১০. সসপণ্ডিতচরিযা

১২৫. ‘‘পুনাপরং যদা হোমি, সসকো পৰনচারকো;

তিণপণ্ণসাকফলভক্খো, পরহেঠনৰিৰজ্জিতো.

১২৬. ‘‘মক্কটো চ সিঙ্গালো চ, সুত্তপোতো চহং তদা;

ৰসাম একসামন্তা, সাযং পাতো চ দিস্সরে [সাযং পাতো পদিস্সরে (ক.)].

১২৭. ‘‘অহং তে অনুসাসামি, কিরিযে কল্যাণপাপকে;

‘পাপানি পরিৰজ্জেথ, কল্যাণে অভিনিৰিস্সথ’.

১২৮. ‘‘উপোসথম্হি দিৰসে, চন্দং দিস্ৰান পূরিতং;

এতেসং তত্থ আচিক্খিং, দিৰসো অজ্জুপোসথো.

১২৯. ‘‘দানানি পটিযাদেথ, দক্খিণেয্যস্স দাতৰে;

দত্ৰা দানং দক্খিণেয্যে, উপৰস্সথুপোসথং.

১৩০. ‘‘তে মে সাধূতি ৰত্ৰান, যথাসত্তি যথাবলং;

দানানি পটিযাদেত্ৰা, দক্খিণেয্যং গৰেসিসুং [গৰেসয্যুং (ক.)].

১৩১. ‘‘অহং নিসজ্জ চিন্তেসিং, দানং দক্খিণনুচ্ছৰং;

‘যদিহং লভে দক্খিণেয্যং, কিং মে দানং ভৰিস্সতি.

১৩২. ‘‘‘ন মে অত্থি তিলা মুগ্গা, মাসা ৰা তণ্ডুলা ঘতং;

অহং তিণেন যাপেমি, ন সক্কা তিণ দাতৰে.

১৩৩. ‘‘‘যদি কোচি এতি দক্খিণেয্যো, ভিক্খায মম সন্তিকে;

দজ্জাহং সকমত্তানং, ন সো তুচ্ছো গমিস্সতি’.

১৩৪. ‘‘মম সঙ্কপ্পমঞ্ঞায, সক্কো ব্রাহ্মণৰণ্ণিনা;

আসযং মে উপাগচ্ছি, দানৰীমংসনায মে.

১৩৫. ‘‘তমহং দিস্ৰান সন্তুট্ঠো, ইদং ৰচনমব্রৰিং;

‘সাধু খোসি অনুপ্পত্তো, ঘাসহেতু মমন্তিকে.

১৩৬. ‘‘‘অদিন্নপুব্বং দানৰরং, অজ্জ দস্সামি তে অহং;

তুৰং সীলগুণূপেতো, অযুত্তং তে পরহেঠনং.

১৩৭. ‘‘‘এহি অগ্গিং পদীপেহি, নানাকট্ঠে সমানয;

অহং পচিস্সমত্তানং, পক্কং ত্ৰং ভক্খযিস্সসি’.

১৩৮. ‘‘‘সাধূ’তি সো হট্ঠমনো, নানাকট্ঠে সমানযি;

মহন্তং অকাসি চিতকং, কত্ৰা অঙ্গারগব্ভকং.

১৩৯. ‘‘অগ্গিং তত্থ পদীপেসি, যথা সো খিপ্পং মহা ভৰে;

ফোটেত্ৰা রজগতে গত্তে, একমন্তং উপাৰিসিং.

১৪০. ‘‘যদা মহাকট্ঠপুঞ্জো, আদিত্তো ধমধমাযতি [ধুমধুমাযতি (সী.), ধমমাযতি (ক.)];

তদুপ্পতিত্ৰা পপতিং, মজ্ঝে জালসিখন্তরে.

১৪১. ‘‘যথা সীতোদকং নাম, পৰিট্ঠং যস্স কস্সচি;

সমেতি দরথপরিল়াহং, অস্সাদং দেতি পীতি চ.

১৪২. ‘‘তথেৰ জলিতং অগ্গিং, পৰিট্ঠস্স মমং তদা;

সব্বং সমেতি দরথং, যথা সীতোদকং ৰিয.

১৪৩. ‘‘ছৰিং চম্মং মংসং ন্হারুং, অট্ঠিং হদযবন্ধনং;

কেৰলং সকলং কাযং, ব্রাহ্মণস্স অদাসহ’’ন্তি.

সসপণ্ডিতচরিযং দসমং.

অকিত্তিৰগ্গো পঠমো.

তস্সুদ্দানং –

অকিত্তিব্রাহ্মণো সঙ্খো, কুরুরাজা ধনঞ্চযো;

মহাসুদস্সনো রাজা, মহাগোৰিন্দব্রাহ্মণো.

নিমি চন্দকুমারো চ, সিৰি ৰেস্সন্তরো সসো;

অহমেৰ তদা আসিং, যো তে দানৰরে অদা.

এতে দানপরিক্খারা, এতে দানস্স পারমী;

জীৰিতং যাচকে দত্ৰা, ইমং পারমি পূরযিং.

ভিক্খায উপগতং দিস্ৰা, সকত্তানং পরিচ্চজিং;

দানেন মে সমো নত্থি, এসা মে দানপারমীতি.

দানপারমিনিদ্দেসো নিট্ঠিতো.