১১. নারদবুদ্ধৰংসো

১. পদুমস্স অপরেন, সম্বুদ্ধো দ্ৰিপদুত্তমো;

নারদো নাম নামেন, অসমো অপ্পটিপুগ্গলো.

২. সো বুদ্ধো চক্কৰত্তিস্স, জেট্ঠো দযিতওরসো;

আমুক্কমালাভরণো, উয্যানং উপসঙ্কমি.

৩. তত্থাসি রুক্খো যসৰিপুলো, অভিরূপো ব্রহা সুচি;

তমজ্ঝপত্ৰা উপনিসীদি, মহাসোণস্স হেট্ঠতো.

৪. তত্থ ঞাণৰরুপ্পজ্জি, অনন্তং ৰজিরূপমং;

তেন ৰিচিনি সঙ্খারে, উক্কুজ্জমৰকুজ্জকং [কুজ্জতং (স্যা. কং.)].

৫. তত্থ সব্বকিলেসানি, অসেসমভিৰাহযি;

পাপুণী কেৰলং বোধিং, বুদ্ধঞাণে চ চুদ্দস.

৬. পাপুণিত্ৰান সম্বোধিং, ধম্মচক্কং পৰত্তযি;

কোটিসতসহস্সানং, পঠমাভিসমযো অহু.

৭. মহাদোণং নাগরাজং, ৰিনযন্তো মহামুনি;

পাটিহেরং তদাকাসি, দস্সযন্তো সদেৰকে.

৮. তদা দেৰমনুস্সানং, তম্হি ধম্মপ্পকাসনে;

নৰুতিকোটিসহস্সানি, তরিংসু সব্বসংসযং.

৯. যম্হি কালে মহাৰীরো, ওৰদী সকমত্রজং;

অসীতিকোটিসহস্সানং, ততিযাভিসমযো অহু.

১০. সন্নিপাতা তযো আসুং, নারদস্স মহেসিনো;

কোটিসতসহস্সানং, পঠমো আসি সমাগমো.

১১. যদা বুদ্ধো বুদ্ধগুণং, সনিদানং পকাসযি;

নৰুতিকোটিসহস্সানি, সমিংসু ৰিমলা তদা.

১২. যদা ৰেরোচনো নাগো, দানং দদাতি সত্থুনো;

তদা সমিংসু জিনপুত্তা, অসীতিসতসহস্সিযো.

১৩. অহং তেন সমযেন, জটিলো উগ্গতাপনো;

অন্তলিক্খচরো আসিং, পঞ্চাভিঞ্ঞাসু পারগূ.

১৪. তদাপাহং অসমসমং, সসঙ্ঘং সপরিজ্জনং;

অন্নপানেন তপ্পেত্ৰা, চন্দনেনাভিপূজযিং.

১৫. সোপি মং তদা ব্যাকাসি, নারদো লোকনাযকো;

‘‘অপরিমেয্যিতো কপ্পে, অযং বুদ্ধো ভৰিস্সতি.

১৬. ‘‘পধানং পদহিত্ৰান…পে… হেস্সাম সম্মুখা ইমং’’.

১৭. তস্সাপি ৰচনং সুত্ৰা, ভিয্যো হাসেত্ৰ মানসং;

অধিট্ঠহিং ৰতং উগ্গং, দসপারমিপূরিযা.

১৮. নগরং ধঞ্ঞৰতী নাম, সুদেৰো নাম খত্তিযো;

অনোমা নাম জনিকা, নারদস্স মহেসিনো.

১৯. নৰৰস্সসহস্সানি, অগারং অজ্ঝ সো ৰসি;

জিতো ৰিজিতাভিরামো, তযো পাসাদমুত্তমা.

২০. তিচত্তারীসসহস্সানি, নারিযো সমলঙ্কতা;

ৰিজিতসেনা নাম নারী, নন্দুত্তরো নাম অত্রজো.

২১. নিমিত্তে চতুরো দিস্ৰা, পদসা গমনেন নিক্খমি;

সত্তাহং পধানচারং, অচরী পুরিসুত্তমো [লোকনাযকো (সী. ক.)].

২২. ব্রহ্মুনা যাচিতো সন্তো, নারদো লোকনাযকো;

ৰত্তি চক্কং মহাৰীরো, ধনঞ্চুয্যানমুত্তমে.

২৩. ভদ্দসালো জিতমিত্তো, অহেসুং অগ্গসাৰকা;

ৰাসেট্ঠো নামুপট্ঠাকো, নারদস্স মহেসিনো.

২৪. উত্তরা ফগ্গুনী চেৰ, অহেসুং অগ্গসাৰিকা;

বোধি তস্স ভগৰতো, মহাসোণোতি ৰুচ্চতি.

২৫. উগ্গরিন্দো ৰসভো চ, অহেসুং অগ্গুপট্ঠকা;

ইন্দাৰরী চ ৰণ্ডী [উন্দী (সী.), গণ্ডী (স্যা. কং.)] চ, অহেসুং অগ্গুপট্ঠিকা.

২৬. অট্ঠাসীতিরতনানি, অচ্চুগ্গতো মহামুনি;

কঞ্চনগ্ঘিযসঙ্কাসো, দসসহস্সী ৰিরোচতি.

২৭. তস্স ব্যামপ্পভা কাযা, নিদ্ধাৰতি দিসোদিসং;

নিরন্তরং দিৰারত্তিং, যোজনং ফরতে সদা.

২৮. ন কেচি তেন সমযেন, সমন্তা যোজনে জনা;

উক্কাপদীপে উজ্জালেন্তি, বুদ্ধরংসীহি ওত্থটা.

২৯. নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

৩০. যথা উল়ূহি গগনং, ৰিচিত্তং উপসোভতি;

তথেৰ সাসনং তস্স, অরহন্তেহি সোভতি.

৩১. সংসারসোতং তরণায, সেসকে পটিপন্নকে;

ধম্মসেতুং দল়্হং কত্ৰা, নিব্বুতো সো নরাসভো.

৩২. সোপি বুদ্ধো অসমসমো, তেপি খীণাসৰা অতুলতেজা;

সব্বং তমন্তরহিতং, ননু রিত্তা সব্বসঙ্খারা.

৩৩. নারদো জিনৰসভো, নিব্বুতো সুদস্সনে পুরে;

তত্থেৰস্স থূপৰরো, চতুযোজনমুগ্গতোতি.

নারদস্স ভগৰতো ৰংসো নৰমো.