১০. পদুমবুদ্ধৰংসো

১. অনোমদস্সিস্স অপরেন, সম্বুদ্ধো দ্ৰিপদুত্তমো;

পদুমো নাম নামেন, অসমো অপ্পটিপুগ্গলো.

২. তস্সাপি অসমং সীলং, সমাধিপি অনন্তকো;

অসঙ্খেয্যং ঞাণৰরং, ৰিমুত্তিপি অনূপমা.

৩. তস্সাপি অতুলতেজস্স, ধম্মচক্কপ্পৰত্তনে;

অভিসমযা তযো আসুং, মহাতমপৰাহনা.

৪. পঠমাভিসমযে বুদ্ধো, কোটিসতমবোধযি;

দুতিযাভিসমযে ধীরো, নৰুতিকোটিমবোধযি.

৫. যদা চ পদুমো বুদ্ধো, ওৰদী সকমত্রজং;

তদা অসীতিকোটীনং, ততিযাভিসমযো অহু.

৬. সন্নিপাতা তযো আসুং, পদুমস্স মহেসিনো;

কোটিসতসহস্সানং, পঠমো আসি সমাগমো.

৭. কথিনত্থারসমযে, উপ্পন্নে কথিনচীৰরে;

ধম্মসেনাপতিত্থায, ভিক্খূ সিব্বিংসু [যাচিংসু (ক.)] চীৰরং.

৮. তদা তে ৰিমলা ভিক্খূ, ছল়ভিঞ্ঞা মহিদ্ধিকা;

তীণি সতসহস্সানি, সমিংসু অপরাজিতা.

৯. পুনাপরং সো নরাসভো [নরৰুসভো (স্যা. কং.)], পৰনে ৰাসং উপাগমি;

তদা সমাগমো আসি, দ্ৰিন্নং সতসহস্সিনং.

১০. অহং তেন সমযেন, সীহো আসিং মিগাধিভূ;

ৰিৰেকমনুব্রূহন্তং, পৰনে অদ্দসং জিনং.

১১. ৰন্দিত্ৰা সিরসা পাদে, কত্ৰান তং পদক্খিণং;

তিক্খত্তুং অভিনাদিত্ৰা, সত্তাহং জিনমুপট্ঠহং.

১২. সত্তাহং ৰরসমাপত্তিযা, ৰুট্ঠহিত্ৰা তথাগতো;

মনসা চিন্তযিত্ৰান, কোটিভিক্খূ সমানযি.

১৩. তদাপি সো মহাৰীরো, তেসং মজ্ঝে ৰিযাকরি;

‘‘অপরিমেয্যিতো কপ্পে, অযং বুদ্ধো ভৰিস্সতি.

১৪. ‘‘পধানং পদহিত্ৰান…পে… হেস্সাম সম্মুখা ইমং’’.

১৫. তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৬. চম্পকং নাম নগরং, অসমো নাম খত্তিযো;

অসমা নাম জনিকা, পদুমস্স মহেসিনো.

১৭. দসৰস্সসহস্সানি, অগারং অজ্ঝ সো ৰসি;

নন্দাৰসুযসুত্তরা, তযো পাসাদমুত্তমা.

১৮. তেত্তিংস চ সহস্সানি, নারিযো সমলঙ্কতা;

উত্তরা নাম সা নারী, রম্মো নামাসি অত্রজো.

১৯. নিমিত্তে চতুরো দিস্ৰা, রথযানেন নিক্খমি;

অনূনঅট্ঠমাসানি, পধানং পদহী জিনো.

২০. ব্রহ্মুনা যাচিতো সন্তো, পদুমো লোকনাযকো;

ৰত্তি চক্কং মহাৰীরো, ধনঞ্চুয্যানমুত্তমে.

২১. সালো চ উপসালো চ, অহেসুং অগ্গসাৰকা;

ৰরুণো নামুপট্ঠাকো, পদুমস্স মহেসিনো.

২২. রাধা চেৰ সুরাধা চ, অহেসুং অগ্গসাৰিকা;

বোধি তস্স ভগৰতো, মহাসোণোতি ৰুচ্চতি.

২৩. ভিয্যো চেৰ অসমো চ, অহেসুং অগ্গুপট্ঠকা;

রুচী চ নন্দরামা চ, অহেসুং অগ্গুপট্ঠিকা.

২৪. অট্ঠপণ্ণাসরতনং, অচ্চুগ্গতো মহামুনি;

পভা নিদ্ধাৰতী তস্স, অসমা সব্বসো দিসা.

২৫. চন্দপ্পভা সূরিযপ্পভা, রতনগ্গিমণিপ্পভা;

সব্বাপি তা হতা হোন্তি, পত্ৰা জিনপভুত্তমং.

২৬. ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৭. পরিপক্কমানসে সত্তে, বোধযিত্ৰা অসেসতো;

সেসকে অনুসাসিত্ৰা, নিব্বুতো সো সসাৰকো.

২৮. উরগোৰ তচং জিণ্ণং, ৰদ্ধপত্তংৰ পাদপো;

জহিত্ৰা সব্বসঙ্খারে, নিব্বুতো সো যথা সিখী.

২৯. পদুমো জিনৰরো সত্থা, ধম্মারামম্হি নিব্বুতো;

ধাতুৰিত্থারিকং আসি, তেসু তেসু পদেসতোতি.

পদুমস্স ভগৰতো ৰংসো অট্ঠমো.