১২. পদুমুত্তরবুদ্ধৰংসো

১. নারদস্স অপরেন, সম্বুদ্ধো দ্ৰিপদুত্তমো;

পদুমুত্তরো নাম জিনো, অক্খোভো সাগরূপমো.

২. মণ্ডকপ্পোৰ সো আসি, যম্হি বুদ্ধো অজাযথ;

উস্সন্নকুসলা জনতা, তম্হি কপ্পে অজাযথ.

৩. পদুমুত্তরস্স ভগৰতো, পঠমে ধম্মদেসনে;

কোটিসতসহস্সানং, ধম্মাভিসমযো অহু.

৪. ততো পরম্পি ৰস্সন্তে, তপ্পযন্তে চ পাণিনে;

সত্ততিংসসতসহস্সানং, দুতিযাভিসমযো অহু.

৫. যম্হি কালে মহাৰীরো, আনন্দং উপসঙ্কমি;

পিতুসন্তিকং উপগন্ত্ৰা, আহনী অমতদুন্দুভিং.

৬. আহতে অমতভেরিম্হি, ৰস্সন্তে ধম্মৰুট্ঠিযা;

পঞ্ঞাসসতসহস্সানং, ততিযাভিসমযো অহু.

৭. ওৰাদকো ৰিঞ্ঞাপকো, তারকো সব্বপাণিনং;

দেসনাকুসলো বুদ্ধো, তারেসি জনতং বহুং.

৮. সন্নিপাতা তযো আসুং, পদুমুত্তরস্স সত্থুনো;

কোটিসতসহস্সানং, পঠমো আসি সমাগমো.

৯. যদা বুদ্ধো অসমসমো, ৰসি ৰেভারপব্বতে;

নৰুতিকোটিসহস্সানং, দুতিযো আসি সমাগমো.

১০. পুন চারিকং পক্কন্তে, গামনিগমরট্ঠতো;

অসীতিকোটিসহস্সানং, ততিযো আসি সমাগমো.

১১. অহং তেন সমযেন, জটিলো নাম রট্ঠিকো;

সম্বুদ্ধপ্পমুখং সঙ্ঘং, সভত্তং দুস্সমদাসহং.

১২. সোপি মং বুদ্ধো ব্যাকাসি, সঙ্ঘমজ্ঝে নিসীদিয;

‘‘সতসহস্সিতো কপ্পে, অযং বুদ্ধো ভৰিস্সতি.

১৩. ‘‘পধানং পদহিত্ৰান…পে… হেস্সাম সম্মুখা ইমং’’.

১৪. তস্সাপি ৰচনং সুত্ৰা, উত্তরিং ৰতমধিট্ঠহিং;

অকাসিং উগ্গদল়্হং ধিতিং, দসপারমিপূরিযা.

১৫. ব্যাহতা তিত্থিযা সব্বে, ৰিমনা দুম্মনা তদা;

ন তেসং কেচি পরিচরন্তি, রট্ঠতো নিচ্ছুভন্তি তে.

১৬. সব্বে তত্থ সমাগন্ত্ৰা, উপগচ্ছুং বুদ্ধসন্তিকে;

তুৰং নাথো মহাৰীর, সরণং হোহি চক্খুম.

১৭. অনুকম্পকো কারুণিকো, হিতেসী সব্বপাণিনং;

সম্পত্তে তিত্থিযে সব্বে, পঞ্চসীলে পতিট্ঠপি.

১৮. এৰং নিরাকুলং আসি, সুঞ্ঞতং তিত্থিযেহি তং;

ৰিচিত্তং অরহন্তেহি, ৰসীভূতেহি তাদিহি.

১৯. নগরং হংসৰতী নাম, আনন্দো নাম খত্তিযো;

সুজাতা নাম জনিকা, পদুমুত্তরস্স সত্থুনো.

২০. দসৰস্সসহস্সানি, অগারং অজ্ঝ সো ৰসি;

নরৰাহনো যসো ৰসৰত্তী [নারিৰাহনো যসৰতী (স্যা. কং.)], তযো পাসাদমুত্তমা.

২১. তিচত্তারীসসহস্সানি, নারিযো সমলঙ্কতা;

ৰসুদত্তা নাম নারী, উত্তমো নাম অত্রজো.

২২. নিমিত্তে চতুরো দিস্ৰা, পাসাদেনাভিনিক্খমি;

সত্তাহং পধানচারং, অচরী পুরিসুত্তমো.

২৩. ব্রহ্মুনা যাচিতো সন্তো, পদুমুত্তরো ৰিনাযকো;

ৰত্তি চক্কং মহাৰীরো, মিথিলুয্যানমুত্তমে.

২৪. দেৰলো চ সুজাতো চ, অহেসুং অগ্গসাৰকা;

সুমনো নামুপট্ঠাকো, পদুমুত্তরস্স মহেসিনো.

২৫. অমিতা চ অসমা চ, অহেসুং অগ্গসাৰিকা;

বোধি তস্স ভগৰতো, সললোতি পৰুচ্চতি.

২৬. ৰিতিণ্ণো চেৰ [অমিতো চেৰ (স্যা.)] তিস্সো চ, অহেসুং অগ্গুপট্ঠকা;

হট্ঠা চেৰ ৰিচিত্তা চ, অহেসুং অগ্গুপট্ঠিকা.

২৭. অট্ঠপণ্ণাসরতনং, অচ্চুগ্গতো মহামুনি;

কঞ্চনগ্ঘিযসঙ্কাসো, দ্ৰত্তিংসৰরলক্খণো.

২৮. কুট্টা কৰাটা ভিত্তী চ, রুক্খা নগসিলুচ্চযা;

ন তস্সাৰরণং অত্থি, সমন্তা দ্ৰাদসযোজনে.

২৯. ৰস্সসতসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

৩০. সন্তারেত্ৰা বহুজনং, ছিন্দিত্ৰা সব্বসংসযং;

জলিত্ৰা অগ্গিক্খন্ধোৰ নিব্বুতো সো সসাৰকো.

৩১. পদুমুত্তরো জিনো বুদ্ধো, নন্দারামম্হি নিব্বুতো;

তত্থেৰস্স থূপৰরো, দ্ৰাদসুব্বেধযোজনোতি.

পদুমুত্তরস্স ভগৰতো ৰংসো দসমো.