৯. অনোমদস্সীবুদ্ধৰংসো

১. সোভিতস্স অপরেন, সম্বুদ্ধো দ্ৰিপদুত্তমো;

অনোমদস্সী অমিতযসো, তেজস্সী দুরতিক্কমো.

২. সো ছেত্ৰা বন্ধনং সব্বং, ৰিদ্ধংসেত্ৰা তযো ভৰে;

অনিৰত্তিগমনং মগ্গং, দেসেসি দেৰমানুসে.

৩. সাগরোৰ অসঙ্খোভো, পব্বতোৰ দুরাসদো;

আকাসোৰ অনন্তো সো, সালরাজাৰ ফুল্লিতো.

৪. দস্সনেনপি তং বুদ্ধং, তোসিতা হোন্তি পাণিনো;

ব্যাহরন্তং গিরং সুত্ৰা, অমতং পাপুণন্তি তে.

৫. ধম্মাভিসমযো তস্স, ইদ্ধো ফীতো তদা অহু;

কোটিসতানি অভিসমিংসু, পঠমে ধম্মদেসনে.

৬. ততো পরং অভিসমযে, ৰস্সন্তে ধম্মৰুট্ঠিযো;

অসীতিকোটিযোভিসমিংসু, দুতিযে ধম্মদেসনে.

৭. ততোপরঞ্হি ৰস্সন্তে, তপ্পযন্তে চ পাণিনং;

অট্ঠসত্ততিকোটীনং, ততিযাভিসমযো অহু.

৮. সন্নিপাতা তযো আসুং, তস্সাপি চ মহেসিনো;

অভিঞ্ঞাবলপ্পত্তানং, পুপ্ফিতানং ৰিমুত্তিযা.

৯. অট্ঠসতসহস্সানং, সন্নিপাতো তদা অহু;

পহীনমদমোহানং, সন্তচিত্তান তাদিনং.

১০. সত্তসতসহস্সানং, দুতিযো আসি সমাগমো;

অনঙ্গণানং ৰিরজানং, উপসন্তান তাদিনং.

১১. ছন্নং সতসহস্সানং, ততিযো আসি সমাগমো;

অভিঞ্ঞাবলপ্পত্তানং, নিব্বুতানং তপস্সিনং.

১২. অহং তেন সমযেন, যক্খো আসিং মহিদ্ধিকো;

নেকানং যক্খকোটীনং, ৰসৰত্তিম্হি ইস্সরো.

১৩. তদাপি তং বুদ্ধৰরং, উপগন্ত্ৰা মহেসিনং;

অন্নপানেন তপ্পেসিং, সসঙ্ঘং লোকনাযকং.

১৪. সোপি মং তদা ব্যাকাসি, ৰিসুদ্ধনযনো মুনি;

‘‘অপরিমেয্যিতো কপ্পে, অযং বুদ্ধো ভৰিস্সতি.

১৫. ‘‘পধানং পদহিত্ৰান…পে… হেস্সাম সম্মুখা ইমং’’.

১৬. তস্সাপি ৰচনং সুত্ৰা, হট্ঠো সংৰিগ্গমানসো;

উত্তরিং ৰতমধিট্ঠাসিং, দসপারমিপূরিযা.

১৭. নগরং চন্দৰতী নাম, যসৰা নাম খত্তিযো;

মাতা যসোধরা নাম, অনোমদস্সিস্স সত্থুনো.

১৮. দসৰস্সসহস্সানি, অগারং অজ্ঝ সো ৰসি;

সিরী উপসিরী ৰড্ঢো, তযো পাসাদমুত্তমা.

১৯. তেৰীসতিসহস্সানি, নারিযো সমলঙ্কতা;

সিরিমা নাম সা নারী, উপৰাণো নাম অত্রজো.

২০. নিমিত্তে চতুরো দিস্ৰা, সিৰিকাযাভিনিক্খমি;

অনূনদসমাসানি, পধানং পদহী জিনো.

২১. ব্রহ্মুনা যাচিতো সন্তো, অনোমদস্সী মহামুনি;

ৰত্তি চক্কং মহাৰীরো, উয্যানে সো সুদস্সনে [সুদস্সনুয্যানমুত্তমে (স্যা. কং.)].

২২. নিসভো চ অনোমো চ [অসোকো চ (সী.)], অহেসুং অগ্গসাৰকা;

ৰরুণো নামুপট্ঠাকো, অনোমদস্সিস্স সত্থুনো.

২৩. সুন্দরী চ সুমনা চ, অহেসুং অগ্গসাৰিকা;

বোধি তস্স ভগৰতো, অজ্জুনোতি পৰুচ্চতি.

২৪. নন্দিৰড্ঢো সিরিৰড্ঢো, অহেসুং অগ্গুপট্ঠকা;

উপ্পলা চেৰ পদুমা চ, অহেসুং অগ্গুপট্ঠিকা.

২৫. অট্ঠপণ্ণাসরতনং, অচ্চুগ্গতো মহামুনি;

পভা নিদ্ধাৰতী তস্স, সতরংসীৰ উগ্গতো.

২৬. ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৭. সুপুপ্ফিতং পাৰচনং, অরহন্তেহি তাদিহি;

ৰীতরাগেহি ৰিমলেহি, সোভিত্থ জিনসাসনং.

২৮. সো চ সত্থা অমিতযসো, যুগানি তানি অতুলিযানি;

সব্বং তমন্তরহিতং, ননু রিত্তা সব্বসঙ্খারা.

২৯. অনোমদস্সী জিনো সত্থা, ধম্মারামম্হি নিব্বুতো;

তত্থেৰস্স জিনথূপো, উব্বেধো পঞ্চৰীসতীতি.

অনোমদস্সিস্স ভগৰতো ৰংসো সত্তমো.