অঞ্ঞমঞ্ঞং সোকনুদা, ৰসাম অস্সমে তদা.

১১১. ‘‘দারকে অনুরক্খন্তো, অসুঞ্ঞো হোমি অস্সমে;

মদ্দী ফলং আহরিত্ৰা, পোসেতি সা তযো জনে.

১১২. ‘‘পৰনে ৰসমানস্স, অদ্ধিকো মং উপাগমি;

আযাচি পুত্তকে ময্হং, জালিং কণ্হাজিনং চুভো.

১১৩. ‘‘যাচকং উপগতং দিস্ৰা, হাসো মে উপপজ্জথ;

উভো পুত্তে গহেত্ৰান, অদাসিং ব্রাহ্মণে তদা.

১১৪. ‘‘সকে পুত্তে চজন্তস্স, জূজকে ব্রাহ্মণে যদা;

তদাপি পথৰী কম্পি, সিনেরুৰনৰটংসকা.

১১৫. ‘‘পুনদেৰ সক্কো ওরুয্হ, হুত্ৰা ব্রাহ্মণসন্নিভো;

আযাচি মং মদ্দিদেৰিং, সীলৰন্তিং পতিব্বতং.

১১৬. ‘‘মদ্দিং হত্থে গহেত্ৰান, উদকঞ্জলি পূরিয;

পসন্নমনসঙ্কপ্পো, তস্স মদ্দিং অদাসহং.

১১৭. ‘‘মদ্দিযা দীযমানায, গগনে দেৰা পমোদিতা;

তদাপি পথৰী কম্পি, সিনেরুৰনৰটংসকা.

১১৮. ‘‘জালিং কণ্হাজিনং ধীতং, মদ্দিদেৰিং পতিব্বতং;

চজমানো ন চিন্তেসিং, বোধিযাযেৰ কারণা.

১১৯. ‘‘ন মে দেস্সা উভো পুত্তা, মদ্দিদেৰী ন দেস্সিযা;

সব্বঞ্ঞুতং পিযং ময্হং, তস্মা পিযে অদাসহং.

১২০. ‘‘পুনাপরং ব্রহারঞ্ঞে, মাতাপিতুসমাগমে;

করুণং পরিদেৰন্তে, সল্লপন্তে সুখং দুখং.

১২১. ‘‘হিরোত্তপ্পেন গরুনা [গরুনং (স্যা. ক.)], উভিন্নং উপসঙ্কমি;

তদাপি পথৰী কম্পি, সিনেরুৰনৰটংসকা.

১২২. ‘‘পুনাপরং ব্রহারঞ্ঞা, নিক্খমিত্ৰা সঞাতিভি;

পৰিসামি পুরং রম্মং, জেতুত্তরং পুরুত্তমং.

১২৩. ‘‘রতনানি সত্ত ৰস্সিংসু, মহামেঘো পৰস্সথ;

তদাপি পথৰী কম্পি, সিনেরুৰনৰটংসকা.

১২৪. ‘‘অচেতনাযং পথৰী, অৰিঞ্ঞায সুখং দুখং;

সাপি দানবলা ময্হং, সত্তক্খত্তুং পকম্পথা’’তি.

ৰেস্সন্তরচরিযং নৰমং.